Brighton 半天遊

平時都唔會有太多半夜會，就算有都係開 30mins 左右，但係今日個會開咗成兩個半鐘，由零晨 3:00 去到 5:30。搞到我只係瞓得 2 個鐘又要起身，因為 8:00am 又有會，真係攞命。好彩今日唔係去 London，實搞到行程時間 delay 晒。 11:00am 開完會，拿拿臨換衫出發。今日會早啲食 lunch，朋友又話上次見我哋飲茶平過蘇格蘭，當然又要帶佢去飲下茶啦。而且呢度飲茶嘅點心，炒粉麪飯都幾得，價錢比起 noodle house 就貴啲啦。

由屋企去酒樓都只係 15 mins 車程，坐低就叫嘢食。唔好幻想呢度仲有阿姐阿叔推住架車仔賣點心，全部都係點心紙，炒粉麪就要同伙計落單。今日接近午市，都見到好多人嚟食，當然大部份都係華人啦，不過鬼佬都多，好多鬼佬都識揸筷子，amazing~~~ 唔知係咪中式嘢，班小朋友都食得唔多就話飽，大人就不知食得幾開心。一班朋友食飯飲茶，喺香港根本就係平常事，反而嚟到英國就變得好珍貴。大家傾埋啲兩地生活習慣有乜唔同，天氣，餐廳種類，真係乜都傾一大餐。

英國好大，大部份都係陸地，要去見海嘅話，最近都要去 Brighton。原來 Brighton 好出名，好多旅客或者本地人一放假就會去。原因就係因為呢度有海，有沙灘嘛。英國嘅鬼佬好鍾意曬太陽，因為大家都知英國天氣麻麻，長期天陰陰咁。相傳英國見到出太陽而開遮嘅人，一定唔會係英國人。上網睇過，原來 Brighton 除咗係旅遊勝地之外，都係退休勝地。怪唔之得我一踏入 Brighton，就話呢度幾好喎，感覺好舒服。跟手上網 check 埋樓價，嘩~ 嘩~ 嘩~ 我出返去先，畀心機努力工作。

由酒樓去 Brighton 大約一個鐘頭左右車程。其實無乜 idea 去呢度做乜，純粹話好耐無見過海，所以就搵咗呢度。求其 google map 搵咗個海灘沿岸街邊錶位泊低咗。一落車，頂，有無咁大風呀，吹到人都癲。話晒呢度係旅遊勝地，點會免費泊車。呢度泊車唔似得香港咁有個咪錶喺停車位後面，呢度啲咪錶通常都唔知喺邊，你要去搵下附近有無咪錶。今次呢個咪錶居然喺對面馬路，相隔咗架車大約一百米左右。呢度泊車可以用 App 或者去呢啲咪錶入錢拎飛仔，無錯，拎飛仔泊車，你要將飛仔放返入去車頭位置畀人見到，如果唔係就當你無畀錢泊車。又估唔到旅遊勝地泊車都咁平，泊 2 個鐘都係 £2.4。

沿途好多舖頭都無開，唔知係咪仲未到夏天，而家嘅海灘好鬼大浪，根本你一跳入海都應該走唔返出嚟。無計啦，撞著未係時候，一場嚟到都去下沙灘玩下石仔，玩下沙。影完一大輪相，真係頂唔住，好大風，一大風就好鬼凍，拿拿臨走返上街繼續行。天氣凍就寧舍覺得快肚餓，見到間 fish & chip 海邊餐廳，睇落唔錯，又可以坐露台位睇海景，就入去試下啦。原本真係想坐露台位，不過真係勁大風，轉返去戶外露天位坐。落單叫嘢食，分別叫咗 fish & chip、Seafood Platter、仲有叫咗杯朱古力、Offshore Pilsner。我去個洗手間啫，班小朋友已經旋風式咁清晒啲嘢食，有冇咁肚餓呀。搞到我哋又要再落 order，啲嘢食一嚟到班友仔又嚟搶食。原來真係好好味喎，怪唔之得佢哋係咁話未食夠，想再食啦！而我最大驚喜係杯 Offshore Pilsner，有啲生果味，但又唔會太搶啤酒味，而且杯酒好濃好滑，我唔係形容緊牛奶喎，真係杯啤酒係咁喎，好特別又好好飲。通常啲旅遊勝地嘅嘢食都好普通，有時甚至乎可以話難食，估唔到呢間出奇地好味。

幾時都話我哋行動力好低，嚟咗兩個幾鐘，我哋都其實無乜嘢做過，係時候努力繼續向前行。Brighton 有個好出名嘅景點，就係倒轉小屋，我哋就以參觀完呢個景點為終站啦！一直行一直行，行咗 20 分鐘左右終於到咗，本身都想入去參觀下，但係要成 £5 一個人，4 條友咪 £20，好貴喎。左諗右諗，最終都係放棄，小朋友又好 enjoy 只係拍下照，去沙灘繼續拋石仔。其實一場嚟到，做遊客嘅話，呢 £20 係咪應該要畀呢？另外話樣嘢大家知，呢度啲公共洗手間係有開放時間，最好大家六點前就去一次，如果唔係你就要搵餐廳或者商場借洗手間啦。仲有一樣嘢，當我哋離開餐廳時已經差唔多 2 個鐘，又係時候要入錶，咁大風又咁遠，無理由行返去入錶㗎嘛。當我用 App 畀錢時，發現點解泊一個鐘要畀成 £4.4 嘅？會唔會係放工時間特別啲？行返去入，又再行去景點，分分鐘用我半個鐘時間，都係畀 £4.4 算啦！返到屋企愈諗愈唔妥，上網搵下資料，見到原來呢區泊車係分夏令同冬令時間。當然夏令會貴啦，因為多遊客嘛。冬令就係 £1.2 一個鐘。原來係個咪錶未改時間，App 就已經用咗夏令時間，真係長知識，泊車都有分夏令冬令。

其實都未完全發掘 Brighton 其他地方有乜咁吸引，可能要再嚟多次，睇下呢個 Town 有無咁特別可以吸引到咁多人退休嚟呢度定居。

晚餐就帶咗朋友去屋企附近間 Pizza 餐廳食，佢哋都食到 “大樹舞子”。餐廳老闆仲送多咗個 nutella pizza 畀小朋友添。自己一家人平時都只係食 2 個 pizza，今次有埋朋友一家，可以試埋一直以嚟想試嘅 Sofra Grill，真係幾好味喎。