Skip to content

秀儀 、Thomas 結婚之喜

11月4日係公司同事 Thomas 同秀儀o既結婚日子, 係度講返句恭喜你o地先, 除o左恭喜之外, 當然梗係唔少得, 百年好合, 永結同心啦!!!  最重要係快手快腳生個 BB 出o黎啦!!  之但係生 BB 要駛好多錢o架, 又要食又要讀書, 好似滑浪風帆o既奧運金牌得主李麗珊咁講, 要成四百萬o架, 所以你都係比心機努力返工搵錢養老婆仔女啦!!  贈多你兩句, 生意興隆, 事業有成!! 飲杯~  

結婚當日又係一個字 – 累, 朝早五點半起身, 七點前要到男家屋企, 真係未試過咁早起身!  瞓得o個三個幾鐘就要起身, 簡直係攞我命!!   不過鬼叫應承做兄弟咩, 點都要頂硬上!!  以為去男家有乜o野要幫手, 點知去到原來乜都唔駛幫, 只係等主車到, 跟住八點就出發接新娘!  唉~~  點解唔叫我去新娘住o既地方等你o黎呢, 咁我可以瞓多一個鐘呀!~~~

今次玩遊戲又係打算o黎個速戰速決, 點知~~  班姊妹o的遊戲都唔係玩兄弟, 只係玩新郎, 全部都係o的乜乜愛的宣言, 愛的歌唱, 大佬, 呢o的遊戲真係唔係兄弟可以玩, 兄弟唯有乖乖咁企晒係度, 新郎哥自己攪掂啦!!!

今次o既安排總體o黎講都叫順利, 無乜意外, 其中只係無一個總指揮, Thomas 哥就話呢個總指揮係自己, 但係佢係乜o野planning 都無, 加埋自己到時只係一個佈景, 企定定影相, 邊有時間去安排其他事呢?  例如安排座位, 安排AV播放, 安排影相, 安排乜乜物物…..   唉~~~  唯有 Albert 同我一齊去安排啦!!  Thomas, 你點都要再請食飯呀!! 

係, 講下遊戲節目先, 當中有一個環節係要 Thomas 抱起秀儀, 然後一路唱歌, 一路行去每一圍度, 跟住折返返上台, 理應一首歌應該夠時間, 但係 Thomas 係返上台o既途中, 真係手軟, 抱唔起秀儀,  乜秀儀好重咩?  定係 Thomas 結婚前一晚因為緊張失眠(哎呀, 唔應該講)而導致體力下降呢? 

PS:  Thomas, 記住呢首歌啦 - 愛是這樣甜

 (Thomas 婚後預測)

圖片取材自 www.desicomments.com

Published in朋友

Be First to Comment

Leave a Reply