Skip to content

籃球主場 Posts

砌傢俬

好好彩過嚟前已經搵咗屋,業主肯等半個月,等我哋過到嚟再簽約。間屋除咗基本電器已經包括之外,其他當然自己買返嚟啦。間屋原本就有洗衣機,雪櫃,電䁔爐,焗爐,抽油煙機……. 業主仲要係叫做新裝修過,大部份頭先講嘅嘢都係全新。地毯都重新鋪過,窗架都係全新,全屋都叫重新油過。今次真係遇到好業主,又租到間好好嘅屋。 本身住緊 airbnb時已經買咗個水煲。airbnb話晒有床有被,又有洗衣乾衣機。 但係新屋就係百無。 咁搬入去住,究意要有乜先最緊要呢? 之唔係就係被同床褥囉!住緊 airbnb時已經上網揀緊邊隻牌子比較硬身,最重要嘅係可以呢幾日送貨,如果唔係搬去新屋就要瞓地板。 心目中有 Sealy 絲漣同埋 Emma,兩隻都未瞓過。以前瞓嗰張係 Slumberland 斯林百蘭。呢個牌子之前香港個 Sales 話係英國牌子,但係我上網搵極都好似搵唔到,如果唔係我實搵返嗰張買 (莫非我被人搵笨?)。比較完一大輪,最後揀咗 Emma,因為做緊特價,加埋佢可以兩日內送貨,完全符合要求。不過真係估唔到而家啲床褥壓縮完得咁細, 好容易就可以搬上樓放好。 跟住就不停咁上 wayfair 網站睇傢俬,床架,茶几,sofa,衣櫃……. 成日覺得買呢啲嘢係咪應該要親手摸下,感受下啲質料先做決定。但偏偏老婆又想快啲決定,買齊傢俬就可以叫做完成咗件事,所以好快就揀啱個款落單。 有啲傢俬就去 IKEA…

英國大大小小公園

香港嘅公園平時就去得多。平日去人少少,無咁嘈。但逢假日去就會見到大量姐姐們,香港人去野餐。無計,香港地方少,郊野公園一到假日就會好似街市咁迫爆。無論你想去野餐,去BBQ都好,一定要早起身去霸位,霸爐。都係嗰句啦!香港地方細嘛,人又咁多,難得假日,當然想同屋企人、朋友仔去郊遊啦! 嚟咗英國一個月,我都只係去咗屋企附近個公園行過下。呢個公園面積都好大,有條人工河道,又有個湖,當然仲有好多樹啦!而呢度真係人唔算多 (可能我住呢區人少),無論你幾時嚟都係咁上下。第一次嚟本身諗住睇下啲鵝,鴨,雀仔,欣賞下日落湖景。點知突然有隻松鼠走埋嚟身邊,仲同蘇哈兩小妹拎嘢食,好似完全唔怕人咁。然後再發現呢度原來有好多隻松鼠走嚟走去,好得意,蘇哈都追住佢哋嚟睇,好興奮。 去完第一次已經令蘇哈難忘,日日都話想拎啲 nuts 去餵下松鼠,麪包去餵下魚,雀仔。終於等到有日天氣好好,一大早叫佢哋起身,然後出發去餵松鼠。成朝去到蘇哈都不停餵雀,我就無無聊行嚟行去搵松鼠,原來咁早無乜松鼠,佢哋應該四五點先會出現。餵咗成個幾鐘 (究竟你哋帶咗幾多麵包嚟餵雀?) 我就話去下後面睇下係乜嚟,次次嚟到都只停喺呢度欣賞啲鴨,鵝,雀。。。 原來佢哋餵晒啲麪包所以先肯起行😫。行下行下,終於畀佢哋見到松鼠啦!有幾隻喺樹上走嚟走去,佢哋即刻拎咗啲 nuts 出嚟餵松鼠 (喂,其實你哋仲有無帶其他嘢嚟餵唔同動物?🤔)。其實佢哋係咪真係食得嘅呢?餵得咁上下,我又發現前面原來有個遊樂場,仲有好多遊樂設施,真係睇見大人細路都開心呀。拿拿聲叫佢哋嚟睇,諗住同佢哋去玩啦!點鬼知佢哋鐘意餵松鼠多過玩,又估唔到喎。 同一時間又畀我發現隔離場邊原來有個籃球場,yeah,下次可以自己帶個波嚟打。不過睇真啲,原來係籃球場加足球場先啱。佢籃球架底下面整咗個龍門架,咁就可以一場二用,讚。但係以我所見,踢足球嘅人已經霸咗兩邊場(果然係足球國家),場外張櫈見到有個好落寞嘅身影,一個拎住籃球嘅少年坐咗喺度望住個場,心裡面個滋味一定唔好受 (我明, 我真係明)。 繞咗個籃球場一圈,返到遊樂場已經見到蘇哈佢哋係度玩緊,當然都係因為無晒 nuts,所以咪可以走嚟玩囉。呢個遊樂場有大量鞦韆,有氹氹轉,有瀡滑梯。。。。最特別佢有一個飛越繩索畀你玩,啲細路個個排晒隊一個一個輪住玩,好有秩序禮貌。有啲大哥哥見到妹梅喺側邊等打鞦韆,仲會主動落嚟畀佢玩,唔會霸住玩好耐。不過可能始終都未咁識英文,妹梅都未可以同啲小朋友傾計,玩埋一齊。不過佢又好 enjoy 自己一個去玩。啲家長們都約埋兩三個家庭,一路嘆咖啡食早餐,吹水,一路睇住啲細路跑嚟跑去,都幾悠閒。 玩完一大輪,又係返屋企煮 lunch 嘅時候。其實假日咁樣,既充實,又可以放下小朋友電,真係幾好。自己大人行下,來回屋企都行咗成萬步,強身健體,不錯。 其實個公園仲有一大片草地畀人跑,上次喺 FB 見到話有人會搬個龍門架去呢啲草地,同小朋友玩踢波。…

