Skip to content

Luis Alberto Scola

如果你睇開或者打開籃球,呢個名字絕對唔陌生。佢初加入火箭時我已經好喜歡佢,好關注佢。因為佢籃底嘅腳步功夫,真係可以媲美 Hakeem Abdul Olajuwon。再加上佢開闊嘅眼界,真係做助攻王都得。傳,切,射,籃板樣樣都得,真係不知不覺咁畀佢全面嘅身手吸引。

後來阿根廷贏美國隊,最後拎埋2004年奧運冠軍。當時 Manu Ginobili + Scola 呢對組合,真係令各隊都聞風喪膽。當 Ginobili 都退役,Scola 仍然馳騁於 CBA,而家仍然喺意大利打緊職業賽。

你會話有乜特別?特別在於 Scola 而家已經係一名41歲嘅球員。以佢而家嘅歲數,居然仲可以打職業聯賽,仲可以入選國家隊。入選不特止,佢仲係打正選,場均二十幾三十分鐘嘅出場時間。佢仲可以係隊中嘅得分手,畀球隊一個穩定嘅得分來源。佢仍然係隊中嘅籃板王。

最令我佩服都唔係以上所講嘅嘢。點解我好喜歡佢? 其實係因為佢嘅籃球態度。佢後生時已經好積極去防守,去搶籃板。其實佢加入 NBA 時已經 27 歲,對 NBA 嚟講都已經係中齡球員,但係佢仍然好勤力咁去補位,防守,搶籃板。

佢仲以 39歲之齡,帶領阿根廷勇奪世錦賽嘅銀牌。我記得今屆奧運熱身賽,我見到佢正選上陣,當比賽到下半段,阿根廷出現失誤畀對手打反擊,當時鏡頭我見到只有 Scola 一個係跑緊返去做防守,其他阿根廷球員都企咗喺度。其實之前嘅比賽好多時都見到佢不停來回跑去防守,去搶籃板,去補位。佢已經係一個 41 歲嘅球員,都可以繼續去跑,去搶。點解其他球員就企喺度?呢啲我只可以講係心態。佢對籃球嘅熱愛,佢對比賽嘅態度,真係值得其他籃球員去學習。

今場奧運比賽對澳洲隊,當差唔多完場前,Scola 替換落場時,兩隊球員紛紛站立拍掌,連觀眾席上嘅其他運動員都起身拍掌致意。呢個場面真係好感動,感動到 Scola 都眼濕濕。而作為一個球員,可以受到咁多球員嘅尊敬,真係一種榮譽,亦係一個對球員生涯嘅肯定。寫寫下自己都眼濕濕添。

Scola,雖然你未必可以入選 NBA 名人堂,但你喺我心目中已經入選咗名人堂。

Scola Wiki: https://en.wikipedia.org/wiki/Luis_Scola

圖片擷取自 Now TV

圖片取材自 FIBA Twitter

Published in運動

Be First to Comment

Leave a Reply