Skip to content

台北無限復活 (2018-April-02)

又嚟,又嚟。。。真係要每年都嚟探親一次?返老家都無咁密。

今日去到台北都已經兩點幾, 所以去酒店放低行李就即刻出去搵嘢食.   原本第一日預計用半日去赤峰街行下食下嘢, 但係唔知搞乜, 搞到咁晏先去到酒店, 所以即刻改變行程.  即用 google map search 一下.  咦, 原來酒店附近有一間姆名餐廳喎… 拿拿臨行過去, 等咗一陣有位就入去食.  成間餐廳真係不錯, 放咗好多隻大型公仔係座位上, 畀啲客人不停咁影相, 啲公仔就好似陪客咁坐係你隔離同你食飯, 你見到每台客人都不停咁自拍, 我影到厭之後, 就膽粗粗走去問其他食客話想交換公仔…. 得咗, 有我做咗呢件事之後, 就見到其他食客都不停咁交換公仔嚟影相.  一直印象都覺得呢啲主題餐廳嘅食物都唔會好得去邊, 只要唔好咁難食就 ok, 但又估唔到, 又幾好食喎.

食飽飽之後就返酒店執下行李, 休息下.  等到夜晚就去咗食小籠包.  唔好以為我去鼎泰豐, Sorry, 我係去另一間, 叫京鼎樓嘅舊式小籠包店食…  由於我哋早去, 所以都唔駛等位就直入去坐啦!!  而經過門口, 你會見到三四個師傅好努力咁係度包緊小籠包, 一籠籠蒸緊嘅小籠包, 見到就想即刻食.  佢嘅小籠包有好多味道款式, 我哋就試咗佢嘅生招牌 – 烏龍茶小籠包, 當然唔少得普通小籠包, 仲有排骨炒飯等等…  味道?  真係唔錯, 當時覺得係好過鼎泰豐….  加埋唔駛等位, 就算係同味道, 我都會揀呢間… 下次會再嚟食過.

又食飽飽, 就係附近行下, 然後返酒店休息…  養足精神, 明天再繼續行程!

Moomin café 嚕嚕米主題餐廳   店址: 台北市大安區大安路一段81號

京鼎樓   店址: 台北市中山區長春路47號

Published in周遊列國

Be First to Comment

Leave a Reply