Skip to content

2019 沖繩復活遊 (外母篇)

今次係第二次同外母去旅行, 之前一次就係去新加坡, 不過嗰次就全程做團友, 乜嘢都有八姨打點, 專心去食玩瞓.  但今次由於係我做領隊, 外母又唔係太行得耐, 所以行程上都會編排得比較 hea (其實不嬲自己一家去都係 hea).    從外母話一齊去旅行之後, 就開始 plan 行程, 搵酒店, 務求今次旅行唔好要外母覺得辛苦, 要輕輕鬆鬆.

 

理想: 上網睇過, 四月份天氣大約都係 21 – 29 度左右, 即係唔會太涼, 又唔會太熱, 不錯.  仲同外母講話會去沙灘或者喺酒店游水添.

現實: 天氣不似預期, 原來四月份天氣嘅 21 度都好鬼清涼, 加埋有一兩日雨, 根本無可能落水…….  外母因為比較怕凍, 所以成個 trip 都覺得凍, 而兩小妹就好失望, 無得落水玩!!

 

理想: 儘量都安排一啲有熟食嘅餐廳食.  可以畀外母同兩個小朋友食熟食, 自己同老婆又可以食魚生, 海膽飯咁.  最重要係一早安排好晒啲早餐畀外母, 唔怕會餓親佢.

現實: 由於實在食得太多, 外母成個旅程都話我哋不停咁食, 邊可能食到咁多嘢, 所以見佢只係早餐食得多之外, 其他都唔太食, 驚食得太多會頂住個胃.  不過好彩臨尾老婆帶佢去食嗰碗拉麵, 佢話勁好味, 都叫做有嘢佢啱食.

 

理想: 如果只係自己一家去就會搵民宿住, 但係今次為咗唔想外母住得唔舒服, 全程都係住酒店.  仲要 book 埋有早餐供應嗰隻添.  真係驚佢會早起身走去附近搵嘢食.  真係驚會餓親佢, 到時畀佢話去旅行食唔飽就唔好啦.

現實: 酒店有酒店嘅好, 位置首先都叫唔錯, 設備, 食物水準都 ok.  外母都應該滿意嘅.  而且好彩係 book 家庭房, 臨出發時, 外母都問係咪佢自己一間房, 佢話自己唔可以咁樣一個人, 所以好彩我 book 嘅係家庭房, 大家一齊住, 唔駛分開住.

 

理想: 租咗架七人車, 畀佢舒舒服服坐車車去旅行, 點對點景點服務, 完全唔需要行太多, 又唔需要諗搭乜嘢車.  一跳上車就出發, 一跳落車就去參觀, 食飯, 玩….

現實: 七人車係一定要, 實在太多行李, 3大2小, 五人車一定坐得唔舒服. 雖然大部份都可以點對點, 但係景點裡面都要行嘅, 外母都有時會表現出攰嘅樣.  但總括嚟講都唔會去太多地方, 一日都係一個半個景點, 都有足夠時間佢休息.  

圖片取材自 jpninfo.com

Published in周遊列國

Be First to Comment

Leave a Reply