一年一度嘅聖誕節又到了。今年無得出國旅行，唯有留喺香港過聖誕。記得上年開始送聖誕禮物。上年送咗 Lenovo Tablet 畀蘇菲 & 妹梅，Google Chromebook畀 Mimi. 今年蘇菲已經不停咁問我有冇聖誕禮物，妹梅見家家問，佢又問埋一份。 Mimi 就更加唔駛講，更加要買畀佢，無理由兩個女有，佢無㗎嘛！
今年送乜好呢？ 好彩次次都咁啱得咁橋，總有啲嘢又咁啱壞，我就唔需要諗去買乜。好似 Mimi 咁，咁啱早兩年送嘅 Fossil smartwatch 死咗，今次當然藉住呢個原因，走去買隻 moto smartwatch 畀佢啦！
蘇菲呢？嗯，早排佢睇過 Switch 嘅動物森友會介紹片，佢又一直覺得呢隻 Game 會好好玩，成日都問我會唔會買，咁我又真係無乜興趣，所以遲遲都無買。而家啱晒啦，可以買畀佢做聖誕禮物。
妹梅呢？嗯，呢個有啲難度。佢仲細，其實買乜畀佢，我估佢都應該無乜所謂，都會咁開心。
咦？話時話，咁邊個送禮物畀我呢？
P.S. 終於買到妹梅份禮物。原本諗住買 Frozen 嘅 DIY 手鍊，可惜買唔到，轉而買咗份公主系列 DIY 黐珠珠。仲要貴過份 Frozen，唉～～～
