剛剛過了 2009 年差不兩個月, 只有感覺時間真係過得好快. 一轉眼, 2008 年已經過去, 跟住新年又到, 然後話咁快又到自己生日, 跟住又會到復活節…… 近排因為實在太忙, 所以都無乜時間去 update 個 blog, 今日難得可以偷一偷閒, 雖然今日係情人節, 但係身心俱疲累o既情況下, 我倆都選擇留係屋企, 好好咁休息一下.
2008 年, 究竟自己做過o的乜? 有乜o野開心事發生過, 有乜o野唔開心事發生過? 其實真係好多好多事情發生, 絕大部分都算係開心事!
最開心o既事, 應該係同一班朋友去台中旅行了. 咁多年o黎都未試過同咁大班朋友去旅行, 仲要係第一次外地自駕遊添.
最難忘就真係睇住中國舉辦奧運會, 而開幕禮o既情境真係難忘到不得了, 雖然我唔係親身到北京感受, 但係電視機面前睇, 已經係好震撼了.
最感動係睇一公升眼淚時, 真係好感人, 哭成淚人!!
最辛苦係管理公司o既人同事, 點令公司愈做愈好. (亦係 2009 繼續要做o既事)
最遺撼係損失客戶, 令公司減少收入 (即係自己少o左收入).
最錯愕o既係公司o既伙伴突然要離開公司, 另謀高就~~~
最擔心就係家姐入院生 bb, 變成家姐入埋 ICU, 好彩最後母子平安…
最唔開心o既事, 哈哈, 笑兩聲之後已經唔會再去諗了, 都唔記得了, 人係要向前望.
2009 年, 唔知又會有幾多個 “最” 出現呢?
p.s. 第一個”最”已經出現o左, 希望唔會再有咁o既”最”出現 ~~~~~