Skip to content

Category: 英倫生活

移民過咗嚟英國,到底會係乜嘢生活……

英國自動櫃員機提款

大家喺香港都知道 HSBC 同恆生櫃員機可以互通,即係你只要拎住 HSBC 或者恆生提款卡/信用咭就可以免手續費喺呢兩間銀行屬下嘅提款機拎錢。 而中國銀行,渣打,或者其他銀行則可以透過銀通標貼嘅櫃員機免手續費拎錢。當然你話,唓!我喜歡畀錢用 HSBC 喺銀通櫃員機拎錢唔得咩?可以,當然可以啦!你大把錢嘅話,你鍾意點都得啦!但係我哋呢啲平民百姓,邊有咁多錢可以浪費呢?所以嚟到呢度,如果你係以上所講大把錢嘥嘅人,你可以先行離開,呢個 topic 根本唔關你事。 大家都知道去外國櫃員機拎錢要畀手續費,所以大家去旅行前都盡可能喺香港先兌換晒啲錢先過去。因為大家都唔想每次拎錢時要畀手續費嘛,慳得就慳。點解講呢個 topic?事緣有日我帶過嚟嘅現金都洗晒,咁要去搵櫃員機啦!好彩當日喺大街,有間 HSBC 可以畀我拎錢。但係 HSBC 其實喺英國唔係咁多分店,咁唔通每次我都要返去呢度拎錢? 不過要拎錢嘅機會應該唔多,因為英國呢度好多,應該話大部分都可以用 card 去付款,選擇都好多,可以用 contactless 信用咭,Apple Pay,Google Pay,根本你只需要有手機就可以畀錢,拍一拍就搞掂,方便快捷。不過凡事總有例外,就好似我之前有講過嘅一間中式餐廳,佢哋就係只接受現金,信用咭免問。所以我都會準備現金傍身,加埋上網有睇過,話啲當地人都教,點都要袋啲錢喺身,萬一有人打劫,佢有啲錢拎咗都唔會傷害你咁話。 其實嚟到英國第一日,我已經有留意到街上有大大小小嘅櫃員機寫上咗 Free…

韓國美食遊

朋友今日要返去蘇格蘭啦!佢哋一早已經心儀要去食韓國任食燒烤放題,無理由唔陪佢哋去㗎嘛!好,即刻出發。 由於朋友今日去完街街就會返蘇格蘭,又要揸成七八個鐘車,好辛苦。避免佢咁辛苦,今日就早啲出去食韓烤,即係早啲食 lunch囉!十一點未到就到咗位於 New Malden 嘅 K-Town BBQ。由於附近無乜時租泊車位,所以大家記得去附近 The Malden Center 嘅停車場泊好車,再行 10 mins 左右就到 K-Town BBQ。呢度食放題小朋友真係幾抵,想知有幾抵就一陣睇下面幅圖。不過其實大人個價錢 (£29) 都好抵食,唯一就係只限食 1.5 hrs 比較急趕。如果可以 2 hrs 就好啲。…

Brighton 半天遊

平時都唔會有太多半夜會,就算有都係開 30mins 左右,但係今日個會開咗成兩個半鐘,由零晨 3:00 去到 5:30。搞到我只係瞓得 2 個鐘又要起身,因為 8:00am 又有會,真係攞命。好彩今日唔係去 London,實搞到行程時間 delay 晒。 11:00am 開完會,拿拿臨換衫出發。今日會早啲食 lunch,朋友又話上次見我哋飲茶平過蘇格蘭,當然又要帶佢去飲下茶啦。而且呢度飲茶嘅點心,炒粉麪飯都幾得,價錢比起 noodle house 就貴啲啦。 由屋企去酒樓都只係 15 mins 車程,坐低就叫嘢食。唔好幻想呢度仲有阿姐阿叔推住架車仔賣點心,全部都係點心紙,炒粉麪就要同伙計落單。今日接近午市,都見到好多人嚟食,當然大部份都係華人啦,不過鬼佬都多,好多鬼佬都識揸筷子,amazing~~~ 唔知係咪中式嘢,班小朋友都食得唔多就話飽,大人就不知食得幾開心。一班朋友食飯飲茶,喺香港根本就係平常事,反而嚟到英國就變得好珍貴。大家傾埋啲兩地生活習慣有乜唔同,天氣,餐廳種類,真係乜都傾一大餐。 英國好大,大部份都係陸地,要去見海嘅話,最近都要去…

