由於仲有部份家當係諗住直接用喼帶上機跟人走，點知實在太多，可以點搞呢？ 又咁啱有人喺 facebook 話可以代安排用 ups 寄件去英國，明知貴啲，但點都平過用航空公司嘅行李託運，自己又無咁多對手可以拎到上機，上到機又無能力拎到咁多去 airbnb。 就係咁，又再 pack 箱，總共又 pack 多咗十幾箱出嚟。 今次時間真係太緊迫，真係無辦法安排運過去英國，唯有將呢十幾箱嘢放咗去朋友屋企，等我到埗之後再安排 ups 去朋友度收貨。
終於到最後一日，仍然努力清緊屋企嘅垃圾，仲要朋友嚟幫手先執得切。 上機前 2 個鐘先出發去機場，到達機場時得返 1 個鐘 check in，最後仲要因為行李過重, 而要執走啲物品留畀朋友再幫我一次過寄 ups 先可以順利上機，而家諗返都覺得好驚險。
所有香港家當都喺五月順利到達英國，雖然都有部份物品有損爛，但總體都叫 ok。 大家打包時記得乜都包多一重，或者喺物品同物品中間再加多幾張紙嚟做緩沖，千祈，千祈，千祈唔好慳，亦唔好一箱放太多嘢，真係會壓爆，壓爛㗎。
如果你問我而家會再點執法，我諗我會：
- 早半年前已經要開始執拾舊衫，分門別類：慈善機構、掉嘅、一半 ( 夏天衫同冬天衫 ) pack 箱
- 早半年前已經要將無用嘅嘢拎去掉
- 早半年前已經要開始賣走啲唔多用或者多餘嘅電器或者其他唔等駛嘅嘢。
- 早 4 個月前開始變賣傢俬、電器。 洗衣機、電視呢類可以 1 個半月左右先賣，因為你可以同買家講遲啲先交貨，好多買家都肯。
- 差唔多 1 個月左右要清晒廚房無用嘅調味料、食材，包括埋雪櫃裡面嘅嘢
- 1 個半月前左右就將啲碗碗碟碟、煲煲叉叉就 pack 晒入箱，留返幾套你喜歡嘅碗碟跟身帶上機過英國
- 五金類嘅嘢照 ship 嚟，雖然有指引話唔可以 ship，但我無理到。 最好電批同埋一兩枝螺絲批跟身上機帶過嚟，因為你租/買到屋之後，你所有傢俬都係要 DIY，搵人嚟安裝勁貴
- 風扇、AirFryer，細型按摩倚、蒸焗爐或者你喜歡嘅電器，我都覺得可以帶去英國。因為呢邊無咁多款，又貴
- 電飯煲如果可以跟身上機就跟埋上機，因為你初頭落地都未必會習慣日日食薯條漢堡包
- 香港睇中乜嘢款嘅波鞋就買定，pack 箱 ship 過嚟。 呢邊無咁多款，而且好貴
- 成藥、清熱酷、奶茶呢啲食用品，可以買多少少跟船 ship 過嚟
- 尿袋都買定多幾個，電話、手提電腦都可以買定新款帶過嚟，呢邊又係勁貴
- 唔太建議 ship printer 過嚟，除非你部 printer 新買。 因為你落地之後要 print 啲嘢出嚟寄去 Council 或者 scan 簽咗名嘅文件再 email 去政府部門，你無理由等 2 個月先搞呢啲嘢㗎。 加埋有可能呢度嘅 ink 同你用開嘅型號會有分別，到時你嚟到係買唔返你嗰款 ink 㗎
- 有乜淘寶嘢要淘就一早淘定，跟船走
- 大量零食跟船走
就係因為我哋太遲先執嘢，搞到自己時間好緊張，連最後去香港其他地方行下都唔得。 呢個係我覺得最可惜嘅！
