講到落地第一份工就當然係幫一間香港人嘅食品廠公司做 IT 服務啦。 之前講過係波友介紹我去做，不過始終係一份 freelance job，收入真係唔夠支撐每個月嘅支出，一直都好乖乖咁去搵工網站不停咁申請工作。 半年嚟都見過十份，可惜，全軍覆沒。 得返嚟嘅 feedback 係話我之前都係做 manager，而家轉返做工程師，要落手做就未必適合我，加埋佢哋希望係請一個有 hands on 經驗嘅人，所以每次去完 second in 之後都落敗。
都搵咗半年有多，係時候需要去轉換一下跑道。 其實之前都間唔時有 apply 一啲倉務員工作，但係唔知點解會無回音。 今次 apply 揸車送貨，第二日就有回音。 呢份工，公司包咗架貨 van 畀你，你每日準時去拎車，上貨，送貨，送晒之後就還返架車，油錢都係公司出。 睇過其他類似嘅工，好多都話要自己租架車，當然有任何損壞，油錢都係自己出。我覺得呢間公司出晒所有嘢都唔錯，最緊要唔複雜。
收到通知要去做 interview，但其實唔係，根本就係一個簡介會。 份工原來係 amazon 外判工，即係每日揸住架 amazon 貨車去送貨。 睇完簡介，做埋驗身，Sorry，應該係酒精測試，藥物測試，通過咗之後就要上兩堂 training， 又估唔到做揸車送貨都要培訓。 第一日 (30-July-2023 )上午就係不停咁睇 movie，講解工作流程，工作會遇到嘅問題，可以點解決。 然後就係有啲小問題考下你，睇下你識唔識。 下午就去 amazon 個倉度，教你點執好啲貨上車，啲袋點樣放入架車度，由入車泊入停車場都有講究，再教埋你去邊度拎返自己當日要送嘅貨，所有流程再講解一次。 第一日就係咁。 不過導師話第二日會有考試，你要合格先可以正式上班。 題外話，今日去到 amazon 個 canteen，真係唔錯，好似一間 cafe 咁，好大，有幾部 coffee 機畀你飲任，如果要食嘢就自己畀錢撳機。 另外佢仲提供埋大電視，桌球枱畀你篤波，仲有乒乓球畀你打添，感覺都好正。
第二日上堂，真係全日坐係課室聽 trainer 講多次流程，但係今次就講得好仔細，每個步驟，每個要注意嘅地方，都清清楚楚咁講清講楚。 例如，落車送貨一定要鎖門，關好窗；啲貨唔可以放喺司機位隔離；又唔好立亂將啲貨就咁放喺門口，要搵個隱蔽嘅地方收好；教點用 we miss you card；撳鐘無人應就要 call 客，問佢應該將啲貨放邊…… 然後就係考試，25 題題目，只可錯 5 題。 大家都好快手就做晒，然後就企出課室門口等消息。 Trainer 會派一袋嘢畀成功嘅考生，仲會寫埋你答啱咗幾多題。 好彩，我係全對，個袋裡面就有啲 we miss you card 嘅紙，仲有將出入 amazon 嘅員工證，同埋一張流程表畀你，等你開工時可以參考返個流程應該點派貨。 當晚就收到公司講，可以休息一日，星期四先開工。 公司將我 add 咗入去一個派貨 group，裡面每日會有更新，通知大家第二日幾點集合，你負責揸嗰架車嘅資料。
