倫敦一日遊

為咗唔想個朋友第二日再揸車 ( 驚佢有揸車恐懼症 )，今日選擇咗去搭火車出倫敦。其實同埋揸車入倫敦要收費㗎。入到城又要搵停車場，泊車費又貴。我哋呢邊去倫敦，其實只係30分鐘火車，都好快。最重要嘅係小朋友唔駛錢搭，大人都只係 £5.7，玩足一日都只係 £11.4，揸車入城費已經要 £15，計埋泊車分分鐘要過 £60，搭火車係咪好抵呢！

倫敦有乜嘢玩我就真係唔知，不過作為遊客嘅我，只知道最出名嘅就係 London Bridge，London Eye 同埋大笨鐘。一場嚟到倫敦，無理由唔去呢啲咁出名嘅景點㗎！又係時候發揮 google 大神嘅力量啦。嘩~~~ 真係不得了，好多 blogger 有介紹喎。睇完一輪之後就大約確認好行程。由於都唔想太早起身嘅關係，我哋應該都會十一點左右先出到倫敦，咁樣其實只有大半日玩，所以最好就係揀啲景點集中嘅地方去。加上我實在太了解我們這一家嘅行動力，所以都唔可能去太多地方玩。同朋友講咗大約行程後，估唔到朋友又咁快手，轉頭就話已經買咗票，仲要係 London Eye + Sea Life London + River Cruise 三個地方。其實原本我只係講買 London Eye + Sea Life London 已經夠玩，跟手可以去埋大笨鐘影下相，嘆下咖啡，咁應該已經可以用咗大半日時間，五點前就可以返屋企食晚飯，避開放工時間添。

今日起身見到天氣唔太好，陰陰天，估計坐 London Eye 都應該唔會影到靚相。大家梳洗完畢就出發去搭火車，話咁快就到咗 Waterloo 站，行出去大約十分鐘就到 London Eye。呢度真係遊客聖地，好多唔同國藉嘅人都嚟坐一坐呢隻巨眼。我哋 book 咗11:15am，但原來都係要排隊，唔係就咁拎張飛去入場。我哋 10:45am 左右排隊，最後都要排咗半個鐘先上到車箱。你問我有乜特別，其實真係無，只係去到半空可以飽覽倫敦嘅景色，可以用唔同角度睇倫敦呢個地方。可能日頭睇差少少，氣氛無乜特別，加埋今日天陰陰，更加覺得倫敦無乜生氣，或者夜晚著晒燈可能會靚啲。蘇哈二人當然不停喺車廂走嚟走去，呢度望下嗰度望下啦。我哋兩老當然就不停影相，自拍啦！咁樣轉一個圈都要差唔多 30 分鐘。

轉完落嚟當然去手信店睇下有乜手信好買啦，又到駛錢嘅時間。其實啲手信來來去去都係嗰幾樣，鎖匙扣，磁石貼，熊公仔，幾十年都不變。但又總係會令你去買㗎喎。我去香港山頂都唔會買呢啲匙扣，因為覺得自己唔係遊客，無理由買呢啲咁嘅嘢。但呢度我哋個心態始終都係遊客，唔同喺香港，蘇哈二人當然都買咗自己嘅戰利品。然後就去咗車站附近間 KFC 叫雞。因為一陣仲要去搭船遊覧泰晤士河。

時間真係過得好快，2:30pm 就上船出發。朝早一直都陰陰天，但係都無落雨，但係我哋一上船就落雨，搞到我哋即刻開遮。話說我哋都有諗過坐返落下層，咁咪唔駛怕落雨囉，但係咁樣又睇得唔開心，朋友話等陣就無雨，大家堅持。點知。。。愈落愈大，足足落咗五分鐘左右，終於無再落雨啦。剛剛感受完泰晤士河嘅怒吼，而家停雨就可以細心欣賞兩岸嘅美景。可以一路睇風景，一路聽導覧叔叔介紹兩岸嘅嘢，都認識多咗倫敦。其實係好耐之前都聽講過，大家公認嘅 London Bridge 其實根本唔係叫 London Bridge。大家見到好靚嗰條橋其實叫 Tower Bridge。而 London Bridge 只係一條好普通嘅橋。不經不覺咁樣就過咗 40 分鐘，又要落船。

坐完船，當然去埋 Sea Life 啦。但係一去到就畀工作人員 say NO 唔畀入~~ 佢話我哋未 book 入場時間。吓？乜要嘅咩………？跟手拿拿臨過去隔離部機做登記，最快都要 4:30 先可以入，咁唯有去搵間 cafe 嘆下啦。真係好彩早去搵位坐，坐低無耐就落大大大大大雨。倫敦天氣就係咁，突然會好好天，轉頭又會天陰陰，跟手就落雨，然後又會變返好天，天氣真係變幻莫測。趁佢停咗雨，我哋就去咗大笨鐘附近行下，影下相。其實點解佢叫大笨鐘呢？可惜大笨鐘底部做緊維修，睇唔到佢嘅全身照。唯有留返下次再睇過啦。

夠鐘入場，工作人員又再次 say NO~~ 搞乜鬼？原來話我哋頭先 print 出嚟嘅入場劵唔啱，print 出嚟嗰樣係坐船用嘅。吓……？點會咁㗎！再返去部機睇下，研究咗成十分鐘有多，始終知道原來你登記咗時段之後，佢係會 send 封 email 畀你，你畀 email 裡面個 barcode 佢掃一掃，咁就可以入場。點解 book 時段部機附近或者佢個畫面無多啲資訊畀旅客知道點做嘅呢？經過千辛萬苦，終於可以入場，呢個號稱全歐洲最大嘅水族館，唔知會唔會震撼到我呢？

Sea Life 呢個水族館，其實都好多嘢睇，有唔同種類嘅水母，大海龜，企鵝，海馬…………… 鍾意海洋生物嘅蘇哈當然睇得津津有味，因為有啲生物都只能喺呢度睇到，其他水族館都無見過。但係我發現呢個水族館同我之前去過嘅有一個好大嘅分別。就係其它水族館都會有一個主角，例如沖繩和大阪會有鯨鯊，台灣會有白鯨，京都有日本大山椒魚。但係呢度就無特別標榜乜嘢生物做主角。不過整體都見到呢度都管理得好好，每方面都做得唔錯。行起上嚟都好舒服。最重要係而家無太多遊客，可以慢慢觀賞。

返到屋企已經七點幾八點，大家都好肚餓，一坐低就係咁將啲牛肉、丸放晒落爐，滾下滾下，大口大口咁食，真係食到個個都飽飽。