決定移民後，有乜嘢要做？ 當然就係諗下要幾時離開啦，今年 (2021) 定下年 (2022)？ 究竟係等埋阿女讀完小五定上學期完結之後就走？ 一切都交咗畀老婆諗。 佢都做咗輪研究，最終都係完咗上學期就走。 因為話可以畀佢有半年時間去適應英國呢邊嘅小學生活，然後Year 6 佢就可以專心讀書上中學。 決定好日子，當然買飛機票，book Airbnb 啦！ 呢啲難度不大，上網 click 兩 click 就搞掂，記得要 book 啲可以免費改日子或者取消嘅 Airbnb，萬一個 plan 有乜嘢變動，你都可以免費取消或更改入住時間。 搞掂好晒呢啲嘢之後，就係諗下幾時變賣家當，幾時 ship 啲家當去英國，幾時遠距離租英國屋。
機票訂咗 Virgin Atlantic 直航，全家都只係 $15,000 左右，勁平。 已經包咗每人一件 25kg 嘅行李，一件 7kg 手提行李。 就算再加一件25kg 行李都只係 HK$350 左右，真係抵。 (之後故事發展勁癲，勁肉赤)
Airbnb 就因為有朋友介紹，佢之前過嚟時住過，覺得唔錯。 行去 high street 都係 20mins 左右，地方乾淨，附近環境 ok，所以我都無睇其他，就直接 book 咗。 最緊要係可以免費取消。
距離出走仲有成大半年，應該暫時無乜嘢要即刻處理。 日子一天一天咁過，話咁快已經到咗十一月，自己都整理好咗一啲嘢唔會帶過去英國，但係就咁掉咗比較可惜。 我唔用啫，可能其他人啱用呢？ 以前放售物品都係用 dcfever，reviews33，而家有個 app 叫 carousell，好方便。 當然，有時都要睇彩數，好似影音類，都係放返喺 reviews33 或者 facebook market 會快啲有反應。 但係其他小家電，漫畫呢啲用 carousell 放售成功率會高好多。 有時你明明覺得唔值錢嘅嘢，你放上去賣，求其開個價，真係會有人問價而成功放售，真係估唔到。 好似我有條三四年前嘅 usb windows 7 手指，一插去 hdmi port 就有得用 windows 嚟上網，睇 youtube 等等，居然都可以賣成 HK$300；一張碌架床又可以賣成 HK$600；一個已經壞咗嘅 video camera 又可以賣到 HK$100。 原來真係好多人會買啲二手嘢。 賣下賣下，1 月中差唔多都賣晒所有賣得嘅嘢，最開心係架車都可以一星期就透過 facebook market 放售埋，價錢都仲要幾好價。