倫敦一日遊

為咗唔想個朋友第二日再揸車 ( 驚佢有揸車恐懼症 ),今日選擇咗去搭火車出倫敦。其實同埋揸車入倫敦要收費㗎。入到城又要搵停車場,泊車費又貴。我哋呢邊去倫敦,其實只係30分鐘火車,都好快。最重要嘅係小朋友唔駛錢搭,大人都只係 £5.7,玩足一日都只係 £11.4,揸車入城費已經要 £15,計埋泊車分分鐘要過 £60,搭火車係咪好抵呢! 倫敦有乜嘢玩我就真係唔知,不過作為遊客嘅我,只知道最出名嘅就係 London Bridge,London Eye 同埋大笨鐘。 一場嚟到倫敦,無理由唔去呢啲咁出名嘅景點㗎!又係時候發揮 google 大神嘅力量啦。嘩~~~ 真係不得了,好多 blogger 有介紹喎。睇完一輪之後就大約確認好行程。由於都唔想太早起身嘅關係,我哋應該都會十一點左右先出到倫敦,咁樣其實只有大半日玩,所以最好就係揀啲景點集中嘅地方去。加上我實在太了解我們這一家嘅行動力,所以都唔可能去太多地方玩。同朋友講咗大約行程後,估唔到朋友又咁快手,轉頭就話已經買咗票,仲要係 London Eye + Sea Life London…

有朋自遠方來

嚟咗呢度無耐,本地朋友都唔識得多個。好彩我哋都仲有啲香港朋友過咗嚟呢度。今日就有一個家庭趁住小朋友放 Term Break,即刻話落嚟南部探我哋,順便約我哋一家人去倫敦玩。 做乜會話朋友落南部?你朋友唔係住附近嘅咩? 係,我哋呢邊本身有兩個朋友住附近,但呢個家庭朋友本身係住 【 蘇 格 蘭 】( 好遠呀! ),佢哋嚟咗蘇格蘭差唔多有一年,終於搵到藉口落嚟倫敦玩,今次齊齊去闖蕩一下。 由蘇格蘭落嚟,差唔多用咗成七八個鐘,諗起都覺得攰爆。朋友一家大細拎住行李,我都有諗過佢哋應該搭火車定自己揸車,最後都係自己揸車方便啲。因為計過數,搭火車嘅話,嚟到南部出去玩都係要用車,我架車都車唔到咁多人,如果call uber又貴,呢度租車又貴,坐火車嚟倫敦又係要用七個鐘,仲要唔係點到點到門口,咁鬼煩,不如揸車嚟好過啦。 朋友到埗都已經六點,當然要同佢哋醫肚先啦。第一晚就同佢哋食港式炒粉麵做晚餐。原來蘇格蘭嘅茶餐廳價錢居然比我哋呢邊貴,而且唔算好食。朋友見我 post 相出嚟話好食,又講到明想試下,咁就要同佢哋去食返餐啦!等佢哋回味一下香港嘛!呢間其實唔係一間港式茶餐廳,佢應該係一間集越泰港於一身嘅食店。佢隱身於 Sutton High Street 街尾,店名叫做 Noodle House 。 今次嗌咗乾炒牛河,咸魚雞粒炒飯,星洲炒米,煎鍋貼,炒菜心,椒鹽鮮魷,珍珠奶茶。大人細路都食到舔舔脷。我最愛佢嘅乾牛河,炒菜心,有鑊氣,好味。椒鹽鮮魷同珍珠奶茶就真係失色好多,下次就唔好叫嚟飲啦。High…

超級市場

嚟到英國,我哋一家人最大娛樂係乜? 當然唔係去行街, 飲茶食飯啦。都唔係睇戲,唱K啦。其實就係行超級市場。 其實一到埗,我哋就畀朋友帶咗去 High Street 行街街。初時以為佢會帶我哋去 Shopping 食嘢,點知……. 原來係去超級市場。中超、Sainsbury’s、M&S、Morrison,仲有幾間家品店。佢清楚晒邊間啲乜嘢抵買,邊間賣嘅肉類新鮮好食,邊啲貨品要等佢特價先好買。佢當然話要知慳識儉,唔好買貴嘢做水魚。介紹咗一輪之後,一條 High Street 居然會有咁多超級市場,我哋嗰日只係行咗幾間。第二日另一個朋友又帶我哋去 Tesco ,真係大到一個點。不過俗語有話,高處未算高,當我見識埋 Costco 之後就真係嘆為觀止,成個貨倉任你行,家庭電器,家庭用品,蔬果,肉類,酒,BB 用品,衣服,總有嘢你會啱。不過 Costco 英國入會有規限,要專業人士先可以申請。我哋嘅職業唔喺佢個 list 裡面,所以申請唔到做個人會員,只可以做 online member。顧名思義 online…

