無做 Amazon 送貨司機之後又再繼續搵工，又再 send 咗 N 咁多份求職信出去，其中都有 3 份有得 interview。 其中得一份有得 second-in，當時都唔太記得呢間，因為面試過程我見個類似好有經驗嘅主管無乜反應，個樣都好似唔多 like 咁。 點知過咗兩個星期左右，突然收到 HR 嘅 mail 話約我進行下一輪嘅見面。 對於 face to face interview 都有啲經驗，所以都無乜特別話要準備啲乜，之前要留意嘅對答問題亦太約了解咗，所以今次都係抱住去拎經驗嘅心態去試下。
份工喺 London Victoria station 附近，坐火車出去就最快又最平，由屋企出去都只係半個鐘左右。 去到又見返之前 interview 嗰個光頭佬，基本都係聽唔到佢個名叫乜。 一坐低佢又再講下今次 interview 會同多兩個人見面，佢哋都係會問下啲問題，睇下我答唔答得到。 今次除咗問咗少少嘅技術問題，佢哋仲問多咗啲情境題。 例如要升級系統，你會點做？ 你有無諗過將來嘅 career path 係點？ Expect 自己可以畀到唣乜嘢呢間公司？ 之前有無過呢啲 IT support 經驗？ 你遇到最棘手嘅問題係乜？ 你遇到個好難溝通嘅人，你又會點做？ 今次呢啲問題，有部份都會根據返之前一早準備嘅答案而答返光頭佬， 但係有時我就突然改咗。 好似最棘手嘅問題，個腦突然反應咗出嚟嘅答案唔係叫我答之前一早預備好嘅官方答案，反而我係一再強調良好嘅溝通，良好態度，與人溝通嘅重要性，有咗良好嘅溝通，之後就算有乜難題，總會有方法解決到，但人與人之間就係最困難，亦係最難解決。 另外佢哋都好感興趣我喺 cloud 方面嘅知識，都問咗呢方面嘅資料。 今次都好彩自己有睇過間公司嘅網站，知道佢哋係 NGO，專幫啲無家者，所以佢問我知唔知佢哋公司係乜嘢時，我都可以答到出嚟。 我仲問咗啲關於公司點樣可以幫助無家者嘅事情。 唔知係咪我多口，佢見我又有與趣，光頭佬就帶我行下間公司，參觀下 office，仲睇埋 server room 添 (嘩，點解間房可以咁亂)。 仲同我講解下公司嚟緊嘅計劃，就係將啲 server 上晒 cloud。 又話公司其實得 2.5 個 IT 人 (日後再講我入咗嚟之後乜情況)，其中一個 IT 人係 part time。 帶我行咗個圈之後再講多兩句就離開咗。
之前見工後都會諗返 interview 嘅回答有乜嘢要改善，通常都係抱住無希望嘅心情走人，當賺下見工經驗。 今次都唔例外啦，自己仲要無啦啦改咗啲標準答案，即席發揮急才，都應該無乜希望多。 話咁快就到咗目的地，然後就 join 返 mimi 佢哋去 high 下 tea。 事緣一日前我咁啱就轉電話號碼去新台，噚日全日都未轉到號碼，( 英國電話號碼轉台唔似得香港咁方便，零晨時段就轉，瞓醒第二日就可以用新咭 ) 所以坐低後就叫 mimi 試下打畀我。 點知又咁啱有電話打嚟，仲心諗點解唔係 show mimi 個名出嚟嘅？ 我仲叫 mimi 收線，點知仲繼續響緊。 由於係英國號碼打嚟，我多數都會接，反而香港號碼我就唔多接，因為明知都係啲推銷電話多。 接咗之後就聽到把好熟悉嘅聲音，原來光頭佬打嚟話選中咗我做呢份工，嗰下心情真係好開心，不自禁講咗句 really？ 確認咗之後就話我會 accept 個 offer，然後講下之後 HR 會再 send email 畀我確認返工日期，我可以喺呢兩個星期去同而家嘅 IT 人先大約了解下公司嘅 IT 情況。 過程就係咁上下，嗰下話請我時，我真係有感覺鬆一口氣，英國搵工真係好煩，真係要過五關斬六將咁，而家唔駛再煩惱搵工嘅事。 不過之後要煩惱嘅喺點樣返工；點樣同人夾住做嘢；點樣適應新同事、新環境。 始終都係要講英文，我真係有啲驚，唔係，係好驚先啱。