Skip to content

有朋自遠方來

嚟咗呢度無耐,本地朋友都唔識得多個。好彩我哋都仲有啲香港朋友過咗嚟呢度。今日就有一個家庭趁住小朋友放 Term Break,即刻話落嚟南部探我哋,順便約我哋一家人去倫敦玩。

做乜會話朋友落南部?你朋友唔係住附近嘅咩? 係,我哋呢邊本身有兩個朋友住附近,但呢個家庭朋友本身係住 【 蘇 格 蘭 】( 好遠呀! ),佢哋嚟咗蘇格蘭差唔多有一年,終於搵到藉口落嚟倫敦玩,今次齊齊去闖蕩一下。

由蘇格蘭落嚟,差唔多用咗成七八個鐘,諗起都覺得攰爆。朋友一家大細拎住行李,我都有諗過佢哋應該搭火車定自己揸車,最後都係自己揸車方便啲。因為計過數,搭火車嘅話,嚟到南部出去玩都係要用車,我架車都車唔到咁多人,如果call uber又貴,呢度租車又貴,坐火車嚟倫敦又係要用七個鐘,仲要唔係點到點到門口,咁鬼煩,不如揸車嚟好過啦。

朋友到埗都已經六點,當然要同佢哋醫肚先啦。第一晚就同佢哋食港式炒粉麵做晚餐。原來蘇格蘭嘅茶餐廳價錢居然比我哋呢邊貴,而且唔算好食。朋友見我 post 相出嚟話好食,又講到明想試下,咁就要同佢哋去食返餐啦!等佢哋回味一下香港嘛!呢間其實唔係一間港式茶餐廳,佢應該係一間集越泰港於一身嘅食店。佢隱身於 Sutton High Street 街尾,店名叫做 Noodle House 。

今次嗌咗乾炒牛河,咸魚雞粒炒飯,星洲炒米,煎鍋貼,炒菜心,椒鹽鮮魷,珍珠奶茶。大人細路都食到舔舔脷。我最愛佢嘅乾牛河,炒菜心,有鑊氣,好味。椒鹽鮮魷同珍珠奶茶就真係失色好多,下次就唔好叫嚟飲啦。High Street 有間 T4 好味好多。吖,記得呢間餐廳係唔收信用咭,記得帶定現金過去找數呀!

餐單
餐單
喺呢度可以食到乾牛河,真係好滿足。

封面圖片取材自 https://fakingitfabulous.com

Published in朋友英倫生活

Be First to Comment

Leave a Reply