砌傢俬

好好彩過嚟前已經搵咗屋,業主肯等半個月,等我哋過到嚟再簽約。間屋除咗基本電器已經包括之外,其他當然自己買返嚟啦。間屋原本就有洗衣機,雪櫃,電䁔爐,焗爐,抽油煙機……. 業主仲要係叫做新裝修過,大部份頭先講嘅嘢都係全新。地毯都重新鋪過,窗架都係全新,全屋都叫重新油過。今次真係遇到好業主,又租到間好好嘅屋。 本身住緊 airbnb時已經買咗個水煲。airbnb話晒有床有被,又有洗衣乾衣機。 但係新屋就係百無。 咁搬入去住,究意要有乜先最緊要呢? 之唔係就係被同床褥囉!住緊 airbnb時已經上網揀緊邊隻牌子比較硬身,最重要嘅係可以呢幾日送貨,如果唔係搬去新屋就要瞓地板。 心目中有 Sealy 絲漣同埋 Emma,兩隻都未瞓過。以前瞓嗰張係 Slumberland 斯林百蘭。呢個牌子之前香港個 Sales 話係英國牌子,但係我上網搵極都好似搵唔到,如果唔係我實搵返嗰張買 (莫非我被人搵笨?)。比較完一大輪,最後揀咗 Emma,因為做緊特價,加埋佢可以兩日內送貨,完全符合要求。不過真係估唔到而家啲床褥壓縮完得咁細, 好容易就可以搬上樓放好。 跟住就不停咁上 wayfair 網站睇傢俬,床架,茶几,sofa,衣櫃……. 成日覺得買呢啲嘢係咪應該要親手摸下,感受下啲質料先做決定。但偏偏老婆又想快啲決定,買齊傢俬就可以叫做完成咗件事,所以好快就揀啱個款落單。 有啲傢俬就去 IKEA…

英國大大小小公園

香港嘅公園平時就去得多。平日去人少少,無咁嘈。但逢假日去就會見到大量姐姐們,香港人去野餐。無計,香港地方少,郊野公園一到假日就會好似街市咁迫爆。無論你想去野餐,去BBQ都好,一定要早起身去霸位,霸爐。都係嗰句啦!香港地方細嘛,人又咁多,難得假日,當然想同屋企人、朋友仔去郊遊啦! 嚟咗英國一個月,我都只係去咗屋企附近個公園行過下。呢個公園面積都好大,有條人工河道,又有個湖,當然仲有好多樹啦!而呢度真係人唔算多 (可能我住呢區人少),無論你幾時嚟都係咁上下。第一次嚟本身諗住睇下啲鵝,鴨,雀仔,欣賞下日落湖景。點知突然有隻松鼠走埋嚟身邊,仲同蘇哈兩小妹拎嘢食,好似完全唔怕人咁。然後再發現呢度原來有好多隻松鼠走嚟走去,好得意,蘇哈都追住佢哋嚟睇,好興奮。 去完第一次已經令蘇哈難忘,日日都話想拎啲 nuts 去餵下松鼠,麪包去餵下魚,雀仔。終於等到有日天氣好好,一大早叫佢哋起身,然後出發去餵松鼠。成朝去到蘇哈都不停餵雀,我就無無聊行嚟行去搵松鼠,原來咁早無乜松鼠,佢哋應該四五點先會出現。餵咗成個幾鐘 (究竟你哋帶咗幾多麵包嚟餵雀?) 我就話去下後面睇下係乜嚟,次次嚟到都只停喺呢度欣賞啲鴨,鵝,雀。。。 原來佢哋餵晒啲麪包所以先肯起行😫。行下行下,終於畀佢哋見到松鼠啦!有幾隻喺樹上走嚟走去,佢哋即刻拎咗啲 nuts 出嚟餵松鼠 (喂,其實你哋仲有無帶其他嘢嚟餵唔同動物?🤔)。其實佢哋係咪真係食得嘅呢?餵得咁上下,我又發現前面原來有個遊樂場,仲有好多遊樂設施,真係睇見大人細路都開心呀。拿拿聲叫佢哋嚟睇,諗住同佢哋去玩啦!點鬼知佢哋鐘意餵松鼠多過玩,又估唔到喎。 同一時間又畀我發現隔離場邊原來有個籃球場,yeah,下次可以自己帶個波嚟打。不過睇真啲,原來係籃球場加足球場先啱。佢籃球架底下面整咗個龍門架,咁就可以一場二用,讚。但係以我所見,踢足球嘅人已經霸咗兩邊場(果然係足球國家),場外張櫈見到有個好落寞嘅身影,一個拎住籃球嘅少年坐咗喺度望住個場,心裡面個滋味一定唔好受 (我明, 我真係明)。 繞咗個籃球場一圈,返到遊樂場已經見到蘇哈佢哋係度玩緊,當然都係因為無晒 nuts,所以咪可以走嚟玩囉。呢個遊樂場有大量鞦韆,有氹氹轉,有瀡滑梯。。。。最特別佢有一個飛越繩索畀你玩,啲細路個個排晒隊一個一個輪住玩,好有秩序禮貌。有啲大哥哥見到妹梅喺側邊等打鞦韆,仲會主動落嚟畀佢玩,唔會霸住玩好耐。不過可能始終都未咁識英文,妹梅都未可以同啲小朋友傾計,玩埋一齊。不過佢又好 enjoy 自己一個去玩。啲家長們都約埋兩三個家庭,一路嘆咖啡食早餐,吹水,一路睇住啲細路跑嚟跑去,都幾悠閒。 玩完一大輪,又係返屋企煮 lunch 嘅時候。其實假日咁樣,既充實,又可以放下小朋友電,真係幾好。自己大人行下,來回屋企都行咗成萬步,強身健體,不錯。 其實個公園仲有一大片草地畀人跑,上次喺 FB 見到話有人會搬個龍門架去呢啲草地,同小朋友玩踢波。…

