上次先講完搵 Royal Mail 份聖誕臨時工失敗咗。 話咁快今次又再去搵工，不過今次係波友介紹。 波友真係唔話得，知道我喺香港做開 IT Outsourcing，咁啱佢公司想搵人搞好公司網絡，又咁啱之前佢哋搵嗰個 IT 人突然失踪，所以波友就問我有無興趣去傾下。 既然係做返老本行，當然話無問題啦！ 波友話遲啲再聯絡我。
等咗個幾星期，自己都差啲唔記得咗件事，突然收到波友 message 話叫我打畀佢老闆娘傾下。 當然無問題，即打。 [ 謎之聲音: 吓？ 你英文得唔得㗎？ 之前你有無練習下點講㗎？] 大家放心，老闆娘其實識講廣東話㗎！ 其實之前都有諗過究竟要點介紹自己，所以打去同老闆娘傾都傾得唔錯，佢知道我做開呢方面嘅工作，而且仲有咁多年經驗，電話裡面感覺佢都應該覺得我 ok。 不過最令我頭痛係佢問我點收費，呢方面我真係唔知，所以只好照直同佢講我要先了解一下英國嘅 IT Outsourcing 係點收費，之後再報畀佢。 不過上網搵咗一大輪，真係搵唔到，全部都係要 call 啲公司去報價。 點報好呢？
因為報唔到，但又約咗客去佢哋 office 見面，順便睇下佢哋嘅網絡環境，電腦情況。 我始終覺得見面係最好嘅溝通方式，所以事前我又準備咗一啲以前工作嘅文件，以前公司嘅背景介紹。 到見面嘅時候，我再聽埋個客想點，公司方面有乜問題等等…… 其實個客要求都唔係太高，佢嘅要求都係一啲好基本 office 嘅嘢，例如集中式文件管理，文件分享權限問題，心目中大致都有方案。 諗住差唔多傾完，點知老闆返咗嚟，又坐埋嚟講下，又傾多咗成半個鐘有多。 最後入直路，就係收費問題。 我話我初嚟步到，真係唔知點收，所以想問佢哋拎之前個 IT 人嘅收費作為參考。 因為如果跟我香港公司嘅收費就要成 £800，個客一聽就話咁貴嘅。 咁佢哋話之前個 IT 人唔係月費形式，都係逐次收費。 但係我話我唔做逐次，因為到你搵我嘅時候，電腦可能係有大問題。 咁樣嘅話我覺得處理事情會比較慢，因為我根本唔知你哋嘅電腦環境。 我堅持都係要有個每月最低消費，就算你哋無事，我都會過嚟睇下啲電腦，檢查一下網絡環境。 客戶最後明白我係有心想做好件事，而唔係求求其其，我又見佢哋咁明白，所以最後我用返之前 IT 人嗰個每小時價錢嚟收費，但就會變成月費形式，每月會提供 最少 4 小時上門服務，用多咗咪每小時 on top 加上去囉！ 本身諗住要等個客再諗諗，點知佢哋一口答應，仲問我幾時方便過嚟幫佢哋搞掂啲嘢。 咁係咪即係成功？ Yeah~~~~ 成功了。
如果我再搵得到多十個八個客，咁樣我就真係可以做返本行，唔駛出去打工， 唔知有無可能呢？ 你哋可能又會問，你又會去搵工作，咁你點去幫呢個客繼續做呢？ 放心，個客真係好好人，佢哋話星期六佢哋都開工，所以將來我有份正職，佢哋都可以等我星期六先過去幫佢哋 fix 電腦問題。 你話咁好嘅客邊度搵。