剪髮 ( Haircut in UK )

大佬,剪頭髮有乜好講!咪就咁行入去同人講剪髮囉,有乜特別。 無錯,原來其實就係咁簡單。之前睇 FB,啲人話好驚去剪頭髮,因為外國人根本唔明你哋想點剪,佢哋都係用返自己外國呢套嘅剪髮方式,即係有啲類似 QB 嘅髮型一號、二號,剪完頭髮出嚟嘅人真係一式一樣。 其實自己一早都想去剪,但見到咁多 FB 負評,本身都有啲郩底。加埋平時出街又唔係話太唔方便,所以一直拖拖拖。對上一次剪髮已經係一月中嘅事,即係已經兩個多月無剪,平時都係一個月就去剪,保持清爽造型,而家咁鬼長真係幾煩。。突然的起心肝去剪髮,都係因為我心愛嘅籃球緣故。事緣 2 星期前打波時已經成日要撥頭髮,打打下又塌晒落嚟,好唔舒服。上星期再打時已經噴多咗定型噴霧,亦用多咗髮泥做固定,但係都係唔太得,搞到好樣衰。就係因為為咗打籃球可以專心啲,我第二日就去咗屋企附近間理髮店 Barbershop。 講樣我留意到嘅事畀大家知。呢度真係好多 Barbershop 㗎,真係總有一間喺左近。我住嘅呢度條街已經有 3、4 間,真係有咁多人日日都要剪髮嘅咩?我都睇過,平均價錢 £14 。我見過最平係 £13,最貴 £18,但大部份都係 £14。我呢間就貴少少,£15。點解我咁多間唔去,去呢間?除咗因為近之外,佢嘅裝潢,髮型師嘅樣貌,又著晒制服,室內又有專 for 兒童嘅髮型椅,加加埋埋一個整體形象都好舒服,所以就揀咗呢間! 第二朝瞓醒真係乜都無理就衝咗去剪。入到去間舖有成三個剪緊,又有一個等緊,當然乖乖坐低排隊等剪啦!十分鐘後好快就到我。理髮師問我想點剪,我就用啲簡單英文同佢講,再加上身體語言,指住側邊兩邊,make it…

