Skip to content

Toto 恆溫龍頭忽冷忽熱問題

Toto 恆溫龍頭忽冷忽熱問題終於解決…. (感動)

話說今年四月份去咗 amazon JP 買咗個 Toto 恆溫龍頭, 趁住工人姐姐嚟之前換埋睡房個沖涼水龍頭. 因為之前用緊嗰個係國產不知明嘅恆溫龍頭, 將呢個不知明嘅國產龍頭換去廳沖涼房畀工人姐姐. 換呢個 Toto 水龍頭真係一波三折. 

首先, 原來 Toto 水龍頭係 4″ 頭, 但係牆身係 5″ 頭…. 去買咗個 5轉4 嘅頭嚟裝, 裝完之後發覺勁樣衰, 而且漏水…..(無奈) 跟手再用力扭牆身個位, 諗住扭實D再包水喉膠布, 點知一扭再扭, 扭甩咗牆身個頭…. 心諗, 呢次大鑊了, 牆身喉都畀我扭爛咗…. 再睇再睇之下, 發現原來牆身裡面原本係 4″ 頭嚟, 原來係香港買嘅水龍頭係 5″, 所以要一早係牆身加轉頭. 呢刻先發覺自己嘅無知. 但係另一方面, 曙光出現啦, 我要扭甩埋另一邊嘅轉換頭… 

點知扭咗成半個幾鐘, 扭極都扭唔到, 上網睇, 原來要用扳手嚟扭先得, 屋企邊有呢樣嘢, 無奈之下唯有放棄, 第二朝一早起身 call 師傅嚟換, 師傅兩三下手勢就搞掂咗… 呢啲錢真係要畀人賺. 不過我學識了, 下次可以自己搞到, 唔駛畀人賺.

以為可以開開心心用新恆溫水龍頭沖涼, 點知……. 沖一次涼, 大約十分鐘左右, 居然啲水係會忽冷忽熱, 沖得好唔高興. 不過剛剛先經歷咗安裝嘅困擾, 都未有心力再解決呢個問題. 跟住一路都無乜時間得閒去解決, 加埋夏天嚟到, 都唔急去解決. 對大人都唔係一個問題, 一冷就扭大熱水, 但係小朋友自己沖時就成鬼日大嗌, 好冷好熱……

今日終於的起心肝, 上網搵 manual, 再去 google 大神搵答案. 終於……畀我搵到答案!!

原來……由於我家嘅熱水爐係3相電即熱式. 當我開水時, 由於恆溫關係, 熱水出口只係出一小部份嘅水, 好大部份會留返係水喉度, 咁變相個即熱式熱水爐會以為水溫過高, 會停止加熱, 咁即係當我沖沖下, 就會變凍水, 熱水爐感覺到唔夠熱, 咁先會再加熱, 咁我又可以再享受熱水…. 不停咁循環又循環, 忽冷忽熱就係咁產生咗.

解決方法好簡單, 就係將熱水爐個熱度調低, 唔好調最高, 可以由低慢慢調高, 測試一下去到邊個溫度係最好…. 

今晚終於可以沖到一個舒舒服服, 溫溫暖暖嘅涼… 爽!!

Published in談天說地

Be First to Comment

Leave a Reply