記得早兩個月前先寫o左篇靈魂之窗, 估唔到今日又要寫多一篇關於眼睛o既文章!
呢兩次都係講眼, 都係左眼! 唉……… 今次已經好小心, 好醒目, 一發覺有唔妥, 已經拿拿臨去睇醫生, 仲要打埋針, 諗住今次無事啦o掛!!
點知過o左成個星期, 好似無乜好轉, 今朝起身仲發覺平時已經唔係大o既眼睛, 居然係成一直線, 無o左眼珠呀!! 拿拿臨去睇返自己o既家庭醫生, 醫生檢查完之後, 擔心係細菌感染, 即刻寫紙要轉介去屯門眼科中心做檢查!
去到屯門, 醫生檢查完之後, 睇埋病歷, 跟住
醫生: 又係生瘡! 仲要係生兩粒添, 左右每邊各一粒, 一粒大一粒細! 割唔割? 割晒定係割大唔割細?
我: 嘩, 咁鬼多選擇(心諗). 醫生, 你 perfer 係點?
醫生:可以割大先囉, 睇下粒細會唔會謝.
我: 係咪一定會謝先? 唔謝又點?
醫生: 唔係一定會謝o架, 唔謝你咪又再o黎比我割多次囉!
我: 咁呀, 醫生, 你一獲割啦!! 我唔想又再o黎探你呀!
短短十幾分鐘o既手術, 真係好難頂! 雖然經過o左上次, 話晒有經驗, 但係都係好痛!
我今次問o左醫生, 有乜辦法唔會咁易生蒼, 點知醫生話, 無辦法, 佢話生過就會生, 割開就要成日割, 佢有個病人, 差唔多每一個星期左右o黎一次比佢割, 佢都唔知點解會咁…. 生開就好容易會再有, 唯有自己小心, 注意飲食, 注意衛生, 最重要係如果覺得有瘡, 開頭就用熱雞蛋碌眼喎….
天呀, 救命呀! 有無人可以話比我知, 點先可以避免生眼瘡呀? 我唔想成日去探醫生呀!!