7月18號, 星期三, 下午三點. XX企業中心大堂.
由細到大, 都無乜o野怕. 睇醫生, 打針, 食藥, 比亞媽老豆打, 都唔怕. 就算細個係山碌落o黎, 跌斷手, 都唔怕, 好番後照上山玩. 機動遊戲, 什麼高速過山車, 跳樓機, 鬼屋, 照玩. 以前乜都唔怕, 總之新鮮刺激o野, 點都去玩一次! 無悔一生嘛!!
唔知點解大大個, 個人都開始細膽o左. 好似笨豬跳, 我諗我真係唔敢玩. 但係原來我有一樣o野, 真係從來都未試過. 好似電視廣告咁講, 成日比藉口自己, 話今日唔舒服, 去唔到! 而家去, 人o地都收工! 唔知道邊度有, 點去呢? 不停不停咁比藉口自己.
我講緊乜? 咪就係捐血囉. 今次田氏同紅十字會合辦o左一個捐血活動. 原本都無打算參加, 比o左好多藉口自己. 話要去個客度, 近排身體差, 唔適宜捐血, 所以都無報到名.
就係當日, 同班同事食完午飯, 見到捐血站已經設置好. 同事亞明就話, 一陣落o黎捐, 又再次叫我一齊去, 話我咁大隻, 無理由唔去, 加埋我仲未知自己係乜o野血型, 理應借今次機會去驗一驗, 順便 check 下自己有無乙型肝炎都好. 就o係考慮中, Catherine 突然話我: 你話晒都屬於半個運動員, 點都要去捐一捐啦! 跟住 Albert 附和話一齊去, 理由係佢都係第一次捐, 你無理由怕嘛. 當然, 就係咁比人激一激, 去咪去! 當然我無咁順攤啦, 死都要搵人陪, 而斐斐就係我另一個目標, 因為佢都未捐過血, 就係咁, 我o地一行五人, 就咁落o左去捐血啦!
捐血之前要填好多o野, 証明自己無病無痛, 身體健康! 跟住仲要比人啪手指, 做血液測試, 睇下你可唔可以捐血. 當然我順利過晒咁多關啦! 瞓o左o係張椅度之後, 護士小姐走過o黎解釋一輪, 就話而家要抽血啦, 問我要唔要打麻醉針, 當時我眼都大晒, 反問……… 
? 乜好痛o既咩? 有幾痛呀? 佢就淡淡然咁答, 頭先啪手指痛唔痛? 我話普通啦, 咁佢又話, 咁你唔駛啦, 直接抽血啦! 說時遲那時快, 佢突然拍我幾下, 跟住就話插o左啦! 嘩, 真係無感覺喎, 插o左啦? 過o左一陣, 450cc 咁就奉獻o左出o黎! 當護士小姐再次走埋o黎幫我拔喉o既時候, 我見到原來支針好粗o架, 仲見到個針口好大, 拔出o黎o個下, 痛呀, 仲痛過插入去o個o野!!
而家等四星期, 咁就會知道自己係乜o野血型啦, 多年o黎唔知o既答案, 好快就會知道. Yeah~~~
你問我會唔會再捐, 我都係仍然答你, 睇下點先啦!! 哈哈!!
圖片取材自 feminine.com.my