做乜又買嚿咁嘅嘢返嚟。當然有苦衷啦！我點會無啦啦嘥錢。
事緣屋企個寬頻到期，之前兩個月不停咁周圍搵 Sales 問有無特價，有無優惠，可惜一聽見係村屋就話無。一直搵到師傅上嚟收機，正式斷網。當然我唔會就咁用自己電話 data 啦。因為屋企除咗我同 Mimi 可以繼續上網之外，家中都仲有其他人有上網需求，當然最重要係唔知之後開學會唔會突然又話 Zoom，如果佢哋上唔到網，唔通真係同學校講我哋唔上堂咩！ 仲有就係屋企啲 IPCAM，NAS，Google Home，電視盒都要上網先可以睇到用到。係諗到呢啲情況之下，又未搵到新上網公司之下，唯有搵替代品。
辦法就係用 4G Sim Card 上網，本身有隻幾年前買嘅 4G 隨身 router，但係今日拎出嚟插咭，居然 Sim Card 糟唔識 lock 實張咭，我試過按實張咭，但係系統又話 detect 唔到，搞咗一陣就放棄。轉而上二手網搵下有無平平哋嘅 USB LTE Dongle 可以插去 router度用. 最慘係隻 router 唔係隻隻 USB LTE Dongle 都食到，只有某幾款，可惜係二手網或淘寶都搵唔到。反而畀我喺 Carousell 見到呢隻 O2 LTE Router。再去 search 下呢隻嘢嘅功能，都可以應付到，咁就落單去買，同賣家討價還價之後，都減咗廿蚊雞，HK$430 埋單，哈哈哈！收貨嗰時望落去感覺係全新貨，抵玩。
設定好隻O2之後，都慶幸自己買咗呢隻O2。因為如果用嗰啲隨身 router，我係唔可以做到 port mapping 返去屋企嘅 NAS。而家 O2 再夾原來隻 Router 就可以做到返晒之前喺街外返入屋企嘅工作。講外型，真係靚爆鏡；講內涵，中規中矩。暫時屋企人用落又唔覺話有問題，上網速度佢哋又話幾好。總之佢哋都 feel 唔到分別啦！
我用乜嘢上網咭？我去鴨記睇咗又問咗幾間，最後就揀咗呢張叫做 ValueGB 嘅咭，佢係用 Smartone 網絡。而佢只需 HK$115 就已經有 70GB 。如果我一個月只用 70GB 嘅話，真係平過我用 netvigator / HKBN 好多；就算一個月用 140GB，最多都係 HK$230 啫，同我之前嘅上網費一樣。 大家都無投訴，我又慳咗錢，真係幾好。
Spec:
| 支援頻段 : | B1/B2/B3/B4/B5/B7/B8/B20/B28/B38 |
| Download : | 300Mbps |
| Upload : | 50Mbps |
| LTE Category : | Cat.6 |
| WiFi : | 2.4GHz & 5GHz |
Updated on 13-Oct-2021
最近申請咗 CSL Club Sim 3 個月合約嘅 42Mbps 任用數據服務，都係HK$138 per month。當你用完 7GB 數據，佢會將你上網分配為優先次序，唔係降速去 128k or 256k，近排 Birdie 已經好好，爆 Data 後會變成 2Mbps，但呢個 CSL 上網服務真真正正係任用，無降速，真係爽。
試用後感
普通上網，睇下 Youtube，聽下歌，基本上真係無乜大問題。最多係可能附近有人用緊 CSL，所以會變得慢咗，load 網頁會耐咗啲啫。 不過呢種上網方法唔夠家居光纖寬頻上網好梗係有啲原因，就係當你多人上網睇戲或者打機時會出現 lag 嘅情況，嗰時你就會希望用返家居光纖上網服務。 不過唔緊要啦，我都係頂住先啫。 何況屋企都無咁多時候會一人一部機上網睇戲打機。