香港街邊泊車好簡單，只要有咪錶位你就可以泊，最近一兩年仲可以用 App 畀錢，唔駛差唔多夠鐘嘅時候要跑返去入錶。不過香港最難係搵錶位，熱門地方分分鐘要等成 30 分鐘先可以等到位，唔好彩，運氣唔好嘅話，等一個鐘先有位都有可能。 香港錶位分咗私家車，電單車位，貨車位。錶位就分別有 30 分鐘、1 個鐘、2 個鐘。你可能會問，咁你點知邊啲位係幾多個鐘？ 好簡單，你見咪錶柱位顏色就分到。 30 分鐘係黃色、1 個鐘係啡色、2 個鐘係藍色。
英國就比較複雜，可能我仲未習慣，所以暫時對我嚟講真係有啲煩。成日都要望清楚，跟住要諗一諗，究竟我可唔可喺呢度泊車嘅呢？ 有時你泊低架車先見到原來啲泊位只限有 Permit 嘅住戶先可以泊，你又要上返車再搵泊車位。
英國每條街都有好多泊車位，但唔係個個泊車位都可以畀你泊。你要望清楚個指示牌，究竟呢度只限住戶泊，定係可以入錢泊車，定或係 free parking 呢？ 就算限住戶泊，但又有可能某啲時段又可以畀其他人泊喎。你真係要望清楚個牌寫乜嘢。 而泊車位都有劃分 Disable 人士車輛，唔好泊錯位，一泊錯又係會罰錢。 而且你唔好以為 free parking 嘅地方可以任你泊幾耐喎，佢會寫明只限 30mins，或者 2 個鐘，過咗時佢又係會畀告票你。仲有，呢啲 free parking 都會講明你泊咗一次之後，唔可以喺幾多個鐘內再返嚟泊，避免你長期佔用車位。 泊車位置都有講究，唔係就咁泊低走人，要跟指示做 – 泊晒成架車上行人路、騎半架車上行人路、就咁泊路邊就 ok，睇清楚嚟泊。
咁你泊咗喺住戶嘅泊車位會點？ 過咗時限唔記得入錶又點？ 其實呢度同香港一樣，抄牌囉。我見過有咖啡仔周圍巡，睇下邊度有違例泊車，假如你唔好彩畀人捉到，你就會見到擋風玻璃多咗樣嘢，呢樣嘢咪就係告票囉。不過呢度好得意，就係如果你收到告票之後，14 天內繳交罰款可以有 50% discount，所以如果自己真係錯咗，就拿拿聲去交罰款啦。
至於點樣畀錢泊車？ 同香港差唔多，不過佢就唔係每兩個位就有一個咪錶。 呢度就會有一部 Pay Machine，你可以用 coins或者信用咭畀錢，先揀好泊幾多個鐘，然後入錢/credit/debit card，再拎返張飛仔去車頭當眼位置放好就得。當然呢度唔會咁 out，一定要你去部機度畀錢泊車啦。 唔同地方有唔同 Apps 可以用，例如 RingGo，PaybyPhone 都係用嚟畀泊車錢。 開咗個 App，然後揀返你泊車嗰個 Pay Machine Number，入返車牌，再揀泊幾多個鐘，畀錢搞掂。
有啲私人停車場，你哋可能入閘前要拎 ticket，出閘前就去 Pay Machine 度畀咗錢先再出閘。有啲停車場就係你入閘時乜都唔駛做，佢哋個停車場已經 scan 咗你個車牌，走嘅時候去 Pay Machine 度輸入返自己車牌畀錢出閘。
不過有啲停車場係可以畀人先泊車後繳費，當然唔係講你泊低咗架車，臨出閘先繳費呢隻先泊後繳費啦。 講緊嘅係，你真係揸走架車，當晚 12:00 前去指定網站，輸入返車牌，泊車時間，邊個停車場，畀錢就 OK。不過聽聞好似有少少附加費用。 但係我就唔多建議大家咁做。如果你份人成日都好無記性，萬一返到屋企真係唔記得咗繳費，咁…… £100 嘅罰款就等緊你去繳交，仲貴過你泊車錢呀！
大家都話香港泊車貴，錶位最平最經濟。千祈唔好以為英國咁大，實有好多足夠位置畀人泊車，泊車費一定好平。 大家咁諗就錯晒啦，呢度地方係大，但係停車費其實無想象中咁平。我有次去 Brighton，錶位泊一個鐘要成 £4.5，真係好肉赤。
最後提下大家，通常都可以試下先搵附近有無啲超級市場，因為超級市場通常都會有 90 分鐘至 4 個鐘嘅免費泊車時間。如果你想去嘅地方附近咁啱又有超級市場，你知道點做啦！
封面圖片取材自 times-series.co.uk
