Skip to content

取消~取消~ Because of WUHAN

取消~取消~ Because of WUHAN

由於武漢肺炎, oh…. sorry, 根據世衛嘅命名, 應該係叫新冠病毒 (Coronavirus / COVID-19).  不過唔好意思, 我都係習慣叫武漢肺炎.  由於呢隻病毒, 搞到我今年嘅旅遊大計全部都亂晒, 亦都唔知幾時先可以去到旅行.  一隻可能係人工合成嘅病毒肆虐全球, 所有航班都取消, 各國都暫停非本地人入境, 有啲甚至唔畀旅客去嗰啲高危國家.  就算畀你飛到去, 都要 14 日家居隔離或者檢疫隔離.  搞成咁, 你仲邊有心情去旅行.  加埋網上好多新聞都話搭飛機好高危, 個個戴晒護目鏡, 戴晒口罩, 著晒雨衣先上機, 睇到以為自己搭緊架生化飛機.

原本打算復活節假去南韓, 開頭都只係亞洲地區有零星疫情, 點知 2 月中開始亞洲地區出現爆發, 大陸, 香港, 澳門, 台灣, 新加坡, 鑽石公主號.  而南韓差唔多 2 月尾突然爆出大邱市有過百人出現病徵, 仲開始愈嚟愈大件事, 新天地教會出現大規模感染, 搞到香港政府宣佈封南韓關, 而大韓航空都隨即取消所有航班, 跟手我就收到電郵話取消咗班機了.  初時都諗緊復活節應唔應該去, 因為有可能兩小妹嘅復活節假會縮短, 話晒成兩個月無返學, 要追返課程唯有濃縮一下假期.  加埋都唔知呢個肺炎究竟幾時會搞得掂, 都有諗過自行取消機票, 不過我比較 cheap, 唔想蝕咗機票, 自行退票要畀手續費, 又拎唔返晒機票錢.  如果航空公司主動話 cancel flight, 咁我就可以 full refund.  哈哈, 終於等到, 而家可以全額退回.  (究竟係好事定唔好事呢?  即係疫情有排都未搞得掂?) 經 agent 訂機票當然係打去同 agent 講退票啦, 唔會揀 re-booking.  初時以為都係一個月左右就可以退到票收返錢, 原來要等成 4-6 個月先收得返錢, 真係要 mark 低先記得自己有退錢呢回事.

搞完呢單, 又要搞另一單, 就係工人姐姐回老家嘅機票, 又係一早訂咗, 而家航空公司話取消班機, 又係畀你退票或者 re-booking.  姐姐就好想返老家, 但係我哋覺得 re-booking 都係有風險, 所以都係退票先, 等呢個疫情真係過得七七八八, 航班大部份變返正常先再訂過會穩陣啲.  今次直接同航空公司訂, 應該可以收錢收得快啲啦o掛….

呢兩單係一早訂晒機票, 但係原來已經計劃好暑假再去一次台中, 花蓮, 台東, 高雄 14 天遊, 而家又無啦….  雖然教育界嘅老師話唔可以 cut 咗暑假, 暑假係一定要放.  但係我都唔理佢 cut 唔 cut, 我反而擔心係個武肺到暑假都仲未搞掂, 雖然而家 book 機票好平, 不過都係唔好搏啦.  

咁你可以 book 聖誕o架嘛…..  大佬, 咪玩啦!  呢個疫症真係好得人驚, 搭 lift 11秒都可以傳染到, 出現高峰期係遲早嘅事.  而家美國同歐洲地方都仲未算有好多人感染, 但頭先所講, 呢隻肺炎係好容易就傳染到畀人嘅話, 只要美國同歐洲等地方都陸陸續續出現病例嘅話, 高峰期就應該不遠矣.  我估計未來兩個月就係關鍵期, 究竟係肺炎繼續肆虐, 定係人類發明咗疫苗打敗肺炎呢?  所以聖誕咁長遠嘅事, 都係再等多兩三個月先算啦.


Updated on 17-Sept-2020

寫完呢篇嘢之後過咗2星期左右, 突然見到 wefly 結業清盤, 成個人癲咗.  唔係咁大整古嘛, 我就係透過呢間代理買機票, 佢仲答我 4-6 個月會退款.  天呀, 嗰下見到呢個 news 真係想死.  即刻去討論區睇下, 原來有好多人都喺度呻, 亦好好彩有好多有經驗嘅人教路應該要點做.  大路諗, 係咪 應該搵旅遊業議會幫手, 但係原來係唔 work 嘅.  佢哋只係會叫你自行打去搵航空公司, 去搵消委會…  網上嘅人反而叫你打電話去銀行信用咭中心, 去申請 “沒有收到已購買的貨品” 退款賠償.  當然呢個退款賠償間間銀行都有唔同流程.  好似我用 DBS 信用咭, 佢係接受訂購不超過 540 日嘅申請, 但係有啲銀行就只有 60/90/180 日, 過咗就唔會接受.  好彩我次次都用 DBS 嘅啫.  打去 card center 問, 由親身交 form 到真係退到款, 足足有 6-7 個星期.  耐唔緊要, 最緊要可以收返筆錢.  今次都係一種經驗, 都學到嘢.

原本諗住同航空公司訂, 應該會好快就可以退到款.  今次喺 Cebu 航空訂機票, 佢無得上網站退款, 要親身打電話去, 點知一駁通, 弊….  要講英文!!!  唯有死死哋氣集中精神去聽, 好努力去講要退款嘅事.  講完就話會 send 條 link 嚟畀我去申請退款, 頂, 點解唔可以喺網站度貼呢條 link 出嚟呢?  好啦, 等佢 send 咗嚟之後, 跟住網頁操作申請退款, 點知佢居然會扣咗 HK$150 做手續費, 之前明明電話講明係 full refund o架嘛!!  唯有又死死哋氣再打去問, 跟住又要同佢搏鬥, 講完一大輪, 確認咗係 full refund, 唔駛理網頁所寫嘅嘢, 佢哋內部會跟進, 退返足晒畀我.  好啦, 按制退款啦, 然後就收到 email 話信用咭嘅 3-4 個 billing cycle 會完成退款.  咁我咪等下囉, 等下, 等下, 三個月都過去咗, 都仲未收到退款, 咪諗住試下send email 去問, 但係網頁居然搵唔到, 反而見到佢叫人喺 twitter 問問題, 好囉, 唔駛打電話.  留咗 message 都等咗成個星期先有人覆, 話已經退咗, 可能係銀行過數問題, 叫我再等下.  又再等, 又再過咗一個月, 又再追, 又係相同說法;  每個月都去問一問, 都係相同答法.  正當諗緊係咪間嘢都唔掂, 所以一直唔退呢?  正想再去銀行試下申請退款, 終於等到佢嘅退款, 足足 6 個月先退到….  真係等到人頸都長.

Published in談天說地

Be First to Comment

Leave a Reply