我諗大家想移民到 UK，都會知道要考兩個試。 一個係 Life in the UK，一個係英文能力試。 Life in the UK 永久有效，反而英文能力試就只有兩年有效期。
近排好多人移民嚟咗英國，個個都未搵到工，咁有乜嘢搞？ 除咗日日好似廚神上身之外，就係好多人會去考 Life in the UK。 我當然都唔例外，趁而家有時間，當然拿拿聲考咗佢先啦，遲下如果一返工忙到無停手，真係好難可以的起心肝仔去讀書。 況且頭先所講，考咗就永久有效，遲考早考都係要考，當然趁有時間就考咗先。
其實之前都一路的唔起心肝去讀，不過突然有一日睇到個 facebook group，裡面有人分享咗點溫習，只要做晒網上 16 個 exam 嘅題目，大約 400 條，只要做到一題不錯，咁你就可以話十拿九穩咁 pass 個試。 其實都有啲半信半疑，但係睇 comment，好多人都係咁做，而且真係 pass 咗喎。 既然只係操 past paper，加埋近排搵工都搵到有啲悶，好，等我一於試下。
首先第一日只係溫 1-8 exam，操到熟晒，題題都答啱晒，第二日就操埋餘下嗰 8 個 exam，又操到熟到爛。 我仲整咗個 excel 表去排返啲歷史事件時間次序，咁就可以容易啲記得年份，人名。 溫咗兩三日，覺得有信心就去網上報名。 嘩，搞乜咁 full， booking 已經去到一個月後先有位，唔係嘛.. 咁呢兩日我溫咁耐做乜，要等成個月先考得，我咪又要再操過？ 我呢啲短暫記憶嚟咋喎，點算！ 又唔知係咪傻人有傻福，無啦啦 click 下 click 下兩日後突然有位，拿拿臨報名畀錢。
講下網上報名程序先。 當然你要去 https://www.gov.uk/life-in-the-uk-test 報名。 好多人會問究竟揀 BNO 定 Hongkong，因為我有 BNO，所以我揀咗 Passport，然後出生地 (Country of birth)，我揀咗 Hong Kong， 因為 passport 裡面有寫明，千祈唔好揀 BNO。 然後 Town or city of birth，自己填 Hong Kong 就 OK。 好啦，最後亦最多人問嘅就係 Reason for taking the test，眾說紛紜，我自己就揀 For Settlement，因為 BNO VISA 係要先經過 Settlement 先可以再申請入藉，所以我呢個考試當然係用嚟做 Settlement 啦。 不過我知道有啲人揀 Citizenship 都一樣可以考。 不過，記得，你答職員嘅提問時，你要答返你網上揀嘅呢個原因。 最後揀日子，畀錢，咁就搞掂個報名㗎啦！
考試當日早上，再操多次 16 個 exam 就出發去試場。 其實我都唔係百分百做啱晒，都錯十幾題，不過我估都應該 ok 嘅。 由於唔係揸車關係， 我畀原定時間提早咗個半鐘就到咗試場，未夠鐘就乖乖喺樓下等下，再溫一溫習。 等咗 15 分鐘左右，都見到唔少香港人落樓，個個都係考完試，咁啱有個香港人問我係咪都考完，我話要等多一個鐘先考，佢同我講，唔駛等㗎，你照上去，佢會畀你考，唔一定要嗰個時段先考。 嘩，咁好，即刻上去先。
上到去，檢查人員先核對返佢張考生名單有無你個名，有嘅話就會叫你熄咗你部電話，然後將外套、電話之類嘅物品全部放晒喺 locker，跟住等嗌名入房再核對資料。 入房之後就會有職員問你叫乜嘢名，出生日期，考試用嚟做乜 (記得要答你之前網上揀嗰個，For Settlement 定係 Citizenship，答錯係唔會畀你考試㗎)，然後影埋相，咁就再出返去畀門口嗰個職員檢查，好似過海關咁，佢會要你 fing 下啲手䄂、腳位、頭髮，睇下你會唔會收埋咗啲紙仔喺𥚃面，檢查完畢就可以入房正式考試。
入到去又有個職員會核對多一次你嘅資料，然後就安排你坐低考試。 佢會有四條熱身題畀你，然後就正式考試。 一開始，頂，點解未見過呢題嘅， 雖然網上啲人都話有可能會有一至三題會完全未出過，但只要其他都啱晒都會合格，一嚟就已經未見過條題目，第二條、第三條，我係咪咁黑仔，頭三條都未見過嘅？ 好很驚喎。。。 好彩，之後嗰廿條都見過晒，仲好似摩打手咁 click click click 就做完，估計都係五分鐘嘅事。 隔離個亞叔見我咁快起身走人，佢用咗一個好疑惑嘅眼神望住我，odd 咗。 出去拎返啲嘢，一落樓打開電話就收到 email，順利過關。
題庫：https://lifeintheuktestweb.co.uk/exams-1-12/