剪髮 ( Haircut in UK )

大佬,剪頭髮有乜好講!咪就咁行入去同人講剪髮囉,有乜特別。 無錯,原來其實就係咁簡單。之前睇 FB,啲人話好驚去剪頭髮,因為外國人根本唔明你哋想點剪,佢哋都係用返自己外國呢套嘅剪髮方式,即係有啲類似 QB 嘅髮型一號、二號,剪完頭髮出嚟嘅人真係一式一樣。 其實自己一早都想去剪,但見到咁多 FB 負評,本身都有啲郩底。加埋平時出街又唔係話太唔方便,所以一直拖拖拖。對上一次剪髮已經係一月中嘅事,即係已經兩個多月無剪,平時都係一個月就去剪,保持清爽造型,而家咁鬼長真係幾煩。。突然的起心肝去剪髮,都係因為我心愛嘅籃球緣故。事緣 2 星期前打波時已經成日要撥頭髮,打打下又塌晒落嚟,好唔舒服。上星期再打時已經噴多咗定型噴霧,亦用多咗髮泥做固定,但係都係唔太得,搞到好樣衰。就係因為為咗打籃球可以專心啲,我第二日就去咗屋企附近間理髮店 Barbershop。 講樣我留意到嘅事畀大家知。呢度真係好多 Barbershop 㗎,真係總有一間喺左近。我住嘅呢度條街已經有 3、4 間,真係有咁多人日日都要剪髮嘅咩?我都睇過,平均價錢 £14 。我見過最平係 £13,最貴 £18,但大部份都係 £14。我呢間就貴少少,£15。點解我咁多間唔去,去呢間?除咗因為近之外,佢嘅裝潢,髮型師嘅樣貌,又著晒制服,室內又有專 for 兒童嘅髮型椅,加加埋埋一個整體形象都好舒服,所以就揀咗呢間! 第二朝瞓醒真係乜都無理就衝咗去剪。入到去間舖有成三個剪緊,又有一個等緊,當然乖乖坐低排隊等剪啦!十分鐘後好快就到我。理髮師問我想點剪,我就用啲簡單英文同佢講,再加上身體語言,指住側邊兩邊,make it…

英國 giffgaff 電話咭

去旅行,首要當然要計劃去邊度啦!然後訂機票,再跟手就係計劃行程。 以前就會去旅行社買機票連酒店套票,而家就係上網 book,skyscanner,agoda,expedia…… 真係方便好多。 以前去到當地國家,大家都會靠旅遊天書,以前可能會行咗好多冤枉路。 而家大家會靠 google,打開個 google map 再跟住嚟行就得啦! 當然,而家去到當地,打開 google map 係要有上網服務先得。 咁大家會一早喺香港買定?定係去到先搵電訊商買咭? 各人有各人做法。 以前我去台灣,好多時都會去到當地先做上網登記,後來就喺鴨記買定。 記得好早期鴨記都仲未有上網咭,有都可能比較貴,所以都會去到台灣先申請。 不過當地申請都幾煩,又要登記,又要影印護照,分分鐘搞一張咭上網都要成個鐘。 而家當然唔需要咁耐啦,走去鴨記買,落地插咭入電話就用得。 今次去英國,我都去咗鴨記睇睇,見到 3 有張電話上網咭,都係HK$200 左右,有80GB data,睇落都好似幾好。…