嘩！搬咗嚟英國一年多啲啲，終於都買電視返嚟。
話說一到埗其實都想買㗎啦，不過業主又留咗部36吋電視喺度，仲掛埋上牆，靚靚仔仔，無理由買部新電視返嚟㗎，好似好浪費咁。 而且呢邊搵人安裝掛牆，人工都成 £100 左右，加埋嗰排又無乜特價。 等到暑假，black Friday，聖誕節都無特價；加上放電視又係一個大問題，研究咗好耐都搵唔到一個合適嘅電視櫃，又唔想掛上牆 （掛咗之後會太高），所以之後都無再諗換電視。 但係有日老婆睇戲話睇唔到啲字，又細又辛苦，每次睇親電視都話要換咗佢。 終於都的起心肝去睇下邊度有特價，因為 Sony 近排都準備出新型號，舊型號應該會有啲清貨價。
你梗係會問做乜唔係買新型號，一來就係新型號出，舊型號實會有特價；二來上網做過比較，見到啲人話新型號同舊型號其實 Spec 係一模一樣，只係 panel 亮度提高咗 10% 同埋支持遊戲模式，令你打機更真實。 咁新型號同舊型號又相差成千鎊，真係無乜理由會買新型號喎。
就係咁再等多半個月，終於畀我見到有間網上舖 Sony XR65A80K OLED 做特價，二話不說就落單等送貨。
好似之前講，電視櫃一直都搵唔到啱心水，電視嚟到點算好呢？ 不停再上網搵下電視櫃，再左度右度之際，咁啱有朋友話有個座地架問我要唔要，又咁啱個電視架個底座啱啱好可以放喺火爐前個地磚位，咁即係可以解決放電視問題，安心等收貨。
當日早上十點幾就到貨，拿拿臨拆箱，裝上電視架。 不過一裝好就發覺好似唔太穩陣，check 過個座地架，原來最大呎吋只係支持到去 55 吋，而家 65 吋對佢嚟講有啲頭重身輕，驚佢會隨時翻落嚟。 第二日就用咗 Ikea 買返嚟嘅一個長方櫃，下面再用發泡膠墊一墊，將電視放上去，真係絕配，感覺穩陣好多。 過兩日去 Ikea 再配咗啲櫃門、櫃桶，咪就係一個電視櫃囉。 之前煩惱嘥時間搵一個電視櫃做乜嘢，根本就有一個 fit 到爆嘅喺屋企。
一開電視，好震撼，咁大個仔都未試過擁有一部咁大畫面嘅電視，真係無諗過會有呢日發生。你知香港嘅樓有幾咁 “大” 啦！ 而家睇電影應該投入感會大增，加上 Sony Acoustics Sound 真係好勁，啲聲係 feel 到好清𥇦、好有位置感，呢樣嘢係連老婆都感受到，唔會似其他牌子咁會覺得啲聲係由電視機後面出聲，會有箱音，真係抵讚。
