五日四夜嘅旅程喺一個充滿歡樂嘅心情下結束，唯一唔係咁覺得滿意就係間五百年嘅酒店無冷氣囉。 不過都係一個體驗，亦教識咗我以後 book 酒店，真係要睇埋有無冷氣，真係無諗過原來酒店都可以無冷氣㗎嘛！
成個旅程真係一種新體驗，雖然自己已經叫住咗喺英國半年，但係咁樣揸車去旅遊真係覺得好得意。 可能香港真係無乜可能咁揸車去另一個地方住幾日嘅本地遊，但呢度你就可以。 我成日話香港你叫我去長洲住我就 ok，你叫我去香港島或者迪士尼住返一晚半晚，我總係覺得嘥錢，明明一個鐘車程就返到屋企，搞乜要大包小包咁執好晒行李去住酒店，到而家都係諗唔明。 反而呢度你揸兩個鐘，去到另一個城市，你真係需要過夜。 因為每個城市都有唔同遊樂設施，有唔同嘅景點，有唔同嘅歷史畀大家去認識一下。 就好似 Tudor House 同 Solent Sky 咁，妹梅可能未必會記得，但係蘇菲一定會記得 Tudor House 係點樣形成，修咸頓原本係飛機製造城市，呢啲活動教學會令佢印象深刻好多。 另外呢度嘅樂園又大又多嘢玩，你玩完一日返屋企嘅話，第二日又要晨咁早起身過嚟，油錢同時間都嘥，細路又無精神，分分鐘得不償失。
呢次行程主題係樂園 + 熱氣球，樂園方面我覺得做得唔錯，佢有劃分唔同嘅區域，大部分係畀小朋友玩，但係亦有一部分係畀大朋友玩。 咁樣一家人嚟嘅話，大小朋友都可以玩下，唔會話就晒邊一個。 成個樂園都好色彩繽紛，一入嚟就會開心晒。 不過樂園主題都係 Peppa Pig， 即係大部分遊戲設施都係畀小朋友玩，所以好多時啲遊戲都係咁上下，坐火車、坐船、坐馬車、坐…… 總之乜都差唔多，只係個外形轉換咗唔同造形咁解。 不過對於一個五六歲以下嘅小朋友嚟講，呢啲已經相當好玩。 不過呢個樂園就無巡遊，亦無公仔會喺街度走嚟走去同你打招呼影相，不過勝在呢個樂園真係唔多駛排隊玩遊戲，最多嗰次都係排半個鐘左右，其他都係 10 分鐘左右就到你玩，唔駛排個幾兩個鐘先玩到遊戲，究竟我係嚟玩排隊遊戲定玩機動遊戲？ 同迪士尼或者環球影城比嘅話，對我嚟講，當然環球影城比較好啦，因為有得睇表演、又有得同公仔影相、又可以睇歌舞劇、又可以有緊張刺激嘅機動遊戲玩。
今次 Bristol 嘅熱氣球相比起台東嗰個真係遜色好多。 呢度熱氣球啲造形都好傳統，就係橢圓形，只係畫上唔同圖案。 相比起台東，真係差好遠。 台東有好多唔同造形，仲要每隔一兩日會推出唔同造形嘅熱氣球嚟吸引唔同人入場睇，所以可以搞成個幾月時間嚟維持入場人數，仲會每晚有唔同節目。 反而呢度就平淡得多，除咗第一晚同第三晚有燈光音樂會之外，其他就係千個氣球升空環節 ( 需要視乎當日天氣而定究竟可唔可以升到喎 )，而其餘時間就係去玩附近嘅機動遊戲，真係唔知究竟係嚟玩嘉年華會遊戲定睇熱氣球。 我個人嚟講比較喜歡台東嗰個熱氣球展，感覺舒服好多，亦無咁重商業味道。
Southampton 同 Bristol 比較，我會喜歡 Bristol 多啲。 Southampton 畀我感覺好淒涼，好孤獨嘅感覺。 好似一個畀人遺棄咗嘅孤兒仔咁，一個人孤伶伶生活，無乜生氣。 雖然佢已經有幾個大型商場，但你入到去都感覺唔到商場有活力。 反而 Bristol 你會覺得佢有城市嘅感覺，某啲地方就有好多藝術氣息，雖然啲道路規劃真係差咗啲，對初初嚟到揸車人士嚟講係好煩，啲迴旋處設計真係有少少問題，你開導航都會出錯路口。 可能我只係短暫停留 Bristol，所以都唔太感覺到啲乜，或者搵日再過去行下，感受一下先。
今次嘅行程，其實都唔錯，可以滿足小朋友，又可以認識每個地方，大小朋友都可以 relax 下，OK 啦！ 大家都困咗喺香港咁耐，日日 zoom，日日戴 mask，而家可以嚟個輕度遊，一家人都好舒服，好開心。 最開心喺呢幾日都好好陽光，好多人都話好難得英國呢個夏天可以咁好天氣，lucky！！