Skip to content

2020 大事回顧

2020年發生咗好多事,而呢啲事都唔多係好事。無論係自身,香港,公司,都各自有問題發生。有令人開心、振奮。有令人唔開心、沮喪。就好似之前咁講,唔多好嘅事佔多。

1 月
武漢肺炎正式影響到香港,甚至開始蔓延到全球。
開始限聚令,新年無得團拜,無得周圍去拜年。

2 月
疫情大爆發前偷偷去咗一轉沖繩,出發前驚險萬分,好彩最後順利出發,一切照原定計劃。
周圍去撲口罩,點解香港人會咁可憐。
開始認真去對待體重嘅問題,的起心肝去跑步。

3 月
武漢肺炎開始全球爆發,股市都跌到谷底。(蝕好多呀~~~)
Wefly 執笠。我復活節假嘅機票呀~ 航空公司話已經退返咗畀 WeFly,所以航空公司唔會退錢畀我。咁點算? 好彩網上實在有太多苦主,亦有太多人曾經有過呢方面嘅經驗。原來可以用信用咭嘅保障機制嚟做申請退款,好煩,幾時先可以退得到? 究竟有無得退到呢?
搞完 Wefly,輪到搞工人姐姐張機票,武肺搞到全球禁飛,就算飛到都要當地隔離 14 日。工人姐姐都話諗過唔返去住,因為當地都爆得幾勁,加埋要隔離,根本無乜時間可以留喺屋企陪屋企人。飛唔到,就要退錢或者改期,當然退錢先啦,改期都唔知改到去幾時。今次直接同航空公司買,應該可以好快收到錢,點知…… Sorry,4-6 個星期先可以收到退款。

4 月
首爾復活之旅取消。

5 月
仲未收到航空公司嘅退款,打去問又話 Processing 緊,要啲時間先可以退到返去我戶口,即係要再等。等幾耐?再講多 2-3 個星期左右。

6 月
又再打去問航空公司,相同說法,已經做緊退款,可能太多人退款,所以需要啲時間處理。點呀?開始擔心究竟係咪航空公司都無錢,所以一路拖住唔退錢?
亞女返得個零星期學又要再度停課,試都無得考。
Wefly 嘅退款終於收到,希望唔好再有下次。

7 月
台中花蓮台東之旅取消。
國安法生效。

8 月
努力終於有回報,體重回落去到 75kg 左右

9 月
6 個月後終於收到退款,個心安落晒。所有機票都退得返錢,一額汗。

10 月
公司單嘢仲未搞掂,有排搞,好煩。幾時先可以完結。
之前上網買咗 Raspberry Pi4 + Nanomesher Sound 用嚟當 music player,終於到貨,聲音一流,好有驚喜。
努力再次有回報,首次 10K 可以喺一個鐘頭內完成 (58m58s),Yeah~~

11 月
大陸開始封鎖外國匯入嘅資金,無得再用找換店匯錢返大陸公司,點搞呢? 搞到畀人凍結咗啲資金,唉~~~~

12 月
聖誕之旅又要取消。
限聚令繼續,只限二人,晚市暫停。究竟想香港蕭條幾耐?

2021年展望,希望疫情會快D過去,畀我哋市民可以唔駛再戴口罩出街,可以呢度去嗰度去,咁就可以快啲去旅行啦! 公司方面希望可以快D有人出高價接盤,咁就 very GOOD。個人方面,希望可以盡快離開呢度,我唔係唔喜歡香港,只係香港已經變得不再香港,為咗下一代,離開去另一個國家係最好嘅選擇。Anyway,最最最緊要都係屋企人, 朋友, 個個都身體健康。

圖片取材自 www.media.org.hk

Published in關於我的....

Be First to Comment

Leave a Reply

Your email address will not be published. Required fields are marked *