話咁快又過咗 2022 年，今年都過得好快，真係好快。 喺一個新國度生活，所有嘢都好新鮮，每日都要去忙住應付呢樣嗰樣，又要學習快啲去適應呢個角度嘅生活。 就好似去旅行咁，每次放假去旅行，不論你去 5 日定 7 日，甚至乎係 14 日，你總係覺得時間好似好快就過咗，好快就要返香港繼續返工。 而家情況差唔多，十個月時間，“呼” 一聲就過咗。 你問返我做過乜，我又講唔出做過啲乜， 總之每日都好似有啲嘢做下。 2022 最大件事就係移咗民嚟英國。 喺英國重新出發，租屋、買車、搵學校、報稅、識朋友、搵志同道合嘅波友一齊打籃球、登記 GP、醫院登記睇長期病拎藥、熟悉本身住嗰區嘅環境、適應呢度嘅飲食……… 呢度只係一小部份，真係要講就講到天黑都未講完。 點解會揀 2022 年拋低所有嘢走咗去移民，遲下同大家講下。 2022 年都算係過得唔錯嘅一年，好似上面所講，我有好多嘢未熟悉又未慣，我用咗一年時間去適應呢度。…
今年英國冬天特別凍，我已經住喺南部，照理唔會凍得太離譜。 但你真係估唔到，今個冬天居然係會凍得咁誇張。 Scotland 最凍去到零下 17 度，我呢邊都去到零下 3 度。 而且落雪都落得勁大。 小朋友就好開心，走出去感受一下雪，不過始終係南部，都未可以好似中部或者北部咁砌雪人，就算砌到都係細細一個。 不過唔知乜嘢事，唔知係咪我哋真係咁黑仔，第一年就遇到好多英國未曾發生嘅事。 好似頭先講嘅冬天好鬼凍啦，而今年嘅夏天又係零舍熱，聽返啲波友或者業主講，真係過去十幾年都未試過咁。 過到嚟又特別多病，唔係我，係屋企人啫。 係咪未習慣呢度環境，抵抗力差咗咁多嘅？ 定係呢度嘅菌勁啲？ 一到埗無幾耐就中咗武肺病咗啦，蘇哈佢哋間唔時又會病幾日，差唔多每兩個月總會病下。 11月左右 蘇菲病咗兩三日，原本以為小問題。 點知呢頭蘇菲病好，跟住妹梅就病咗，仲要病咗差唔多 7 日咁耐，又 keep 住發高燒、流鼻涕、嘔、眼屎仲要濕又多，搞到黐實晒雙眼，佢又不停咁捽，搞到對眼又紅又腫，食極藥都係唔退燒，鼻塞又瞓得唔好，成日話好辛苦，真係擔心死人。 想同佢睇 GP，但記得上次睇時，醫生都係話未夠…
今年回顧應該要回顧啲乜呢？ 真係諗爆頭，點解？不如你同我講，今年你覺得自己有冇發生過乜嘢大事需要回顧呢？ 諗唔到呢！ 今年自己其實真係覺得過得好快，感覺好似剛剛過完新年無耐，而家話咁快又已經到咗年尾，究竟呢一年做過啲乜呢？ 今年同上年差唔多，一樣無得去旅行；一樣無得除罩；一樣無得通關…….. 不過有啲嘢係多咗，就係要用安心出行，嘟入食肆，政府地方……. 有多就會有少，少咗蘋果日報，年尾仲少埋立場新聞，其實仲有好多團體都消失咗。 社會上有好多變化，但呢啲改變有人接受到，有人接受唔到，一樣米養百樣人，多元化嘅社會，當然會有唔同嘅聲音、意見。 當然自己個人唔多唔少都有啲嘢變咗或者將會改變。 變咗嘅有 (回顧) 歲數，大咗一歲，哈哈哈 公司搬咗 office，搬咗去一個更大更舒適嘅環境 終於打咗 BioTech BNO Visa 批咗，可以走佬去英國 將會變嘅有 (展望) 希望去到英國我哋一家可以快快適應，快快租到屋，快快搵到份絕世好工，亞女們快快搵到間好學校入讀，一切順順利利。 一切重新開始，要學會放低，放下身段，去學習當地人嘅生活方式，去融入當地，學做一個本地人。 雖然我會離開公司，離開我嘅工作，但我都希望公司會愈做愈大，愈來愈賺錢，可以快快賣盤賣到個好價錢。 當然最重要嘅係一家人都身體健康。
話說星期六晚老豆突然氣喘透唔到氣，屋企人送佢去睇急症。而我十一點零過去，搞到成零晨四點幾先返屋企瞓覺。係入房前見到部電腦有張紙寫住晚安。原來係蘇菲寫咗張紙仔同我講晚安，真係 sweet 到爆。 圖片取材自 https://www.facebook.com/窩心時光-Warm-Heart-100754762048475/
亞囡識得感謝我，真感動。希望佢會明白要努力過後才會有收穫呢個道理。不過我又想佢明白，努力過後未必一定有收穫嘅道理，凡事唔好因為想有報酬先做喎。好似好矛盾，點解釋畀佢知呢？ 圖片取材自 www.chuenyuen2.edu.hk (學生 寗嘉茜作品)
和合石火葬場，N咁多年無嚟過。估唔到今次嚟到，感覺煥然一新，新裝修過，好有時代感。講得再好啲，豪宅都係咁嘅氣派。 我哋可以係呢度送媽子最後一程，感覺都輕鬆啲。希望媽子都會覺得呢度環境好，設施好，走都走得安樂，安心。 今日終於都流下男兒淚，係瞻仰遺容嘅時候，真係會諗返好多細個嘅嘢，媽子您點打我，點鬧我，又點愛錫我，好多好多回憶，而最後深感內疚嘅係自己無同您出過國旅行，亦原來無乜點影合照，亦無好好咁孝順您，以前仲成日激您，真係好對唔住。不過我諗您都唔會嬲我嘅，因為您係我媽子，我係您個仔嘛。媽子，我會儘量多啲返屋企搵老豆食飯飲茶㗎啦！您放心啦！ 7-Oct-2017 自 圖片取材自 m.21zx.net
媽子，今日好多人嚟咗送您最後一程，證明您人緣好好呀，您啲仔仔女女，孫仔，孫女，外孫仔，外孫女都嚟晒，福氣，福氣。您唔駛掛心，個個都會生性，個個都會孝順，個個都會睇住老豆，照顧好老豆。您就去玩下，輕鬆下，鍾意去邊玩就去邊啦! 聽日就送您上山，一路好走!! 6-Oct-2017
今年真係唔好意思，無得同你大慶祝，亦陪唔到妳， 明年補返。 圖片取材自 www.indiatoday.in
一直都覺得自己係好硬淨。一直都覺得自己可以頂得住。一直都覺得自己可以淡然面對。但原來當真係出現要面對事實嘅時候，真係令人好難受。雖然之前已經預咗，但當到嚟嘅時候，無論你點硬淨，點講自己可以頂得住，之前點諗乜嘢淡然面對，到嚟嘅時候真係。。。。2017年9月17日，下午2：45分。媽媽，一路好走! 永遠懷念妳!! 圖片取材自 https://www.pinterest.com/panhaemmanuel/rip-images/
