日期 : 29/ Nov/2007 晚上 9:00
地點 : 荃景圍室內體育館
賽果 : 54 : 44 (海鷗 vs PISA)
今個月頭剛剛打完第十一場比賽, 話咁快又收到電話通知, 月底又有一場比賽, 終於係上星期比賽完畢, 我o地又輸o左. 不過今場真係我打波以o黎最見識得多o既一場. 我真係自己無參與過一場波出現o左故意犯規, 雙方犯規, 同埋技術犯規. 今次真係大開眼界!
今場比賽人腳比上場好得多, 有三分射手 Andy 歸隊, 有 JJ, 可惜o既係鬼仔 Simon 又要返教會, o黎唔到, 少o左個高佬搶籃板. 今場對手o既平均年齡眼見應該係比我o地大, 反而令我擔心, 因為我最驚o既係同老鬼打波, 因為佢o地o既經驗太豐富啦, 好多小動作會出現, 好容易令人受傷, 或者令人衝動, 頭先話呢場比賽有咁多”特別”犯規出現, 真係一個字, 薑係愈老愈辣. 由於對手彈跳力無咁好, 好多時佢o地都會借助一o的超技術o黎阻礙我o地. 好似咁樣, 每當搶籃板時, 就會出現手”橋”手o既情況, 而 Kenneth 為o左 fing 甩對手, 就用力一 fing, 就係呢個時候, 球証示意 – 雙方犯規. 連續幾次我o地投訴對手, 但偏偏球證就視而不見, 就開始搞到亞 Ken 失去o左冷靜. 之後仲比球證吹多一次雙方犯規添.
另一個技術犯規就係因為對手射波時, JJ 係對手面前拍了一下掌, 咁就比人吹罰(真係唔應該咁做), 無話可說, 抵罰. 最後一個故意犯規係因為之前亞 Ken 比對手激到慶晒, 而且之前又比人吹o左兩次雙方犯規, 所以最後就故意去推人, 球証就係咁吹o左佢故意犯規, 然後完場.
題外話, 今場唔知因乜事, 或者係一開始就入o左三分波, 我好快就進入o左狀態, 好多朋友都知我係慢熱一族, 但係今場一反常態, 全場我攻入o左 24 分, 對上一次射入咁多分應該係二三年前同澳加參加o個個中西區o既比賽, 當日射入o左 25 分. 但係要射入咁多分, 真係要好好狀態之下, 又要手感發熱, 因為打到第四節, 出現體力不繼, 而射波o既準繩度就即時下降o左好多, 睇o黎我真係要好好咁練一下我o既體能了.