Skip to content

遊船河

上個星期日, 去o左同 Victo o既姨丈一家出海!  事緣姨丈早前考o左個船牌, 佢o地一家出o左幾次海, 今次就叫埋我o地一齊去.  一早七點半起身, 八點到達沙田, 轉乘姨丈架車去西貢.

到達西貢, 咁早當然要食返個早餐啦.  點知姨丈話唔好食咁飽, 又唔好飲咁多水, 因為驚係船程中要去臭臭就真係要忍忍忍…  但係我已經習慣o左一定要食早餐, 我一於少理, 食o左個腿蛋麵加凍檸茶, 食飽之後, 當然出發去租架快艇出海啦.

嘩嘩嘩, 第一次坐快艇出海, 心情都幾緊張, 因為自己都唔識游水, 如果萬一有事, 咁點算呢?  好彩呢個擔心好快消失, 因為姨丈都好小心慬慎!  加埋當日o既海面都風平浪靜, 架快艇無乜點左搖右擺, 而一向出名易船浪o既 Victo 都無事, 咁證明姨丈o既駕駛相當好…. 

姨丈首先將隻船駛到一個凹位處, 然後同我o地講, 呢度可以比你o地試下控制隻船, 表弟即時第一個去到駕駛位去試下, 隻船好慢咁前行, 而姨丈就教表弟點樣控制, 繞o左一圈, 就輪到我出場!  嘩,  原來唔係風油呔, 好重, 而且因為開得好慢, 我控制左右時, 發覺有好嚴重o既 delay, 我向左時, 足足有一秒至兩秒, 隻船先會向左轉.  然後各人都試過, 都覺得好玩.  雖然唔係開得快, 但係第一次真係幾開心, 搞到自己都想去考返個牌. 

玩完一輪, 就上岸去o左食飯, 係回程途中, 姨丈話比我試下係安全情況下加速, 咁我又再次挑戰!!  今次感覺同頭先真係唔同, 一個字: 爽!  今次轉向真係快好多, 有即時反應!  反而加速就真係有 delay, 根據姨丈所講, 如果副 engine 靚o的o既話, 唔會有咁o既情況.  係海面中風馳電掣, 真係過癮.  但係亦會加重心理壓力, 因為你要不停咁左右望, 以防左右兩邊無啦啦出現快艇, 又要留意海面情況, 因為o個頭好多人玩水上活動, 香蕉船, 水上電單車, wakeboard, 好驚佢o地無啦啦跌落水, 我會睇唔到而撞到佢o地, 所以要好小心, 好用神.  所以我駕駛時都係企起身, 咁樣可以睇得廣闊o的, 感覺會安全o的.  頭先講o左個呔盤係好重, 要用力去控制, 開得快時, 仲會有搶呔o既情況出現, 所以要捉緊呔盤用力控制, 而且加埋個加速器又係好重, 所以駕駛一隻快艇真係要出晒力!  我諗如果架快艇係新型號會好o的…  下次叫姨丈試試租架新式o既快艇先!!

經過一日o既海上遊, 全身都散晒, 好累!!  

圖片取材自 oceangogo.hk

Published in行街街

Be First to Comment

Leave a Reply