話咁快又過咗 2022 年，今年都過得好快，真係好快。 喺一個新國度生活，所有嘢都好新鮮，每日都要去忙住應付呢樣嗰樣，又要學習快啲去適應呢個角度嘅生活。 就好似去旅行咁，每次放假去旅行，不論你去 5 日定 7 日，甚至乎係 14 日，你總係覺得時間好似好快就過咗，好快就要返香港繼續返工。 而家情況差唔多，十個月時間，“呼” 一聲就過咗。 你問返我做過乜，我又講唔出做過啲乜， 總之每日都好似有啲嘢做下。
2022 最大件事就係移咗民嚟英國。 喺英國重新出發，租屋、買車、搵學校、報稅、識朋友、搵志同道合嘅波友一齊打籃球、登記 GP、醫院登記睇長期病拎藥、熟悉本身住嗰區嘅環境、適應呢度嘅飲食……… 呢度只係一小部份，真係要講就講到天黑都未講完。
點解會揀 2022 年拋低所有嘢走咗去移民，遲下同大家講下。 2022 年都算係過得唔錯嘅一年，好似上面所講，我有好多嘢未熟悉又未慣，我用咗一年時間去適應呢度。 而 2022 年感覺其實真係似放假咁，雖然期間我仲有做香港份工，但其實都大部份已經喺七八月交接晒，而且好多嘅會議由於兩地時差關係，我都無參與，所以好多嘢都已經唔關我事，變相我都好清閒，掛名仲係叫做有份工做緊，實則就係放假中。不過又好彩，波友介紹咗一份 freelance job 畀我做，咁都叫可以賺下外快，有啲細藝。
2022 年應該都算係我人生中一個重大嘅轉捩點，由幾好嘅生活，幾好嘅事業，變成由零開始，呢個轉變真係唔係一時三刻可以習慣。 不過，為咗屋企人，我一個人嘅改變，又好似變得唔重要。 何況我本身都係一個樂觀派嚟嘅。 家下亦見到小朋友變得開開心心，又鍾意返學，咁呢個改變我諗都值得。
2023 年，展望係乜？ 梗係搵到份長工做啦，最好係人工唔錯就更好。 可以放 school holiday，咁就可以同小朋友一齊去下旅行。 其實都唔係好貪心啫，呢度啲人成日話要 work life balance 嘛。 搵到工做就可以下年試下申請做樓宇按揭，快啲擁有一間屬於自己嘅屋就 perfect。 2023 年當然唔少得大家都健健康康啦。 2022 年小朋友成日病，2023 年希望佢哋少啲病，可以全程投入學校生活。 亦希望 2023 年可以的起心肝去讀 Life in the UK，一 take 過考試順利通關就更好。 2023 年都仲有好多地方要去發掘，好多嘢等緊我做，新一年祝自己順順利利，心想事成。