2021 回顧和展望

今年回顧應該要回顧啲乜呢? 真係諗爆頭,點解?不如你同我講,今年你覺得自己有冇發生過乜嘢大事需要回顧呢? 諗唔到呢! 今年自己其實真係覺得過得好快,感覺好似剛剛過完新年無耐,而家話咁快又已經到咗年尾,究竟呢一年做過啲乜呢? 今年同上年差唔多,一樣無得去旅行;一樣無得除罩;一樣無得通關…….. 不過有啲嘢係多咗,就係要用安心出行,嘟入食肆,政府地方……. 有多就會有少,少咗蘋果日報,年尾仲少埋立場新聞,其實仲有好多團體都消失咗。 社會上有好多變化,但呢啲改變有人接受到,有人接受唔到,一樣米養百樣人,多元化嘅社會,當然會有唔同嘅聲音、意見。 當然自己個人唔多唔少都有啲嘢變咗或者將會改變。 變咗嘅有 (回顧) 歲數,大咗一歲,哈哈哈 公司搬咗 office,搬咗去一個更大更舒適嘅環境 終於打咗 BioTech BNO Visa 批咗,可以走佬去英國 將會變嘅有 (展望) 希望去到英國我哋一家可以快快適應,快快租到屋,快快搵到份絕世好工,亞女們快快搵到間好學校入讀,一切順順利利。 一切重新開始,要學會放低,放下身段,去學習當地人嘅生活方式,去融入當地,學做一個本地人。 雖然我會離開公司,離開我嘅工作,但我都希望公司會愈做愈大,愈來愈賺錢,可以快快賣盤賣到個好價錢。 當然最重要嘅係一家人都身體健康。

英國 giffgaff 電話咭

去旅行,首要當然要計劃去邊度啦!然後訂機票,再跟手就係計劃行程。 以前就會去旅行社買機票連酒店套票,而家就係上網 book,skyscanner,agoda,expedia…… 真係方便好多。 以前去到當地國家,大家都會靠旅遊天書,以前可能會行咗好多冤枉路。 而家大家會靠 google,打開個 google map 再跟住嚟行就得啦! 當然,而家去到當地,打開 google map 係要有上網服務先得。 咁大家會一早喺香港買定?定係去到先搵電訊商買咭? 各人有各人做法。 以前我去台灣,好多時都會去到當地先做上網登記,後來就喺鴨記買定。 記得好早期鴨記都仲未有上網咭,有都可能比較貴,所以都會去到台灣先申請。 不過當地申請都幾煩,又要登記,又要影印護照,分分鐘搞一張咭上網都要成個鐘。 而家當然唔需要咁耐啦,走去鴨記買,落地插咭入電話就用得。 今次去英國,我都去咗鴨記睇睇,見到 3 有張電話上網咭,都係HK$200 左右,有80GB data,睇落都好似幾好。…

O2 HomeSpot LTE Router

做乜又買嚿咁嘅嘢返嚟。當然有苦衷啦!我點會無啦啦嘥錢。 事緣屋企個寬頻到期,之前兩個月不停咁周圍搵 Sales 問有無特價,有無優惠,可惜一聽見係村屋就話無。一直搵到師傅上嚟收機,正式斷網。當然我唔會就咁用自己電話 data 啦。因為屋企除咗我同 Mimi 可以繼續上網之外,家中都仲有其他人有上網需求,當然最重要係唔知之後開學會唔會突然又話 Zoom,如果佢哋上唔到網,唔通真係同學校講我哋唔上堂咩! 仲有就係屋企啲 IPCAM,NAS,Google Home,電視盒都要上網先可以睇到用到。係諗到呢啲情況之下,又未搵到新上網公司之下,唯有搵替代品。 辦法就係用 4G Sim Card 上網,本身有隻幾年前買嘅 4G 隨身 router,但係今日拎出嚟插咭,居然 Sim Card 糟唔識 lock 實張咭,我試過按實張咭,但係系統又話…

