Skip to content

Category: 談天說地

攰..體力透支

唔知係咪近排經歷太多唔好嘅事,尤其經過媽子過身,婆婆做完手術後有啲影響要再入院,依家蘇菲又因為肚痛而要入院,太多太多唔好嘅事發生,真係會變得情緒低落。 之前好多工作,幾煩嘅人同事,都唔會令我感覺煩,令我感覺痛,再煩嘅工作,只要努力,總會出現曙光,總有希望。 但原來家人嘅身體出現問題,就算自己幾努力,睇幾多資料,都係無用。只有搵醫生,等醫生嘅診斷,好無力,好無助。而且醫生有時都未必幫到你,但係你唔靠佢,仲可以靠邊個?親人嘅離世,真係好痛。屋企人嘅身體不適,亦會令你痛,呢種痛,真係非筆墨所能形容。 希望婆婆同蘇菲快啲好返,返嚟屋企,大家開開心心過生活。 圖片取材自 62icon.com (by CHAMPION)

投訴?

已經係第二次收到呢啲咁嘅信,對上一次話黑玻璃,今次就加裝 LED. 究竟係差佬投訴定有無聊人投訴呢?仲要係早上喎,我點會開 LED 呢。。 圖片取材自 www.genplus.com.tw

感動…的一個 Video

感動。。。呢個係一個讀緊書嘅學生作品, 佢最先 Send 比 Adidas 睇, 但係 Adidas 無睬佢… 然後就上傳咗嚟 youtube, 故事發展當然係…… 大收旺場

地鐵扒手

呢件係真人真事,大家搭地鐵要小心啲。唔好話我歧視南亞裔人(可能係其他種族),但係真係要特別小心。 話說剛剛搭地鐵係觀塘返長沙灣,係太子轉車,準備上車時,突然有幾個南亞裔人迫我入車廂,往時可能我都會照迫入,但係今日唔知做乜,用咗好厭惡嘅眼神怒睥其中一個,然後我用力往後退,讓佢上車先,居然佢仲笑笑口咁用動作話借個位比我企入去,我只係怒睥佢一眼,然後轉咗去下一度車門上車。 架車出發無耐,突然頭先想上車度門嗰邊傳嚟一聲, P O L I C E。然後見到四周人群往左右兩邊退,一個自稱 Police 嘅人,同兩個南亞裔人士發生激鬥,仲大叫市民幫手捉住嗰兩個南亞裔人士,話佢哋係車廂偷竊,而我見之前比我怒睥條友,“嘭嘭聲”咁走咗去車尾嗰卡方向,就咁掉低咗兩個“戰友”(我估計係同黨). 而激鬥中嘅差佬,就得到仗義幫助嘅市民協助,合力將兩個小偷捉拿上鎖。 大家搭地鐵時真係要小心啲,好彩今次我無迫上車,如果唔係可能我就會無咗個銀包;又好彩今次有差佬,目標市民無任何損失。總之記住,小心!!! 圖片取材自 gaus.ee

玩遊戲

今日同蘇菲玩配對,順便教佢認字。本身係一件好沉悶嘅事,但我呢個老豆就為咗提高呢個遊戲嘅樂趣,我就話,不如邊個搵到啱一對嘅就可以啜對方一啖。呵呵呵~~~ 我當然發揮年青時讀書嘅本色啦,次次都搵唔到,又或者搵錯咗,等蘇菲可以認叻叻之餘,又可以認多啲字,我又可以比亞囡“抽水”。 真係爽 圖片取材自 sidonie.ca

廢除[email protected]教育局

其實香港的教育局想做什麼?吳克儉真係無事搵事做。有TSA給他去檢討,他不去想怎樣改善,反而走去迫人學簡體字。究竟他知不知道那樣比較重要。 講真,我以前讀書都無學過簡體字,只是返大陸時見過。到出來社會工作,需要面對簡體字,自然會自己去學。 小學,中學已經有普通話堂,而家很多小朋友,很多時在家裡都會突然講幾句普通話,其實普通話已經深入很多小朋友腦中,分分鐘將來香港真的變成普通話是母語。其實洗腦教育已經慢慢滲出來了。 而家重要強迫學習簡體字,不難想像將來的香港。而現在推簡體字,係教育上點配合?學生作答是否可以寫簡體字? 什麼與國際接軌。那學生又是否可以用 emoji 來作答?國際接軌嘛。我是否又可以寫u=you?國際接軌嘛。我看不見什麼國際接軌,只看到與大陸接軌而已。 不知不覺寫了那麼多,著實氣憤。社會民生已經多問題,為何連教育也要搞得一團糟,應理不去理,不應理的就去理。麻煩不找你,你卻去找麻煩。難道在位者都只能say yes?教育局的其他官員難道只能聽命,唯命是從?為何朝中沒人出聲? 自問讀書不多,但從出生以來就是學繁體,說廣東話,英國管治期間,也沒有說繁體,廣東話不是母語,為何現在教育局網頁卻說廣東話是地方方言。天呀!究竟教育局還有什麼計劃會再推,什麼方案出現,什麼。。。。。已經沒有什麼了。因為你已經不知繁體字怎麼寫,你的母語已經不再是廣東話,什麼都沒有保留下來,已經沒有什麼了。。。。 圖片取材自 立場新聞

蘇菲笑話一則

坐車去迪士尼途中,蘇菲係架車度瞓著咗。但係一入到樂園就即刻醒神晒。但係落車之際。。。。蘇菲:呢隻腳有閃閃(即刻脫鞋)我:隻腳底有嘢?摔腳底,掃腳,著返鞋。蘇菲:隻腳仲有呀,仲有閃電呀!(又再脫鞋)我:邊有呀,掃咗腳底來回幾次,再用眼逐吋咁睇確認無嘢,然後話無啦蘇菲:有呀,閃電閃電呀!我:你係想話腳痺呀嘛?落地行一陣就無事㗎啦! 呢啲唔係閃電,係腳痺,知道嘛

繁體字

老老實實,有D人明明學嘅係繁體字,話撐繁體粵語,但有時又會走去寫簡體,如果係工作需要無問題,但facebook, line等通訊,都有時寫簡體,咁究竟係撐定唔撐?講真,呢年我開始都已經唔寫簡體了,唔想繁體失傳。

怪事香港地

呢個香港地, 真係愈來愈多怪事….有人冒認中聯辦騙財, 居然又有人會上當.有人冒認煤氣公司上門檢查, 又有人中招, 比人偷竊,有人冒認郵差上門派件, 又有人比佢抄晒D個人資料,有人冒認速遞送紅酒, 又有人居然簽收, 然後比人追收錢, 有人冒認順豐速遞公司, 又有人相信自己涉及運毒, 假證等事情, 比人騙財.有人喺Line度叫人買點數咭, 又有人真係走去買, 騙財幾百至幾千元,其實, 香港人, 係咪真係咁蠢, 咁易呃?  定係真係飲得多鉛水, 所以智力受損而一時傻了?   圖片取材自 topick.hket.com