離開嘅日子愈來愈近，有啲大型傢俬就仲未搵到人接手，真係掉都要諗下點掉，掉去邊。 好彩就喺呢個時候見到 facebook 有人講話可以搵啲環保回收團體過嚟回收啲有用嘅傢俬。 即刻上網搵下，都有幾間公司做呢啲。 打過去問，原來所謂嘅回收公司係一啲社企或者二手店。 佢哋回收返嚟嘅傢俬會先修理一下，然後就會拎去畀啲有需要嘅人士。 當然佢哋嚟收走啲傢俬係唔會畀錢你啦，反而你係要倒貼出嚟畀佢搵班人嚟回收。 記得當日佢哋嚟到見到有啲傢俬已經爛咗，佢哋都已經即場唔收。 有啲傢俬佢覺得太大件又會唔收，因為話送唔到出去畀啲有需要嘅人，原因係因為通常有需要嘅人屋企根本無空間可以放得落你呢件傢俬。 咁呢啲無人收嘅大型傢俬點搞好呢？ 好彩就係住嘅附近有個垃圾收集站，我就將呢啲唔要嘅傢俬，全部車晒過去。 又估唔到其實都有好多人走去垃圾站拎呢啲傢俬返屋企喎。
到咗一月尾，搬屋公司嚟收家當去英國。 一早成五六個師傅嚟到，將啲原本我已經 pack 好咗嘅紙箱搬上車，又將屋企未收拾好嘅嘢一件一件放去紙箱度。 屋企真係好多嘢，老婆根本就無力諗究竟點執，衫褲鞋都未執好。 師傅都唔理三七廿一，你衣櫃有乜嘢就拎走 pack 箱，廚房有乜嘢都包好就放入箱。 終於搞咗一日，由早上9:30 去到下午 5:30 左右先離開。 原本師傅話預半日時間畀我哋㗎咋，最後佢要改咗下午個客個期。 呢次真係唔該晒佢哋。 我哋搬咗啲乜去英國？ 其實都係衫褲鞋、碗碗碟碟、小朋友嘅書 & 作品、我嘅漫畫……… 同埋一張按摩椅。 點解會搬埋呢張按摩椅過去？ 就係搬運公司負責人話英國呢邊好少有呢啲電器賣，自己真係鐘意就拎埋去會比較好。 原本有諗住搬埋啲 hifi 器材去，不過一聽到話每樣嘢都要打木架 (HK$800 一個)，我思前想後就覺得唔值得搬去 (因為大部份嘢都用咗超過10年)，最後喺香港賣埋。 到時過到嚟英國再買過。 (但係到而家都仲未買得返啲 hifi 器材，呢邊好貴。) 我上網見啲人都係話得幾十箱嘢搬走，估唔到我哋搬咗成 12x 箱。 之後仲執多咗十幾箱嘢自己拎去畀搬運公司，運費睇嚟應該都幾甘。
臨飛前一個星期就將坐緊嘅 sofa、書櫃搬去畀屋企人。 搬埋之後就差唔多變咗間吉屋。 不過屋企搞到好鬼亂，好似垃圾站一樣，滿地物品 ( 唔記得影低做留念 )。 剩低嘅日子，就係要執拾行李，將間屋還原交返畀業主。 最後嗰一個星期，真係無覺好瞓，晚晚走去垃圾站拎架垃圾車返屋企門口，將啲無用嘅嘢掉落去，跟手再推返去垃圾站換另一架再掉過。 晚晚都通頂，最後一日都仍然繼續清緊垃圾，清到最後一刻，先叫做差唔多清晒，然後就拿拿臨坐車去機場，成個人根本就呆呆哋，傻傻哋咁。
後話；最後業主都扣咗我二千幾銀，話要請人嚟幫手做大清潔。 其實都覺得抵畀，因為都仲有嘢未清得晒，尤其廚房啲漬，要清返乾乾淨淨都好煩。 仲有我喺牆身鑽咗咁多個窿，佢都要再搵人執返間屋先可以再租出去嘅。
