4 月時終於安裝咗寬頻，雖然 ISP 公司有提供 WiFi Router，但係始終都想用返自己個 Router，上篇有講過點樣將隻 Router 轉做 Modem，然後就可以用返自己隻 Router。大家唔記得可以睇返之前篇文。
如果大家熟悉電腦，大家多數都會揀 Asus、Linksys、D-Link、NetGear 呢啲大牌子。我本身用開 Asus，之後就換咗 Synology RT2600AC，由 2017年用到而家，差唔多五年，都到咗退役年齡。 加埋老婆經常話接收唔到 WiFi (其實我又無發生過呢個情況)，咁啱見到 UniFi 嘅 Dream Router 有貨，即刻就落單買咗返嚟。大家可能唔太識呢個牌子，其實呢個牌子喺台灣，歐美都好出名。台灣 Group 仲經常話如果你買咗一款 Unifi 嘅產品返嚟之後，佢會自動 “增生”。乜嘢意思？ 意思就係你會不自覺一直去買 UniFi 嘅產品，一隻變兩隻，兩隻變四隻，好誇張。當然會出現呢個情況，完全係因為用過之後你會深深愛上佢嘅強大功能，靚靚界面等等……
今次由購買到收貨都只係用咗大約一星期，都算快。個 Packing 都好簡單，一部主機，一條電源線，說明書。主機係隱藏式天線款，中間有個 LCD 螢幕仔顯示速度 (好鬼靚)，成部機一體化 (好鬼正)。欣賞完即刻開機做設定，開頭唔知係咪自己設定得有問題，初初用落發覺成日斷線，速度好慢。無理由呢隻牌子畀人讚到上天花板，但係自己用落又咁差，一定有問題。通常經常斷線係由於 WiFi Channel 撞咗，但係呢度啲屋唔似香港咁密集，無理由會同隔離屋撞 Channel。不斷嘗試改 Setting，又試埋換 Network Cable，又停埋個 Threat Protection，情況都係咁上下，無乜改善。嬲嬲哋 Factory Reset 成隻嘢，上網睇下啲教學，終於叫做搞掂咗，速度快，穩定。 不過始終係隱藏式天線，接收範圍顯然無 Synology 咁大。之前 Synology 我換咗 4 條 12dBi 天線，唔知係咪咁關係，所以連洗手間都接收得好好, 而家就比較差。
UniFi Dream Router 可以透過 Webpage 或者 App 去做 Control，而且個界面仲好靚。佢最正嘅地方喺一個界面已經控制晒所有設備，你唔需要去各自設備 IP 嘅界面做設定，一個 UniFi Console 界面就搞掂。由於一個咁好用，咁正嘅 Conosle 出現，你就會不自覺咁去買埋其他 UniFi 產品。 而且呢個 Console 功能好強大，你喺 Dashboard 可以見到連線咗嘅 Device，佢哋連咗 2.4GHz 定係 5GHz，仲可以睇到 WiFi 訊號強弱。當然佢仲有其他功能，例如 Threat Protection、Traffic Management、VPN…… 另一樣 UniFi 做得好嘅地方就係 Mesh WiFi 部分，只要透過一鍵接管 (Adpot) 就可以將 Access Point 接入現有環境配置，簡單容易。講多樣功能，我之前喺啲企業級產品先見到有，但係 UniFi 呢個入門版居然都有，就係你可以上傳屋企 Floor Plan，然後 Set 返張圖個比例，UniFi 就可以計算返你部機 WiFi 大約接收範圍有幾多，咁就唔駛自己估估下。
講返洗手間同睡房角落接收問題，收得唔好點算？ 租屋比較麻煩，自己唔可以預早每間房都留一個 Network 位，而家睡房角落同埋洗手間接收差，又唔可以拉線。其實自己都有隻 UniFi Access Point WiFi6 Pro (之前香港買落)，可以用嚟做 Access Point。但係唔知點解連接咗之後，所有經呢隻 Access Point 上網嘅 Devices 又變得好唔穩定。可能係 Access Point 同 Router 之間嘅無線連接唔太好。自己經驗 Access Point 最好駁線接入 Router，唔好用無線方式連接 Router。如果咁樣嘅話，我有乜方法可以令到睡房角落同洗手間都接收好好呢？
方式有兩個:
1. 用 WiFi Extender 嚟將 WiFi Signal 擴大接收範圍。不過我唔多 Recommend 呢個方法，始終都係用無線方式連接你部 router。
2. 用 Powerline 產品，透過屋企電力插頭做傳輸媒介，咁就可以好似用咗 Network Cable 咁連接 Access Point 到 router。
我應該都會去 Amazon 度買對 Tenda Powerline 返嚟試下，試完再話畀大家知個結果。
Dream Router: https://store.ui.com/collections/unifi-network-unifi-os-consoles/products/dream-router
12-July-2022 Amazon Prime Day。 終於等到呢日，原來都係無特價，唯有死死地氣去買返嚟。 而家真係好方便，基本上一插即用，乜都唔駛 set，自已配對好晒。 測試過洗手間位置都收到訊號，速度都有成 6X – 7X Mbps，速度都好好，好滿意
封面圖片取材自 9to5toys.com