Skip to content

荃灣區籃球聯賽 – 第八場

日期 : 30/July/2007 晚上 09:00
 地點 : 青衣室內體育館
 賽果 : 38 : 36 (??? vs PISA)

 近排賽程比較密, 差唔多隔一個星期就有比賽, 感覺好好…  真係好似打聯賽咁, 好好 feel.  今次對手同樣唔記得叫乜名, 真係要諗下辦法, 點先可以記低對手o既名.  好, 講返比賽先, 今次我o地又去o左另一個場地比賽, 青衣室內運動場, 之前都係呢度打過, 對呢個場o既評價都唔差, 整體感覺幾好.

今次人腳都叫齊整, 三分射手歸隊, 有高佬 Simon, 有 AC Andy 等等, 全部主力都到齊, 真係開心.  開賽前都有諗過, 只要無乜差錯, 都應該可以勝出.  我唔係睇唔起對手, 只係感覺球隊人腳齊整, 如果打出水準, 比較有把握可以贏波. 

點知一開波, 就一路比對手襟住o黎打, 其實兩隊都勢均力敵, 比分上落都係十分左右, 只要雙方稍有錯失, 戰局隨時改變.  整場比賽去到第四節我o地仲輸緊 9 分左右, 應該都有得追, 所以我o地一開始就稍為谷前少少, 儘量去騷擾對手, 唔比佢o地咁輕易傳球.  當然戰術係奏效, 到o左最後一分鐘, 我o地已經追到只係落後 2 分.  我o地當然繼續去施壓啦, 而我o地亦再次成功, 得到一個快攻o既機會, 當 Kenneth 係後場快速推進去到對方籃底走籃成功後, 就係呢個時候, 聽到”嗶”一聲, 轉頭睇見裁判吹罰, 進攻犯規…..  即時走去跟球證理論, 但最後唔成功!  唯有再次努力防守, 時間去到最後 3 秒, 可以作最後一擊, 我o地叫o左暫停去佈局, 而戰術亦成功執行令到三分射手去處理最後一球, 但可惜, 唔知係咪有人撞到o既關係, 三分射手係準備起手一剎, 甩手……  比賽結束!!

今次真係可以話, 無計…. 只可以怪自己球隊發力太遲.  如果比多一分鐘, 應該有機會可以平反敗局.  不過可惜, 呢o的都係空想, 唯有寄望下場再次努力, 爭取勝利!!

Published in運動

Be First to Comment

Leave a Reply