今次旅行, 真係心驚膽跳. 驚嘅唔係肺炎, 驚嘅係去唔到要取消, 驚嘅係要重新計劃過晒啲行程, 驚嘅係申請唔到國際牌, 驚嘅係…….. 實在太多嘢!! 好彩, 最後都順利出發, 亦可以照原定計劃去晒咁多景點.
臨上機前幾日, 都上網做足功課, 睇晒應該要注意乜嘢. 喺飛機艙入面盡量就唔好食飛機餐, 唔好飲機上嘅飲品, 亦唔好亂咁摸. 我哋仲將放係櫈下面嘅背囊用膠袋封好. 掂過乜嘢都好, 都用酒精消毒液搓手先. 不過我哋就無好似其他人咁戴護目鏡, 其實諗諗下都最好戴埋. 有啲人仲提議要著埋一次性雨褸, 一落機就可以除低丟咗去. 咁就可以確保裡面件唔會沾到細菌. 真係好大陣仗.
可能香港人大部份都唔相信大陸/香港政府, 亦唔相信 WHO 嗰個親共嘅譚德塞, 所以香港人一早已經去搶口罩, 搶厠紙, 搶消毒液., 總之乜都搶啦. 而且全香港都進入蒙面時代, 全民戴罩. 反觀去到沖繩, 可能佢哋仲未覺得呢隻武漢肺炎嘅嚴重性, 好多沖繩人或者台灣人都未有戴口罩, 見親戴口罩嘅都係香港人. 之前都諗過去到沖繩, 嗰時仲未有確診或懷疑案例, 我都覺得可以除罩, 但係始終嗰度都有大陸人, 我哋都係戴返罩比較穩陣啲, 除非嗰度乜人都無, 或者係好少好少人我哋先會除罩. 我哋去咗咁多個境點, 大部份時間都戴住罩, 影咗好多口罩相, 都係一個幾得意嘅旅程. 當然, 都有影好多除罩相嘅! 話晒我哋都去好多郊外地區, 大部份都唔算多人.
今次再去沖繩, 除咗去玩, 就係去搵下口罩, 睇下有無口罩可以買到. 買到一兩盒就最好. 不過, 真係無乜可能有, 因為大部份藥妝都已經被人搶購一空, 雖然好多商店都限購, 但係都仍然無貨供應. 每去到一個 mall, 途經藥妝, 我都會去望下, 睇下會唔會有貨. 好彩最後都畀我哋買到啲幼兒口罩畀妹梅, 確保佢有足夠嘅口罩返學去街. 大人口罩最後都可以買到 30 個, 叫做有收穫.
講咗咁耐, 都係講武漢肺炎嘅嘢, 真係灰…. 無辦法啦, 呢次突假遊係因為佢先可以放假去旅行, 唔講佢又可以講邊個. 講開又講, 今次旅行都無同人講過, 其實都擔心會畀人講, 講乜? 咪就係會問你呢個時期做乜去旅行, 學校放假就係叫你哋留喺屋企, 唔好周圍走, 搭飛機又高危, 去到外地又唔知有無傳染, 做乜仲要一家大細走咗去. 其實沿途 post 相去 IG 都已經畀朋友發現, 已經係咁問, 不過我都無理. 一個人太緊張真係會死的, 適時輕鬆下, 抖下, 可以有助放鬆心情, 身體都會健康啲. 何況當時沖繩都仲未有確診個案, 基本上都好安全. 不過正正係呢次旅程, 我發覺蘇哈兩小妹嘅個人衛生意識提高咗, 食嘢前, 食嘢後, 都會自動自覺清潔雙手, 又會自動自覺戴口罩, 雖然有時都會唔記得, 但整體嚟講意識上係提高咗.
沖繩, 成日都聽人講話天氣好唔穩定, 好多時都會落雨. 我哋好好彩, 呢兩次大部份時間都好好天氣. 雖然都係天氣涼涼哋時間去, 無得畀蘇哈佢哋去沙灘遊水, 不過唔緊要, 咁就可以全力去景點遊玩. 又再有藉口留返下次嚟游水. 其實兩次加埋嚟咗 12 日, 我哋都未去晒所有景點, 可能有人會話, 搞乜你哋咁都未去晒, 7 日都應該去得晒啦. 可能我哋行動力實在太慢, 一日有時真係得一個景點, 最多兩個. 而且好多人話呢啲景點唔駛去啦, 又或者去一兩個鐘就行完啦, 不過對我們這一家嚟講, 尤其對兩小妹嚟講, 所有景點都好新鮮, 好好玩, 好有趣. 好似名護菠蘿園, 網上話預一個小時左右就 ok, 但係我哋去咗成 3 個鐘. 就算古宇利島都去咗兩次, 美國村又去咗兩次. 其實有乜咁吸引, 我都唔知, 去到睇下個海, 聽下海浪聲, 見到藍天白雲, 見到個海有唔同深淺色, 完全係一幅好靚嘅圖畫, 好靚, 好靚…. 去旅行就係咁啦, hea 下, 休息下, 放鬆下, 係咪?
