自從之前用過 hTC Magic 之後, 深深愛上o左 Android
系統. 但可惜, Magic 比人偷o左之後, 一路都揀唔到一部自己喜歡o既手提電話, 一路等, 一路等”佢”o既出現. 係等待過程中, 雖然都有過心動o既電話出現, 好似 hTC Desire, Sensation, Incredible, Samsung o既 Galaxy S等等, 不過唔知點解, 衝動好快就過o左, 反而係中途就加插o左一部 Samsung Galaxy Tab o既出現.
可惜, Galaxy Tab 雖然有電話功能, 但係我唔會用, 只係會當佢係一部流動電腦, 用o黎解決客戶問題, 睇電郵, 上網消閒等等… Galaxy Tab 真係幫到好大忙.
今年 2011年初一個美國展覽會, Motorola 發佈o左一部新機, 當時一睇, “佢” 終於出現啦~~~ 講真, 佢個樣其實好普通, 一D驚為天人o既樣子都無, 但係唔知點解, 真係好喜歡. 當三月份美國率先發售時, 香港已經引入咗水貨, 但係價錢真係嚇一跳, 居然賣成六千幾銀. 唯有等, 睇下幾時跌價, 而係等呢個過程中, 真係好辛苦. 就好似之前咁講, 有唔同機款出現, 亦都令我有心動過o既感覺, 差D放棄o左”佢”.
終於皇天不負有心人, 七月份, 終於等到行貨都跌價, 加埋搵人係人仔台出機, HK$3680就可以拎走, 真係開心到爆. 講開未買機前, 其實都有睇過 Samsung Galaxy S2, 佢真係一部好機, LCD 靚之外, 機能硬件配備真係超班, 可以話係機皇. 講到咁好, 做乜唔揀佢? 哈哈, 原因係佢個價都幾貴, 開價$5280, 真係唔捨得. 反而 Atrix 自從五月份行貨推出以來, 售價不斷受其他機衝擊, Mo 記今次真係變得好進取, 無再自視過高, 終於將售價一減再減, 再加埋人仔台優惠, 咁就令我……. 衝呀, 衝呀, 衝呀!!!
部機其實大約都知道有乜問題, 因為之前幾個月, 都留意好多關於部機o既討論, 心理已經有晒準備. 不過用o左幾日, 除o左係超食電之外, 其他都無乜話有特別問題. 而家希望 Mo 記快D出 firmware update, 咁就可以改善食電問題同埋可以更加暢順.
圖片取材自 gadget.ro