Skip to content

一公升的眼淚

其實呢套劇早係六個月前已經從朋友口中得知係好感人, 係賺人熱淚, 簡直係催淚彈咁掟過o黎咁, 迫到你要喊, 要你喊到塊臉腫晒先可以收手….  同時呢套劇亦係真人真事改編, 而劇中主角所患o既病, 好似到而家仲未搵到原因, 亦無辦法治療.  當時都無乜特別留意呢套劇, 因為平時都無乜特別興趣睇日劇, 韓劇,  所以都無話有乜衝動去睇呢齣劇, 反而當時自己係o的影音網上討論區睇到話呢套劇o既 DVD 簡直係靚到不得了, 係好有高清o既感覺, 加埋故事好, 所以亦頓時成為發燒友o既試機碟.  就係因為咁, 自己亦想睇下畫面係咪真係咁靚!!  當時搵極都搵唔到邊度可以下載所謂o既靚靚版, 所以最後都放棄o左, 無o左下文.

近日無線電視逄星期日播放一公升的眼淚, 就係咁, 又再燃起我去搵呢套劇o既靚靚版, 終於皇天不負有心人, 原來我同事一早已經下載o左呢套劇o既靚靚版, 咁我當然叫佢 “dump” 一套比我啦!!

初時睇o既時候, 都覺得畫面好清, 好靚, 真係一隻難得o既好碟!  但係後來睇下一集, 睇下一集, 嘩, 真係睇到停唔到, 已經再唔係去欣賞畫面o既清, 靚, 而係因為個故事, 攪到我一日之內, 足足睇o左成八集, 睇完八集之後都成半夜兩點幾, 真係好想睇埋落去, 但係第二朝有工要開, 唯有乖乖咁去.  今個星期六, 終於睇埋最後o個三集!!  好滿足, 唔駛每個星期去等無線播!!

講真, 對上一套我會喊o既戲係肥貓流浪記, 都唔記當時係幾多歲!  其實好似小Q咁, 好多人都有喊, 但係我又唔覺感動.  反而當時係會諗, 點解o的特技拍得咁差!!  呢套一公升的眼淚, 初時睇o左頭八集都無乜特別, 只有少少 touching, 但並唔係o的朋友口中所講咁催淚, 但係原來係最令人觸動o既一集係第十集, 真係估唔到連我都, 真係比老婆係咁話, 少有喎, 你都會喊, 平時都係我喊, 估唔到你今次咁有感覺!! 哈哈哈, 我都唔知, 點解會咁, 係邊個位我會喊, 大家有睇o既, 不如估估呀 (估中無獎)!! 

係呢套劇, 我學識o左一定要堅持, 唔好放棄, 好多時, 原來身邊o既人真係比o左好多支持自己, 但係自己都唔知道, 老套咁講, 當失去時你先會珍惜!!  劇中亞也真係好強, 好似亞湖鬧細佬o個一幕咁講, 如果比著我有呢個病, 我會唔識面對, 唔想出街, 無咁o既勇氣.  我自己都有諗, 我會點呢? 我會尋死? 定係困住自己?  唉…….  唔知!!  

其實呢套戲, 真係教識大家好多o野, 唔知大家有無發覺, 無o既話真係要?  有一句, 我覺得好正,

同情, 係由於你感受得到受苦者o既心情, 所面對o既壓力.  你先會去同情佢!! 

大約意思係咁, 我聽到之後, 真係大喊一聲, 好!!!! 真係講得好有道理!!

Published in影音天地

Be First to Comment

Leave a Reply