Skip to content

荃灣區籃球聯賽 – 第七場

日期 : 16/July/2007 晚上 10:00
地點 : 荃灣西約體育館
賽果 : 37 : 32 (PISA vs Fire)

抖o左兩個星期左右, 我o地又再迎戰另一場o既對手 – Fire.  今場都唔叫做人齊, 都係仲欠我o地o既首席三分射手 Andy.  不過相對上一場o黎講, 人腳叫做齊整好多……  而今場亦去o左另一個室內場比賽, 就係荃灣西約體育館, 即係荃灣麗城花園三期側, 地方都幾偏遠, 我係公司坐 234x 去, 都要成半個鐘先去到!!

眼見對方, 個個都叫做高大, 心想又係一場硬仗.  開波後五分鐘, 我o地居然領先成 8:0, 唔知係咪咁, 跟住大家都好穩陣, 傳波, 傳波到有空位先射, 但係其實又傳唔到空位出o黎, 最後連進攻時間到, 要好倉促咁出手, 或者係變成 turnover.  最後當然係比人打亂晒o的節奏, 比人從後趕上, 兼領先五分進入第四節!

第四節開打前, 唔知係咪隊友們都唔想再輸, 唔想四連敗, 大家係咁互相鼓勵 ( 粗口滿天飛 ), 什麼做好搶籃板工作, 走位多o的.  大家調整之後, 再加埋教練出o黎負責做分波工作, 我同 AC Andy 可以專心做返 shooter,  結果係幸運之神都係眷顧我o地….   係完場o個一刻, 大家都興奮, 好開心, 就好似幅圖咁, yeah!!!!! 

賽後, 我真係謝晒.  隻腳仲有少少抽筋o既感覺, 係沖涼o既時候, 都要做拉筋伸展動作…  雖然唔係叫大勝, 又唔係贏得清脆, 但係好有滿足感!  好緊張, 好耐都無咁集中過, 係最後一節, 我只係知道我要儘量找空位o黎射波, 就算有人飛撲過o黎, 我都好似當睇唔到咁, 真係從未試過咁有集中力!

近呢兩場波, 得分都有雙位數, 希望一路都可以 keep 住呢o的手感, 幫到球隊贏波啦!  

Published in運動

Be First to Comment

Leave a Reply