話就話去咗兩次, 其實都仲有好多地方未去. 好似沖繩兒童樂園, 沖繩其他嘅公園, 首里城(己經燒咗), 波上宮, 今歸仁城跡, 殘波岬……. 咦, 仲可以去多次喎!! 好多外人覺得唔好玩嘅地方, 我哋都覺得 ok, 最重要喺兩小妹都覺得好玩. 今次去玻璃船, 水中展望塔, 佢哋都好興奮, 對大人嚟講可能好普通, 但係對小朋友嚟講, 係一種好難喺香港體驗得到嘅活動. 名護菠蘿園, 香港可能有類似嘅地方, 但係人在香港, 根本係無可能抽空到去, 日日功課多到爆, 假日家家寧願瞓多過郁, 去旅行對小朋友嚟講係一個好好享受遊玩嘅時間, 同時都係一個學習課外知識嘅機會. 唔好睇少旅行帶嚟嘅好處. 有人話旅行仲辛苦過返工, 可能佢安排行程太過進取, 日日早起身, 好夜先返酒店, 一日走幾個景點, 咁咪好辛苦囉, 去旅行都唔夠 relax, 走馬看花, 都未可以深入感受人哋嘅地方就走咗去另一個景點, 咁又點可以 enjoy 呢? 記住, 同小朋友去旅行係畀佢感受世界, 大人同小朋友一齊去 relax, 享受旅程, 畀小朋友去展現返佢哋嘅童真, 佢哋嘅笑容.
雖然今次成個過程都幾令人擔心, 但都係一種好好嘅體驗. 由開開心心買咗機票開始, 開心租到架平靚正嘅車, 租到間又大又平嘅酒店, 其實過程都好順利. 直至武漢肺炎嘅嚴重程度增加, 一日比一日嚴重, 甚至搞到政府部門都停工, 再見到各大航空公司停飛, 或者縮減航班開始, 我就開始有啲擔心. 驚飛機停飛去唔到, 飛機唔停飛, 日本封香港關都係去唔到. 由運輸署開始停工, 未知復工日, 我就即刻去取消酒店, 取消租車, 以防真係出發唔到. 嗰幾日就好似啲股民咁, 日日咁 mon 住航空公司同運輸署網頁, 留意住最新情況. 直到出發前幾日, 終於見到運輸署有限度復工, 即刻去申請國際車牌, 直至 6 號拎到國際牌喺手, 之後再等多兩日先去 book 車, book 酒店, 成個等待嘅時間都好擔心. 最擔心唔係租車費酒店費會貴咗, 最擔心係臨門一腳飛唔到. 小朋友就最失望…… 好彩, 最後都飛到, 去到一個開心又安全嘅旅行!
係人都知我好鍾意台灣, 我每年都去一次, 其實上網睇, 有啲人一年真係去幾次台灣, 我都未算瘋狂. 而家去咗兩次沖繩, 我覺得沖繩都係一個好好嘅地方, 可以畀一家人遠離繁囂, 享受大自然嘅一個好地方. 第一次嚟嘅時候, 家家講過, 點解呢度咁似台灣嘅…… 可能就係呢個原因, 我都同樣喜愛這個地方! 沖繩, 我會再返嚟!!
租車公司 OTS 租車
評論 : 不時有優惠卷, 好抵. 網頁話自己啲車唔會超過三年使用期, 而且我今次租呢架車嘅 GPS 導航有埋廣東話語音支援, 好正! 不過距離機場有差唔多 10-15 分鐘車程. 拎車還車過程都好快, 15 分鐘就 ok, 而且接待員識講廣東話, 讚!! 記得 6 歲以下小朋友係要租用埋兒童座椅.
Website : https://www.otsinternational.jp/otsrentacar/
Loisir Living Suites Seragaki 瀨良垣
評論 : 間房好大, 好乾淨. 不過每日無樽裝水提供. 房間有 Dyson 風筒, Dyson 吸塵機, 仲有水煲, 煮食用具, 碗碟清潔用品, 應有盡有. 不過佢無免費泊車, 泊車每日收費500日圓, 最多收1500日圓. 大家可以去各大酒店網站查詢價格
Map Code：206 283 831*16
Official Website : https://www.loisir-seragaki.com/tw/
Expedia : https://www.expedia.com.hk/Okinawa-Hotels-Loisir-Living-Suites-Seragaki.h34588862.Hotel-Information
圖片取材自 fit.settour.com.tw