今日係新春之後o既第一日全面上班. 本來都開開心心, 但係點知食食下早餐, 突然有個客打電話o黎, 話部 Server Down o左!! 嘩, 真係衰, 第一日返工就 Down Server, 咁唯有拿拿聲食埋個早餐, 跟手就去個客度, 本來都以為好快可以搞掂, 點知去到搞o左成兩三粒鐘到下午兩點, 終於確定死因, 要 call HP 上o黎更換零件!!
諗住可以走人出返去食飯, 然後返公司, 點知o個頭想走人, 呢頭就比人叫返轉頭, 話上唔到網, 收唔到電郵, 又話部新電腦用唔到個 application, 個 Microsoft Outlook 睇唔到o的舊 mail….. 唉!! 卒之將所有問題搞掂之後, 都已經係晚上七點了! 今日除o左食o左個早餐, 之後就乜都無食過, 餓o左成大半日, 所以一放工, 即刻返屋企煮飯食!!
你梗係會問, 點解唔係街食? 仲要返屋企自已煮?? 其實咪就係屋企個雪櫃有o的隔夜飯餸, 我唔想o徙囉!! 返到屋企都已經成九點, 即刻乜都唔做, 直奔入廚房, 將o的飯呀, 菜呀, 拎晒出o黎, 然後開鑊, 不消十五分鐘, 一碗美味o既炒飯就出現o左了!! 哈哈, 美男廚房, 好食到唔駛講啦!
食飽之後, 飲返啖清涼o既飲料, 真係一生一大樂事!! 殊不知, 當我拎起隻最心愛o既羊咩咩
時~~~~~ 哎呀, 隻耳仔斷開o左!!
唉~ 新年之後, 點解都係咁黑仔o架?
咦? 唔係喎!! 唔通個杯同我擋o左o的黑氣? 嗯~~ 有可能, 有可能! 我相信明天會更好!!
圖片取材自 www.cetaphysics.com