入伙到而家用咗六年嘅風扇燈終於都要退落嚟。一年前已經開始壞壞哋，成日都會整壞啲燈膽，風扇速度又調較唔到，仲要發出勁大嘅嘈音。忍受咗一輪，諗住今年續租時如果要搬先換，但係估唔到業主肯唔加咁多租，咁就唯有繼續住喺呢度啦！咁繼續住就要諗下換咗把風扇燈。 上淘寶搵咗輪，諗住搵把可以收埋扇葉嘅，但係睇極都覺得醜怪。又再搵下而家用緊咁上下嘅款，原來都已經唔興呢啲款。而家興 LED 圓罩款，搵咗一輪，終於搵咗把合眼緣，口碑都唔差嘅款式。睇介紹，LED 燈盤可以獨立更換，又可以語音操控，摩打嘅聲音好靜。當然，呢啲係佢哋嘅產品介紹啫。要再睇下啲用家口碑，口碑大部份都叫 OK。咁。。。。好啦，咁啱有特價，落 order。 好快貨就到咗。今晚比較得閒，拿拿臨拆咗部舊風扇燈落嚟先。拆風扇都用咗成半個鐘有多，原來都咁鬼難拆。好，搞掂就裝新風扇燈。打開說明書，再跟住嚟組裝，首先接駁個遙控器，再裝個底盤上天花。弊，大鑊，個底盤嘅螺絲位同之前個天花螺絲位唔啱，咁點算。。 諗下諗下，去工具箱搵到個鑽嘴，度好位，跟手喺個底盤度鑽個窿，咁就可以裝上天花。大約前後用咗一個鐘，裝埋扇葉，LED 燈盤，終於搞掂。 好緊張，開燈儀式。一，二，三，OK，燈著，風扇轉動，大功告成。又真係幾靚，幾靜，風又大，燈都好光亮喎，不錯!