Skip to content

Death、新生

十一月經歷o左一個親人o既離去,然後又一個新生命o既誕生。感覺好奇怪?!

人o既生命真係好奇怪,有o的人可以活到百歲,就算係又煙又酒,一樣可以;但係有o的人乜都唔好,無煙無酒,早早起,偏偏就英年早逝。究竟點樣先可以做到長命百歲?真係…..!好似係十一月頭,返屋企食食吓飯,老媽子話十一月七號去表弟兆明o既葬禮,當時真係愕o左然,點解無啦啦會死o左?雖然近年都知佢身體係差,但係唔係差到咁,話去就話,感覺唔係咁舒服。

表弟同我係同齡,佢只係遲我一個月出世。自細表弟雙眼已經有問題,醫生話佢到十三四歲可能會失明,所以有幾年o既暑假,佢都會過o黎我o地屋企住一排(因為佢係住九龍區,入o黎係體驗一下鄉村生活)。唔知係咪叫好彩,表弟最後只係有弱視,但係都係要靠人扶,行動變得不便,不過真係估唔到最後佢係會因為 cancer 離開。去到表弟個葬禮,因為表弟係一個基督徒,什麼過金銀橋,跳火盆都無, 只係好簡單,一大班弟兄姊妹送表弟最後一程。我可以做到o既只係安慰一下姨媽姨丈一家人。

當一個親人離開,個感覺真係好差,希望我身邊o既人都可以快樂咁健康咁生活。

當一個生命結束o既時候,就會有另一個新生命o既誕生。而呢個新生命就係我家姐所生o既細 B。不過呢個細 B 真係家姐搵命搏返o黎o架!話說十一月十六號家姐入住等生,但係都o左十八號下午六點幾都未夠開口度生,所以醫生提議不如開刀啦!就係咁,當我係老家食完飯返屋企打緊 Wii o既時候,接到老媽子o既電話,話家姐生o左,但係從電話入面把聲可以確認到一定有事發生,跟住就係知道家姐入o左深切治療房,當時真係又愕o左然,好緊張,好擔心,而老媽子就不停咁喊,而自已就要鎮定咁講,無事o既,放心啦!跟住就飛的過去醫院了解情況。

詳細情況其實都唔係好清楚,不過大概係咁樣!事緣家姐生細 B o既時候,醫生唔小心掂到以前開刀o既傷口,唔知發生乜o野事,拎o左細 B 出o黎之後,家姐一路都流血不止,需要轉到深切治療房,醫生話萬一真係止唔到血,為o左保住性命,就要犧性子宮,不過好彩,經過兩日o既深切照顧,終於可以轉返普通病房。而家細 B 同家姐都已經返o左屋企休養,所以細 B 將來你一定要孝順父母呀!

而家終於知道媽媽o既偉大,真係分分鐘為o左生你而無o左條命! 想睇 BB o既風采,就去回憶集啦 

同一個月, 分別有死亡、新生,都係自已親人,個感覺到而家真係好難講。世事好多o野都好奇妙,好多變化,所以大家都要愛惜珍惜自己身邊o既人。

圖片取材自 hksgi-sd.org

Published inHome Sweet Home

Be First to Comment

Leave a Reply