Luis Alberto Scola

如果你睇開或者打開籃球,呢個名字絕對唔陌生。佢初加入火箭時我已經好喜歡佢,好關注佢。因為佢籃底嘅腳步功夫,真係可以媲美 Hakeem Abdul Olajuwon。再加上佢開闊嘅眼界,真係做助攻王都得。傳,切,射,籃板樣樣都得,真係不知不覺咁畀佢全面嘅身手吸引。 後來阿根廷贏美國隊,最後拎埋2004年奧運冠軍。當時 Manu Ginobili + Scola 呢對組合,真係令各隊都聞風喪膽。當 Ginobili 都退役,Scola 仍然馳騁於 CBA,而家仍然喺意大利打緊職業賽。 你會話有乜特別?特別在於 Scola 而家已經係一名41歲嘅球員。以佢而家嘅歲數,居然仲可以打職業聯賽,仲可以入選國家隊。入選不特止,佢仲係打正選,場均二十幾三十分鐘嘅出場時間。佢仲可以係隊中嘅得分手,畀球隊一個穩定嘅得分來源。佢仍然係隊中嘅籃板王。 最令我佩服都唔係以上所講嘅嘢。點解我好喜歡佢? 其實係因為佢嘅籃球態度。佢後生時已經好積極去防守,去搶籃板。其實佢加入 NBA 時已經 27 歲,對 NBA 嚟講都已經係中齡球員,但係佢仍然好勤力咁去補位,防守,搶籃板。…

BioNTech

終於都係要打。等咗咁耐,都係要趕喺佢就嚟無得打前走去打針,無得再拖。 究竟有乜驅使你去打針呀? 我如果話畀你聽係【愛】,你信唔信? 咪玩啦,我自己都唔信。 咁做乜無啦啦走去打? 唉! 咪就係要返大陸囉。 就嚟成年幾兩年都無返過大陸公司,真係唔敢想像間辦公室會變成點。 另外就係考慮有可能要返去大陸做轉名手續。如果無打針,真係到時開關話要打咗針先可以去,如果無打就要繼續隔離 21 日,咁樣就真係煩。 咁點解又唔打科興? 我信科學。 暫時數據係講 BioNTech 對抗COVID-19 比較有效,再加上變種病毒都有抵抗能力,反而科興就…… 另一原因係由於多數西方國家都認證 BioNTech,將來要出國旅遊嘅時候,嗰本旅遊疫苗護照都係西方國家認證,咁當然打國際公認嘅疫苗啦! 好啦!講咗咁耐,上網 book 日期先。嘩!之前幾個月明明睇過元朗平時都有好多位,點解而家會變晒 full booking? 算啦,第一針改去屯門打,第二針先返元朗打。…

moto edge S

咦…? 你之前好似先買咗部 moto one vision plus 喎,搞乜而家又再入手一部 moto 機? 大家心水都好清喎,仲記得我無幾耐之前先入咗一部機嚟做大陸機。 點解而家又入手一部,其實都係用嚟做大陸機,不過呢部係畀老婆用。 咁又點解唔揀返之前嗰部,之前講到嗰部幾好,做乜唔買返呢? 科技嘅嘢,日新月異,今次呢部咁啱近排又做緊特價,加埋佢又用新 CPU,Memory 又多一倍,儲存空間又快啲,最重要頭先講咗,做緊特價嘛,個價同之前嗰部價錢相差兩百蚊左右,無理由買舊款機喎。 Edge S Specification Display: 6.70-inch (1080×2520) Processor: Qualcomm Snapdragon 870…

新停車收費錶

今日終於試咗新錶位,不過都有少少烏龍嘢發生咗。 其實新咪錶同以前無乜分別,最特別係佢可以遙距入錶,今次終於可以試下。入錶都係揀返邊個泊位,揀泊幾耐,跟住再揀泊八達通定其他繳費方式,最後泊咭就完成。當然,你要先去下載入錶易呢個 APP ( Android 下載: https://play.google.com/store/apps/details?id=hktd.flowbirdapp.com&hl=zh_HK&gl=US ). 安裝完就打開個 APP,Scan 錶位個 QR Code,咁佢就會顯示而家你個泊位資料,錶位位置,泊車餘下時間,仲會提前十分鐘提一提你就嚟夠鐘,咁就唔驚會過時啦! 泊好車,入咗錶,咁就好安心去行街街,食飯飯。食飯尾段,就嚟夠鐘,諗住用個 APP 去遙距入錶,搞咗一大輪,居然唔得。 點解呀!! 搞乜鬼呀!! 頂,原來係要泊車時唔可以用八達通繳費,一定要用其他方式繳費先可以用到遙距入錶。 夠鐘入錶,唯有死死氣去入錶,今次我揀咗用 google pay,之後夠鐘就可以用 APP 去入錶!!! 真係勁方便!…