Skip to content

投名狀

今個聖誕節 25 號同 Victo 去o左睇投名狀, 揀投名狀睇, 梗係因為華仔, 劉德華呀, 當然仲有我另一個至愛 – 徐靜蕾啦….  我呢o的元朗人當然留係元朗消費啦, 所以我就揀o左新元朗中心入面o既百老匯, 時間係 3:25pm.  我一早係網上訂o左飛, 行數已經係尾三中間位.  睇落好似好正呵~~ 但係去到就….  弊傢伙, 原來係 1 號院, 細到嘔……  唉!!!  尾三都要抬高頭睇, 所以後尾索性成個人好似無腰骨咁坐, 先叫睇得舒服, 所以係度同大家講聲, 1 號院o既戲唔好再去睇, 盞攞o黎辛苦!

電影內容, 大家有睇下o的八卦雜誌都會略知一二, 所以都唔多講了.  反而想講下其他o野, 套戲真係拍得相當好, 入場前都無諗過會拍得咁精彩, 咁有劇力, 陳可辛導演真係令人刮目相看, 香港又多一名大導演了.  唔知呢套戲用o左幾多演員, 導演點可以拍得咁真, 將一幕幕o既情境, 活生生咁呈現係銀幕上, 好有實在感.

而演員方面, 由頭到尾, 我都真係唔覺佢o地係做緊戲, 三位男主角都唔錯, 而華仔真係有機會憑呢套戲再次爭奪影帝殊榮.  由其佢比人用鎖鏈鎖住o既一幕, 真係觸動人心, 另一幕係佢坐係度飲酒, 但係一路飲, 一路喊, 又一路笑, 好悽慘.  金城武又係另一位令我刮目相看o既演員, 佢o既演技可以睇到好有進步, 唔知係咪對手定係導演令佢有咁o既進步, 好….  keep 住繼續.  李連杰反而係無乜突破, 除o左打之外, 無乜特別, 但係又唔可以話唔好, 中規中矩.  徐靜蕾就無乜發揮機會, 變o左一個花瓶咁.

總括o黎講, 成套戲真係不錯!! 成套戲, 可以睇到好重o既兄弟情, 唔係親兄弟, 係義氣.  唔知現今o既人, 仲有無呢o的兄弟情呢?  究竟呢o的兄弟情係愚蠢定係…..  而家o既人會係大難臨頭各自飛??  定係好似投名狀咁.

~~~ 兄弟殺我兄弟者, 是投名狀, 必殺之 ~~~

Published in影音天地

Be First to Comment

Leave a Reply