今次突假遊真係嚟得好突然… 由於武漢肺炎, 搞到香港全城瘋搶口罩, 瘋搶厠紙, 瘋搶……. 亦都搞到香港不少公司破例畀員工 home office, 銀行仲將某啲鈼行暫停營業. 個個市民都唔願出街, 唔願外出食飯, 引致好多食肆都結業. 而政府亦呼籲市民避免去人多嘅地方, 而學校都係一個人多嘅地方, 所以教育局亦宣佈所有中小學停課, 停到2月17日. 就係咁, 我哋聽從政府呼籲, 避免去人流多嘅地方, 所以我哋決定離開香港, 去一個比較少人嘅地方 – 沖繩.
就係因為呢個武漢肺炎, 搞到我哋連新年都無街去, 除咗年初一去咗拜年之外, 其他所有團拜都取消. 日日留喺屋企上網, 打機, 睇電影…. 一聽到教育局話延長個假期, 亦響應政府呼籲, 我哋當然即去訂機票, 訂酒店, 規劃行程… 可能2月本身係旅遊淡季, 所以機票, 酒店都好平. 以上年復活節假去沖繩價錢, 5個人就已經要HK$13,000(其實都叫平), 但係而家2月份4個人去, 只係HK$5,500… 酒店就住咗間房間比較大嘅都係HK$700晚, 真係好平!!
就喺 book 晒嘢之後, 相繼收到亞女嘅興趣班嘅通告, 話如果有外遊嘅同學仔就要自我隔離 14 日先好返興趣班, 跟住教育局又再宣佈延長個假期到 3 月. 哎呀, 點解唔可以早啲講呢? 我就 book 去耐少少, 而家得 5 日, 真係太少啦!!!
不過武漢肺炎實在擴散得真係好快… 好多航線都自行停飛中國, 由於香港已經屬於中國, 所以都停飛埋香港. 有啲國家直頭封鎖埋唔畀中國入入境, 有中國武漢人係境內都強行遣返大陸添. 我都好驚日本會唔會有任何變動, 日日走去睇住 HongKong Airline 網站, 睇下會唔會停飛. 頭先講咗呢個武漢肺炎好勁, 估唔到政府都開始延長政府部門嘅假期直至另行通知. 由於新年假期已經 book 晒酒店, book 晒車, book 晒機票, 一聽到政府部門唔開工, 咁我點申請國際車牌呢? 咁樣我要再重新規劃行程, 無車無得去咁遠, 無車無得周圍走, 只能係那霸市閒逛, 又要再重新規劃過. 為咗避免被租車公司同酒店到期收款, 喺免費取消日期前就取消晒所有 booking, 等到最後一刻先決定行程係點.
終於喺2月5日見到運輸處有限度服務, 預約咗申請人可以繼續去辦理證件, 終於等到6號辦理到國際版先安心晒. 即刻返去公司 book 酒店, 租車….. 然後, 就心掛掛咁等航空公司消息, 日日係咁 mon 住, 出發之前嗰一日, 仲喺 FB 見到有人話航空公司 cut 咗班機, 要改搭其他時間, 航空公司網站又顯示話每日得返一班機去沖繩, 搞到我即刻上航空公司問客戶服務員. 天呀, 我由早上 11 點 connect 航空公司個 Live Chat, 居然要等到晚上 8 點先輪候到我, 經過一輪查詢, 客戶服務員話我班機無取消到, 可以如常 8:50分起飛, 頓時安心晒.
咁樣搞一搞, 原本租車只係需要 $968 就可以租到 4 日, 而家就要 HK$1,200 先得, 貴咗二百幾蚊. 好彩酒店度又慳咗 HK$100左右, 所以都算 ok. 初時都好驚會因為太近 book 而畀人殺到一頸血, 好彩最後都無太大差距.
臨出發前一日, 都預備咗好多嘢, 自己都上網睇下其他人上機後唔可以做啲乜嘢. 例如要用膠袋袋住自己嘅背囊, 手袋. 亦唔好食飛機餐, 唔好飲佢哋提供嘅飲品, 全程戴口罩, 有眼鏡就戴埋, 上機消毒一下, 落機後又要清毒一下, 盡量唔好周圍摸… 最後就要教識亞女們佢哋上到機要點做點做, 哦到佢哋記得為止.
終於等到出發嘅一日, 去到機場, 見到個航班表有我呢班機嘅出現, 成個人鬆晒, 亦都好順利 check in 出發往沖繩.
先畀大家睇下個行程表
| 09-Feb-2020 | 豬肉蛋飯糰 (午餐) OTS 租車公司拎車 (那霸機場店)萬座毛 LOISIR Living Suites SERAGAKI 酒店 Check In (住恩納) 燒肉琉球的牛 恩納店 (晚餐) | 國內線 1/F (水族箱斜對面) Tel: 098 856 8877 Map Code : 206 312 039*17 Map Code : 206 283 831*16 Map Code: 206 096 716*71 |
| 10-Feb-2020 | 名護鳳梨公園 L LOTA 餐廳 (午餐+下午茶) 名護驚安之殿堂 名護 Aeon Mall わだや 和食．沖繩料理 (晚餐) | Map Code: 206 716 467*26 Map Code: 485 692 291 *27 Map Code: 206 688 427*37 Map Code: 206 688 612*36 Aeon Mall 1/F |
| 11-Feb-2020 | 部瀨名海中公園 玻璃船 海中觀景塔 浜の家海鮮料理 (午餐) 港川外人住宅街 美國村 (搵口罩) 通堂屋台 北谷店 (晚餐) Aeon Mall (美國村買喼) | Map Code: 206 442 075*11 Map Code: 206 035 759 Map Code: 33 340 059*58 Map Code: 33 526 450*63 Tel: 098-926-0076 |
| 12-Feb-2020 | Aeon Mall 名護店 (返去買喼) 東江原第三公園堤霸 hea + Blue Seal 食 pancake 當午餐 WaGyu Cafe KAPUKA (下午茶) 美國村海景餐廳 天使之翼 (拍照) 焼肉きんぐ 北谷店 (晚餐) | Map Code: 206 688 612*36 Tel: 0980-53-1212 Map Code: 33 525 618*17 Depot Island 平台 Tel：+81 98-982-7311 |
| 13-Feb-2020 | 酒店 Check Out 瀨長島 OTS 還車 返香港 | Map Code: 33 157 260*20 |
圖片取材自 newamazing.com.tw