Skip to content

Hit & Run (俢復篇)

上次講到搵到間 Door to Door 嘅汽車維修公司幫沙沙妹修復返個傷口,格完價最平係呢間,就同撞到我條友講幾錢,佢都好爽快就過咗數畀我。 而我亦同師傅約時間整車,點知原來呢啲 Door to Door 服務係要你有一個好大嘅 Drive way 畀佢。 大佬,我邊有一個大 Drive way 呢? 影咗屋企後面條路畀佢睇,佢話太窄,唔夠空間整,跟手就話 cancel order。 我即刻話可以搵個地方畀佢整,唔好 cancel。 幾時都話出外靠朋友,腦海中出現波友間屋,佢屋前就有一個 Drive way,而波友亦好好人肯借出地方。 好啦,千辛萬苦終於約實師傅上門整,點知佢嚟到睇一睇,打開車頭蓋睇一輪,跟住就同我講佢整唔到,因為我架車係 Hybrid 車。 我黑人問號? 我叫你修復返個車尾板位置凹痕啫,關電池乜事? 佢講咗一大輪嘢就話 Hybrid 車有電池,佢整車時有可能會郁到電池線路,佢擔心會有問題,所以就話叫我返原廠去整,跟手就走咗。 我點解咁容易畀佢走? 咪玩啦,你同佢嘈咩! 佢根本就唔想整,萬一你同佢講無事,唔會整到電池嘅。 佢一覺唔覺意,唔老黎,佢真係整瓜你部車,到時仲大鑊,咁你到時嘈佢定自己再畀錢出嚟返原廠整? 既然佢一嚟就表現到唔想整,無謂勉強人。

好啦,搵過另一間囉。 好彩又咁啱之前又有一間 ( Axioma ) 報咗價,價錢仲平過呢間,咁我就再同呢間 confirm 啦! 過咗兩日,有個師傅打嚟同我約時間,又要麻煩波友借地方畀我。 好嘞,到咗嗰日 (6-July-2022),等等等,師傅遲咗兩個鐘先嚟到,話今日整唔到。 我心屌咗一聲,乜事呀! 原來佢話我未去畀 Deposit …… 唔係嘛! 我話乜嘢 deposit,原來佢哋有 send SMS 畀我,裡面有條 link 畀我去畀錢。 師傅話一定要我畀咗錢先可以開工,仲話而家同佢約實下星期邊日,佢返去更改 system 個 service 日期再 send 條 link 畀我。 暈 ~~~~

不過既然師傅一場嚟到,我捉住咗佢叫佢睇清楚沙沙妹個傷口,個傷口位置係咪可以整,會唔會因為 Hybrid 車驚整唔到。 師傅話絕對唔會,無問題,再 show 咗之前啲整車相我睇,話個位置同你差唔多,一樣整到,仲讚自己整得好靚。 我問佢其實係咪一定要我畀錢先可以開工整,我話反正你都嚟咗,其實我可以而家透過條 link 去畀錢,你咪可以開工囉,佢話唔得,要係之前一日 pay 咗先可以, 而家佢一定要返去更改個 service 日期,我先可以再畀錢。 英國人有時真係好守規矩,唔會有靈活變通,佢又咁堅持。

好啦,唯有等佢第二日再 send SMS 嚟,畀好錢,再打畀佢 confirm 日期時間。 經過重重難關,又要再麻煩波友,真係自己都唔好意思。 終於等到佢嚟整,搞咗兩個鐘,又揼又拉,又磨又噴,沙沙妹終於變返靚靚女女啦! 話時話,喺修復過程,見到師傅唔戴口罩就磨灰水,又噴油,仲要擘大口咁樣,吸晒入心入肺,見到都覺得驚驚。 最後師傅話仲要做 Polishing 工序先得,但係要再約時間,因為都要等啲油徹底乾透。 唔知係我黑仔定佢黑仔,第二日師傅架車入咗廠維修個 brake,跟住又話工作太忙嚟唔到,要搞到第三日佢先過到嚟我屋企做埋 polishing 工序。 我幾驚佢係借頭借路話唔唔嚟整,一直拖我就弊傢伙。

磨返平,再補灰
跟手照燈,之後就可以噴油
磨洃,噴油都唔駛戴口罩
噴好油,再噴光漆油,閃令令

其實我有問師傅,如果下次有呢啲 case,想直接聯絡佢得唔得,點知佢話唔得,你一定要經返個 agent 網頁落單,但可以註明要搵返上次個師傅。 我又問,你無自己公司咩? 你用自己公司接單唔得咩? 咁咪唔駛經 agent 公司畀佢賺一筆,可以自己賺晒。 點知佢話你係經 agent 網站搵佢,一定要經返 agent 搵佢。 暈,英國人真係好守規矩。

Anyway,師傅手勢真係幾好,修復完成後如果唔太留意都唔覺真係撞凹過,始終都唔係原裝,點都會有少許分別,真係要好留心先覺,希望呢種即日式修復方式日後唔會出現甩油情況啦。

做埋拋光,靚晒

封面圖片取材自 Storyblocks.com

Published in談天說地

Be First to Comment

Leave a Reply

This site uses Akismet to reduce spam. Learn how your comment data is processed.