第三日其實都未正式叫上班，因為始終係新仔，佢會指派咗一個前輩畀你，你跟佢車開工。 我跟咗一個做咗六個月左右嘅司機大哥，佢好好人，乜都話 relax，take it easy。 一開工，當然幫手去返指地嘅地方拎啲貨上車再排好啦。 搞好晒就開車出發，大哥就一直解釋畀我知應該點做，有乜要注意。 而佢話要注意嘅地方同 trainer 所講嘅係唔一樣嘅，哈哈哈！ 佢仲話你要將上堂學嘅嘢全部掉晒佢，跟我方法做。 首先上貨去貨車，個排法已經唔同咗，然後佢話自己一個派貨，一定會將第一個點派嘅貨倒晒喺司機位隔離，因為開車門比較快，下下要去開側門後門好鬼煩。 佢仲要將啲貨放成信封，letter box， polybag，parcel 咁樣，可以放便搵。 點解？ 因為 amazon 個app 係會講明你派嘅單位所收嘅貨係以上乜嘢類型。 你見到 envelop，咁你就只需要去搵 envelop 寫住個單位地址就 ok。 呢啲就係叫做經驗啦！ 另一樣嘢就派貨畀客， trainer 係話要撳門鐘，無人應就要撳 app 嘅 help 去搵客，現實係就咁放係門口，撳返個 app 話交咗畀人就 ok。 天呀！ 點解相差咁遠，司機大哥話你真係跟佢流程，夜晚十點你都返唔到屋企。 咁有乜嘢時候係要通知客，無，根本唔會通知客，一 miss 咗就撳 app 話改為第二日先再送，將件貨 return 返貨倉。 今日因為有我呢個 trainee，所以唔算多貨，司機大哥話如果咁嘅貨量，佢自己一個人派應該五點半左右就可以收工，但係今日我搞到佢七點先收。 點解？ 就係因為中途變咗我揸車。 原來一路揸車一路要睇門牌係咁困難，仲要揸住架棍波車，就變得難上加難。 成日都會 miss 咗間屋，又或者 GPS 指向左，我就變咗去右。 最弊係太耐無揸過棍波車，成日死火，呢個真係好嚴重嘅問題。 而家喺啲路仔死火都仲好啲，無乜車，唔會影響人，但係如果出返大路，一啲繁忙嘅地方，成日死火就好麻煩，會影響到好多嘢，分分鐘出意外。 揸咗半個鐘，派貨速度降低晒，司機大哥都頂唔住出聲話佢揸返，因為派貨都有個進度要追，唔可以派太耐。 就係咁，我又變返做執貨，最後半個鐘，司機大哥仲話等佢一人搞掂，叫我休息下，唔好太緊張。
司機大哥好好，送晒貨之後喺程車度問返我感受，我都好老實同佢講，可能我都未必會繼續落去。 佢畀咗啲意見我，叫我返去沖涼時冷靜咁諗下，唔好太快落決定。 同埋佢話你可以畀多次機會自己，可能今日著住對 safety boots 先會咁，聽日換返平時嘅波鞋會好啲。 最重要佢話，你如果今日就 quit，你過去三日就白費㗎啦，佢講係無人工出，因為公司規定你要出席晒四日 training 先會有人工。 佢話頂埋聽日就可以有人工出，之後先同主管講唔適合做囉。 真係好感激佢。
第四日我照常去到集合地點等出車，但係咁啱主管已經係度，佢問我情況，我唯有照實講。 佢即時畀車匙我，叫我開車畀佢睇，佢坐係隔離，試完之後佢都好老實咁同我講，你嘅情況係唔適合呢份工，開車速度完全唔可以跟得上派貨進度，如果繼續落去都只係浪費你同我嘅時間，佢畀咗個 offer 我，過去三日，佢只係出兩日人工，我而家就可以離開，今日都唔駛返啦。 其實我聽到呢個 offer 我都好驚訝，居然仲有人工出，咁當然我就話 ok 啦！ 就係咁，我嘅 UK 第一份 job 就完滿結束了。
不過佢唔講，我自己都會完成今日工作之後就搵佢講㗎啦。 自己真係唔適合呢份工，有啲嘢唔啱就係唔啱，無得勉強。 唯有繼續努力搵工。
不過講返最窩心嘅係妹梅，我第一日派完貨返嚟，佢問我點樣，我又同佢講咗我成 miss 咗啲地方，又派錯件。 估唔到佢同我講：mistake is good, you can learn from it. 又話我唔好灰心，要努力。 最後一日佢知道我連工都唔駛返時，佢仲留低咗包熊仔餅畀我，感覺就好似安慰我咁。 呢個女真係好識得氹人。
