深圳灣半日遊。 原本三四月去,拖到今日先有時間約齊人去。仲要我一拖五美女去,真係艷福不淺。 今次去都只係打算去下 Line Friends Cafe & Store, 等亞囡們去同啲大公仔影下相,所以就約咗一點係深圳灣口岸等,過關再搭M299巴士係海岸城落車(車程大約十五分鐘)就得,好方便。去到門口,妹妹見到大型 Brown 公仔係門口,已經急不及待跑咗過去要影相。因為實在太肚餓,我哋就先去搵咗個位坐低,然後去買嘢食。呢度嘅價錢其實同香港差唔多,所以唔好諗住食平嘢,但係啲嘢食都幾好,對得起個價錢,不錯。 食飽飽,班美女就去晒store睇嘢影相, 我就自己一個繼續係度睇下手機上吓網等佢哋返嚟(因為三月嘅時候我已經嚟過兼影咗好多相)。都唔知經過幾耐,佢哋返嚟之後又話要試埋啲 cake 甜品先。 咁樣就 hea 咗一整個下午。 圖片取材自 www.gotrip.hk