嚟咗英國六個月左右，都差唔多叫做 settle down 好晒，慢慢生活都重回正軌。但係始終呢度唔係香港，有啲嘢總係覺得差啲啲，有乜嘢覺得到而家仲未習慣或者適應，睇睇下面就知道。 英文 — 死症，真係需要時間去適應。耳仔其實已經習慣聽英文多過廣東話，但係聽、說能力真係差，幾時先可以搞得掂。而家日日都會睇幾篇英文 news 學多啲生字，有個科技網站 techradar 仲可以用聲音讀文章添，咁就可以試下自己聽唔聽得明白。點解唔用電影嚟學習聆聽嘅能力？ 電影啲讀白實在太快，而且好多口音，真係幾難聽。聽呢個網站就可以不停咁 repeat 去聽，希望下半年我可以有進步啦！ 奶茶 — 香港日日都飲一杯先返工，而家只可以用即沖奶茶粉，但點都係唔及香港茶餐廳嘅好飲。好多人話自己煲，呢個就真係要啲時間去研究下點做，上網都睇咗好多篇教人沖茶，茶葉可以去 M&S 買，基本上要沖嘅材料都可以英國買，不過最煩係要自己去 try，要搵日去沖幾杯，睇下點沖法可以符合到自己口味。 […]
