香港飲啤酒，通常都係出街同朋友食飯先飲，或者去卡拉 ok、酒吧飲多，間唔中一罐半罐就會喺屋企飲。 其實點解會飲啤酒，真係好飲？ 苦，細個時會覺得咁苦，搞乜你哋鍾意飲。大個就會覺得有另一番味道。
成日聽人講外國飲酒好平，當然唔係講啤酒啦，佢哋係講飲威士忌，白蘭地呢啲。 以前睇電視、電影，都會見到好多鬼佬喜歡蒲吧飲啤酒。 香港蘭桂芳都係畀鬼佬飲啤酒，好多人都鍾意放工三五成群去嗰度飲返一兩杯。 以前大家都係叫喜力，生力，嘉士伯，但係好幾年前已經開始有手工精釀啤酒。如果你係劈酒，當然唔會揀呢啲手工啤，價錢太貴，真係劈到你荷包乾硬化呀！ 要劈酒大家都會搵返啲平價啤酒，好似 Budweiser、Asahi、藍妹呢類。 本身喺香港以前都會買麒麟 KIRIN、札幌 Sapporo，後尾就買德國 ERDINGER 黑啤。 人真係會隨住年紀大而鍾意飲黑啤，Erdinger 黑啤就係我最喜歡嗰隻。
香港以前飲都係上面所講，同朋友去食飯，去卡拉OK 先會飲。 再唔係就係因為自己做到身水身汗，坐低飲杯啤酒解解熱，或者係沖好晒涼，坐低嘆冷氣飲啤酒嘆下。 如果唔係都無乜理由會無啦啦走去開罐啤酒。 汽水係咪都可以？ 係㗎，不過啤酒好似爽好多。
嚟到英國，啤酒會唔會平過香港呢？開頭屋企都無放啤酒，因為都未知邊啲牌子好飲。 就算買，都係買返啲熟悉嘅牌子，穩陣吖嘛！ 但係自從上次同朋友去咗 Brighton 一間海邊餐廳飲過一隻叫做 Offshore Pilsner 嘅啤酒之後，就覺得呢隻嘢真係幾好味。 唔太苦，有少少果味，口感有啲厚 (好似講緊紅酒咁嘅)，清清哋幾好飲，連老婆都讚好。
返屋企上 amazon fresh 度訂咗 12 罐返嚟。 諗住點都可以應付到兩三個月，點知一個月都無就清晒，之後想再訂都訂唔到。 搞乜又會飲得咁快呢？ 可能我哋嚟到英國嘅時候都熱，加埋成日都食埋啲熱氣嘢，好想飲啤酒嚟下火。 不知不覺每餐都開罐嚟飲，就咁飲晒 12 罐。 上網買唔到點算，平時啲超級市場又無呢隻牌子喎。 其實你想搵 Pilsner 真係唔係咁易，我行過好多間超市，佢哋都係得嘉士伯 Pilsner、GROLSCH Pilsner、AMSTER Pilsner 三、四隻牌子，唔明點解無 Offshore Pilsner。 算，其他牌子都殺，乜都要試下。
嘉士伯 Pilsner — 真係好嘉士伯 feel。 唔好問係乜嘢味道，你一飲就覺得係嘉士伯，可能盲測都會分得到個味道出嚟。 唔太似 Pilsner 嘅味道。 OUT~~~~
Grolsch Pilsner— 淡，無乜果味，唔似啤酒。 OUT~~~~
Sharp’s Brewery 出品嘅 Offshore Pilsner 真係咁多隻之中最討好。 我都明白無可能其他牌子嘅 Pilsner 會同 Offshore 一樣嘅。 不過都想搵到隻可以經常喺超市就入到貨嘅啤酒，唔駛下下去網店訂， 次次都要訂 24 罐 (Total: £36.99) 先免運費。
其實除咗飲過 Pilsner 之外，都飲過其他牌子嘅啤酒，好似 Cools、Carling、Goose Island IPA…… 都無乜太大驚喜。
Cools — 淡味道，感覺似韓國啤酒咁，唔係咁重啤酒味。
Carling — 屬於淡同苦之間，又唔算淡，又唔算苦，易入口，唔錯。
Goose Island IPA — 屬於苦嘅味道，有少少苦澀，我覺得有啲似生力啤。
呢度真係好多啤酒，要試晒都唔係咁容易，希望遲下可以搵到一隻更加正嘅啤酒。
近日英國受到熱浪侵襲，令到屋企嘅啤酒更加去得快。 真係要快啲搵隻可以替代 Offshore Pilsner 先得。 你見到呢隻嘢唔平，唯起上嚟要成 HK$15 罐，都係要搵啲平價版先得，咁飲落去會破產。
大家如果有興趣訂 Offshore Pilsner 啤酒， 可以去以下官網訂購。(我無佣分㗎)
https://www.sharpsbrewery.co.uk/
封面圖片取材自 square44.com