Day 7, 今日瞓到成十點幾先起身，可能早幾日玩得太多，搞到好累。搞得嚟出門口都十一二點，所以今日就將早餐同午餐變成一餐。
早幾日食唔到呢間嘢, 今日就再去拜會一下. 第一站去咗早餐研究所食，呢間嘢好多熟人嚟食，生意好好。。而且呢間嘢都只係開半日, 大約兩點左右就關門. 我哋研究佢哋應該係搞藝術嘅人, 呢間嘢都係為咗糊口, 心中有團火係為咗搞藝術, 所以下午就會關門走人. 而且佢哋好有人情味, 店舖門口仲有一檔茶記專門手沖咖啡，茶檔啲熱水, 奶, 器材都係放係三明治店, 佢哋應該係同路人, 好朋友, 開三明治店, 唔賣嘢飲, 好朋友就開茶檔, 咁好自然就會有生意畀到朋友, 大家通力合作. 係台灣生活, 我估真係唔會太有壓力, 一間咁嘅三明治店, 一檔咁嘅茶檔, 都可以養活到自己, 又可以繼續為理想藝術而奮鬥, 真係好羨慕. 我哋坐係路邊，悠悠閒閒咁食咗一餐，好寫意。
食飽都成點幾，要快快去下一站，台北兒童遊樂園。主要都係畀蘇菲放電，妹妹就悶到瞓覺。裡面都好大, 好多機動遊戲, 好適合小朋友嚟玩, 因為遲嚟, 所以玩咗幾個遊戲之後已經入夜了, 玩到人哋收工，我哋就出返去東門站嘅永康牛肉麵食晚餐。呢度嘅牛肉，如果加上京鼎樓牛肉麵嘅湯底，咁就真係非常正。而家唔係話佢唔正，都好正！！
早餐研究所 店址: 台北市大安區復興南路一段122巷8-3號
台北兒童遊樂園 地址: 台北市士林區承德路五段55號
永康牛肉麵 店址: 台北市大安區金山南路二段31巷17號
