日本，都仍然係嗰個日本，啲人都算 nice，街道仍然咁乾淨，列車仍然係咁準時，房間仍然係咁細，嘢食仍然係咁好食，藥妝仍然係有咁多嘢買，Lawson 仍然周街有， Family Mart 仍然成行成市，自動售賣機多到離譜，周街都係有咁多可愛嘅日本娃娃，仲有好多都無變。
變嘅係列車站頭職員識講普通話，列車售票處職員識講普通話，有專接待外國遊客嘅的士，店舖都有識講普通話嘅職員，通街都係講普通話嘅旅客，店舖接受支付寶，wechat pay 都唔接受 Google pay。
大阪，有現代化嘅高樓大廈，又有古舊嘅日本房屋，仲有世界文化遺產嘅建築物，寺廟，真係新舊交融嘅地方。
大阪，值得再去，因為我都仲有好多地方未去，心齋橋，黑門市場，通天閣，神戶outlet，真係數都有排數，數到斷氣都未數完。呢啲未去嘅景點，就唯有留返下次再去啦。
大阪，真係適合一家大細去嘅地方，所有景點都可以搭 JR 或者地鐵就去到。食嘢又方便咗，因為好多餐廳都有提供中英文 Menu。食物口味又適合大小朋友，壽司魚生唔在講，有飯有麵，仲有燒烤，中西日，總有一樣啱你食。