Skip to content

BioNTech

終於都係要打。等咗咁耐,都係要趕喺佢就嚟無得打前走去打針,無得再拖。 究竟有乜驅使你去打針呀? 我如果話畀你聽係【愛】,你信唔信? 咪玩啦,我自己都唔信。 咁做乜無啦啦走去打? 唉! 咪就係要返大陸囉。 就嚟成年幾兩年都無返過大陸公司,真係唔敢想像間辦公室會變成點。 另外就係考慮有可能要返去大陸做轉名手續。如果無打針,真係到時開關話要打咗針先可以去,如果無打就要繼續隔離 21 日,咁樣就真係煩。

咁點解又唔打科興? 我信科學。 暫時數據係講 BioNTech 對抗COVID-19 比較有效,再加上變種病毒都有抵抗能力,反而科興就…… 另一原因係由於多數西方國家都認證 BioNTech,將來要出國旅遊嘅時候,嗰本旅遊疫苗護照都係西方國家認證,咁當然打國際公認嘅疫苗啦!

好啦!講咗咁耐,上網 book 日期先。嘩!之前幾個月明明睇過元朗平時都有好多位,點解而家會變晒 full booking? 算啦,第一針改去屯門打,第二針先返元朗打。 Book 好晒之後都係唔心死,不停咁 click 嚟 click 去轉地點,click 咗十分鐘左右,轉返元朗突然見到第一針可以呢個星期日喺元朗打,即刻改期。 Yeah~~~ 跟手幫老婆 book 埋,又係不停咁轉嚟轉去,終於畀我 click 到一個啱老婆嘅日子同時間,搞掂。

話時話,當日嘅打針流程都算順利。約咗下午 6:30,我 6:15 到咗,佢都已經畀人入去。簡單咁簡介一下呢度打乜嘢針,畀本小冊子你睇下呢隻針有乜副作用,再等多陣就已經入得去打針。可能上次有人去錯地點打錯針,而家入門口講一次呢度係打 BioNTech,對身份證時又再講一次,去到見到姑娘打針時又再確認多一次,總之就係要你再三確認知道自己打乜嘢針。

姑娘循例都係嗰啲問題啦,近排有無唔舒服,有無乜嘢食物藥物敏感,有無長期病患,講完呢啲之後就再問我平時有無飲夠 2L 水,屋企又有無維他命 C 丸,打完針要多啲休息,唔好做劇烈運動。不過最後畀佢問咗個問題,我即時 O 嘴。 佢問我屋企有無平安藥? 吓,乜嘢叫平安藥? 佢見我 O 咗嘴,就即時講話即係止痛藥之類嘅藥呀。 我之後真係上網搵資料先知原來出門旅行要執定平安藥袋。

「平安藥」包括,但不限於以下的藥物:

第1類:止痛退燒藥、抗敏藥、止瀉藥、暈浪丸等。

第2類:藥水膠布、消毒藥水等

第3類:口罩、酒精搓手液

第4類:昆蟲驅避劑

講返正題先,姑娘其實一路問就一路打針,如果我唔係一直望住佢,我真係唔知佢打咗。 完全 feel 唔到拮嗰下痛嘅感覺,姑娘真係好手勢。 姑娘話我有食物敏感, 所以打完要坐低 30 分鐘先可以離開。 一直到無乜痛無乜特別,直到夜晚十點十一點,個針口有啲脹痛感,但又唔係好強烈。 不過唔知係咪始終都有少少副作用,搞到我成晚都唔係瞓得太好,半夢半醒之間,好彩第二日唔駛返工啫。

有啲人打第一針已經出現渴睡,頭暈,無力等徵狀。 但係我又唔覺喎,只係針口脹痛,其他病徵都無乜出現過。 希望打第二針時都係咁上下,唔好出現乜嘢徵狀就好囉!

圖片取材自 news.rthk.hk

Published in關於我的....

Be First to Comment

Leave a Reply

Your email address will not be published. Required fields are marked *